1 Jitoꞌo san, maa ni kuu Dios, ia skaku niꞌnu ña jin san,

te nduu vi ñuu ni kana ndaꞌu san nuu ni ja chituu ña ni jin san.

2 Te na kenta joo tnoꞌo ja ndakuatu san ndee nuu ni,

te konini ni joo tnoꞌo ja kana ndaꞌu san.

3 Te kuaꞌa ndevaꞌa jakueꞌe oo siki san,

ja vi ja oo ni ka san ja kanakau san nuu ñuu jiꞌi.

4 Te vi ja ka kaꞌu ña jin san neꞌu ñayiu ka jinkoyuꞌu,

te kuu san na kuinio in tee ja tu ondakui saꞌun ka de,

5 ja ni ka xndendoo ña jin san neꞌu ndiyi.

Te kuu san na kuinio in tee ni ka jaꞌni ña jin yuchi kani,

te ni ka tayuꞌu ña chii ñuꞌu, na kuinio ñayiu ni ndunaa ini ni,

te tu jito jini ka ni jin.

6 Te ni tnaa ña ni in yau kunu ndevaꞌa,

vi in nuu nee ndevaꞌa.

7 Te kiti ini ndevaꞌa ni siki san,

te ni tetniuu ni tnundoꞌo tnaꞌa san, na kuinio nuu kani xeen ña ola ndute mar.

8 Te ni xtajioo ni ñayiu ka ndeka tnaꞌa guaꞌa jin san,

te ni saꞌa ni ja ni ka skexiko ñai jin san,

te na kuinio ja ni ndesi san, te ña kuu ja yaa san.

9 Te kuaꞌan masaꞌu nduchi nuu san ja ndaꞌi ndevaꞌa san,

te ndiꞌi ni kiuu kana san nuu ni, vi Jitoꞌo san,

te kaneꞌe san ndaꞌa san ichi nuu oo ni.

10 Te ¿a saꞌa ni in tniuu vii tniuu vaꞌa nuu ñayiu ni ka jiꞌi?

¿A kuu vi ndakoo ndiyi, te vi ndakuantaꞌui nuu ni?

11 Te ¿a kuu vi kuñaꞌa nuu ndiyi ja ka yiyuꞌu chii ñuꞌu ja kundaꞌu ini ni jin?

¿Axi kuu vi kuñaꞌa ja ia ndaa kuu ni nuu ndiyi ka oo ñuu jiꞌi?

12 ¿Te a kuu vi ndakuni ndiyi ka oo ñunee, tniuu vii tniuu vaꞌa vi tniuu ndaa ja saꞌa ni

nuu ka oi ñuu nuu ni ka ndunaa ini?

13 Su sein, chi kana ndaꞌu san nuu ni, vi Jitoꞌo san, ja chituu ña ni,

te in neꞌe in neꞌe ndakuatu san nuu ni.

14 Te ¿nau ja skexiko ña ni jin san, vi Jitoꞌo san?

¿Nau ja tu kuini ni ja konini ni tnoꞌo kaꞌan san?

15 Te vi ndee nuu lule san tnaꞌa ndevaꞌa san tnoꞌo suchi ini,

te vi ja oo yatni san ja kuu san, chi ni tetniuu ni tnundoꞌo xeen ndevaꞌa ja tnaꞌa san,

te ma kundee ka ini san.

16 Chi ni junkau ja kiti ini ni siki san,

te ni skuita ña tnundoꞌo ni tetniuu ni.

17 Te ndiꞌi ni kiuu jionduu ña tnundoꞌo jin san na kuinio ndute,

te ja ni jasi saꞌun ña jin san.

18 Chi ni xtajioo ni ñayiu ka ndeka tnaꞌa guaꞌa jin san, vi ñayiu ka jika in ni jin san,

te vitna, chi maa ni ñunee kuu ja ka oo guaꞌa jin san.