1 Siun ni kokata san ja ia ndaꞌu ini kuu ni, vi Jitoꞌo san,

te nikuii nikani kondakani san ja ia skunkuu ndaa kuu ni.

2 Chi kachi san: “Siun ni oo yutnu ja kundaꞌu ini ni ñayiu, vi Dios,

te maa andivi ja tu sama, xneꞌe kaji ja skunkuu ndaa ni”.

3 Te ni kachi ni, vi Dios: “Ni saꞌa rin in tratu jin in tee ni kaji rin,

te ni kee yuꞌu rin nuu David, tee jinokuechi nuu rin, te jiñaꞌa rin:

4 Saꞌa rin ja siun ni vi koo ndikin tata ron,

te nikuii nikani vi koo tee vi kotatnuni nuu tniuu ron”, kachi ya.

5 Ndiꞌi ja ka oo andivi ka saꞌa kaꞌnu ña jin ni, vi Jitoꞌo san, jin tniuu vii tniuu vaꞌa ja saꞌa ni,

te suni ka chiñuꞌu ña ia ka jinokuechi nuu ni ja skunkuu ndaa ni.

6 Chi tu na in ia oo andivi ja kintnaꞌa inuu jin maa Jitoꞌo,

te ni tu na in chuꞌchi ja kintnaꞌa inuu jin ya.

7 Ka ndututu ia Dios jin ia ka jinokuechi nuu ya,

te ndiꞌi ia yun ka yuꞌu niꞌnu ña vi ka nee yiñuꞌu nuu ya,

te kaꞌnu ndevaꞌa kuu ya vi ioo ndevaꞌa tniuu saꞌa ya saa ndiꞌi ia ni ka jionduu ña jin ya.

8 Maa ni kuu ia kaꞌnu ndevaꞌa, vi Jitoꞌo san,

te tu na in kintnaꞌa inuu jin ni, te oo maa ni jin ndiꞌi jakaꞌnu ni vi tnoꞌo ndaa.

9 Te maa ni tatnuni nuu ndute mar ja jiondiso xeen ndevaꞌa nuu de,

vi junkani ni ola ndute ja ndakoo sukun ndevaꞌa de.

10 Te ni skuechi ni kiti xeen ñuꞌu nuu ndute mar nani Rahab na kuinio in yiki kuñu ndiyi,

te jin jandakui ni, ni jatenuu ni ja ka kaꞌan uꞌu ña jin ni.

11 Te kuenta maa ni kuu andivi vi suni kuenta maa ni kuu ñuyiu,

chi maa ni ni saꞌa ñuyiu vi ndiꞌi ja oo nui.

12 Maa ni, ni saꞌa ñuꞌu oo ichi norte vi ñuꞌu oo ichi sur,

te yuku Tabor vi yuku Hermón ka jita yaa nuu ni.

13 Te kaꞌnu ndevaꞌa kuu ndaꞌa ni, te ndakui ndaꞌa kuaꞌa ni,

te xneꞌe ndaꞌa ni ja kundee ni, kuu nijaꞌnu ni.

14 Te tatnuni ni jin tnoꞌo ndaa vi saꞌa ndaa ni,

te yoxnoꞌo ja ndaꞌu ini ni vi tnoꞌo ndaa ichi nuu ni kuaꞌan.

15 Na taꞌu na ndetu ñayiu ka jini vi ndakakuneꞌe ña jin ni,

chi koyeꞌe ni nuu ichi ka jikai.

16 Chi ndiꞌi ni kiuu ka kusii ini ja ka ndakakuneꞌe ñai jin ni,

te ka saꞌa kaꞌnu ñai jin tniuu ndaa ja saꞌa ni.

17 Chi maa ni kuu jandakui mai vi in jakaꞌnu ndevaꞌi,

te kaya kuaꞌa jandakuio, chi saa kuini maa ya ja saꞌa ya.

18 Chi maa ni, vi Jitoꞌo san, kuu ia jito jini ña,

te maa ni kuu ia ii ñayiu Israel, vi kuu ni rey san.

19 Yun te ni kaꞌan ni nuu ni skuni ni ñayiu ka jinokuechi ndaa nuu ni,

te jiñaꞌa ni: “Ni kaji rin in tee tu ioo,

te ni saꞌa kaꞌnu rin de vi ni chituu rin jin de.

20 Te ni junkuꞌun rin David, tee jinokuechi nuu rin,

te ni joso rin texeꞌen rin xini de, te ni jani rin de ja kokuu de rey.

21 Te siun ni kochituu rin de,

te jin jakaꞌnu rin, suni kuñaꞌa rin jandakui de.

22 Te ma vi kakuiko sanaa ña tee ka kaꞌan uꞌu ña jin de,

te ni in tee ka saꞌa jakueꞌe ma vi kundee siki de.

23 Chi vi jin nuu de, te vi suaꞌa kitu xiaꞌan rin ñayiu ka kaꞌan uꞌu ña jin de,

te xnaa rin ñayiu ka skexiko ña jin de.

24 Te koo de jin tnoꞌo ndaa rin vi jin ja ndaꞌu ini rin,

te jin maa rin, te kokuu kaꞌnu de.

25 Chi kuñaꞌa rin jakaꞌnu rin nuu de ja kotatnuni de nii ñuu ka oo yuꞌu ndute mar,

vi guaa ndee yute Éufrates.”

26 Yun te kachi de: “Maa ni kuu tata san, maa ni kuu ia Dios san,

vi maa ni kuu kava ja skaku niꞌnu ña jin san”.

27 “Te saꞌa rin ja nduu de seyii xtnañuꞌu rin,

te kokuu de in rey kaꞌnu ndevaꞌa ka ja oo ñuyiu yaꞌa.

28 Te siun ni kokundaꞌu ini rin jin de,

te koo yutnu tratu ja ni saꞌa rin jin de.

29 Te siun ni vi koo ndikin tata de,

te vi kotatnuni nagua kiuu ja koo andivi.

30 ’Su visi na vi xndendoo ndikin tata de ley rin,

te ma vi kondikin kai nagua tatnuni rin,

31 te nuu ja na vi kuiso kavai tnoꞌo ja kaxtnoꞌo rin,

te ma vi kuantnoꞌo kai tnoꞌo ja tatnuni rin,

32 te visi na kiꞌin rin in xtnuu xii, te na kani rin jin ja jaꞌa jakueꞌe ka saꞌi,

te na kuun na kani rin jin ja jaꞌa yika kuechi,

33 su ma xndendoo saꞌun rin ja kundaꞌu ini rin jin David,

te ni ma kaꞌni ña ja saꞌa ndaa rin jin de.

34 Te ma ndunaa ini rin tratu ja ni saꞌa rin jin de,

te ni ma ndasama rin tnoꞌo ja ni kee yuꞌu rin jin de.

35 Chi ni kee yuꞌu maa rin ja ia ii kuu rin,

te ma skuaꞌa tnoꞌo rin nuu David.

36 Chi jiñaꞌa rin nuu de, siun ni vi koo tatatnoꞌo de,

te koo ni nuu tatnuni de nini yeꞌe nikandii.

37 Te siun ni koyutnu nuu tatnuni de nini oo yoo andivi,

te yoo yun kokuu testiu ndaa ja siun ni kotatnuni de.”

38 Su ni xndendoo ndaꞌu ni rey ja ni kaji maa ni, vi Dios, vi ni skexiko ni de,

te ni kiti ini ndevaꞌa ni nuu de.

39 Te ni ndaxtuꞌu ni tratu ja ni saꞌa ni jin David, tee jinokuechi nuu ni,

te ndee ñuñuꞌu ni skunta ni tniuu kaꞌnu ja ndiso de.

40 Te ni xnaa ni ndiꞌi muro ja ndesi ñuu de,

vi ni xnani ni ndiꞌi ñuu ndakui de.

41 Te ndiꞌi ñayiu ja ka yaꞌa yun ka suꞌu nagua ka kuini maa,

te ka jaku ndee ña ñayiu sava ka ñuu ja ka oo yatni yun.

42 Te ni saꞌa ni ja ni ka kundee ñayiu ka kaꞌan uꞌu ña jin de nuu ni ka jaxin tnaꞌa de,

vi ni saꞌa ni ja ka kusii ndevaꞌa ini ñayiu yun ja ni ka kundei.

43 Vi ni saꞌa ni ja tu inu xeen ka yuchi kani ka nee de,

te tu ni chituu ni jin de ja vi kundee de nuu ni ka jaxin tnaꞌa de.

44 Te ni kindee ni jakaꞌnu de, te ni xnani ni nuu tatnuni de,

te ni skunta ni ndee nuu ñuꞌu.

45 Chi ni saꞌa ni ja ñama ni yii de, visi ñayiu kuechi kuu de,

te ni saꞌa ni ja kukanoo ndevaꞌa de.

46 ¿Nasaa ka kiuu ma konini ni tnoꞌo ka kaꞌan san, vi Jitoꞌo san?

¿A vi siun ni kokiti ini ndevaꞌa ni nuu in in san na kuinio ñuꞌu ja kandaꞌa?

47 Ndakaꞌan ni, vi Dios, ja nunuu ni oo san ñuyiu yaꞌa,

te ndiꞌi ñayiu ja ni saꞌa maa ni, chi nunuu ni ka tekui, te vi kui.

48 Chi tu na in ñayiu teku nikuii nikani ja ma kui,

te ni in ñayiu ma kuu ja kaku nuu kueꞌe ja jaꞌni ña.

49 Jitoꞌo san, ¿ndenu oo ja ni okundaꞌu ini ni David ndee janaꞌa,

nagua ni kee yuꞌu ni jin tnoꞌo ndaa ni?

50 Ndakaꞌan ni tee ka jinokuechi nuu ni, vi Jitoꞌo san,

ja kuaꞌa ñayiu ka jaku ndee ña jin san, vi ñayiu kuaꞌa ñuu ka nani ña jin san.

51 Chi ka kaneꞌe ña ñayiu ka kaꞌan uꞌu ña jin ni, vi Jitoꞌo san,

te ka nani ñai jin san ja kuu san tee ni kaji ni, ndee ni nuu jika san.

52 ¡Kaꞌnu kuu Jitoꞌo nikuii nikani!

Saa na kokuu vi saa na kokuu.