1 Na ñayiu ja oo nuu ndaꞌa ia oo ndee sukun,

te koo vaꞌi nuu kati maa ia ndakui ndevaꞌa yun.

2 Te kuñaꞌi nuu Jitoꞌo Dios: “Maa ni kuu ia tavaꞌa ña,

vi ia yituu guaꞌa ña, vi Dios san, ia kukanu ini san”.

3 Te maintnoꞌo maa ya, guaa skaku ña jin ni nuu ndaꞌa ñayiu ka kaꞌan uꞌu ña,

vi nuu kueꞌe xeen ja kuini ja kaꞌni ña jin ni.

4 Te chisaꞌu ña ya jin ndijin ya,

te ndachindijin ña ya, na kuinio in kiti ndagua,

te yun koo guaꞌa ni,

chi tavaꞌa ña tnoꞌo ndaa ya jin ni,

na kuinio kaa tikute.

5 Te ma koyuꞌu ni ja siuꞌu ndevaꞌa ña tnoꞌo jakuaa,

ni yutnu ndugua ja ka tiuu ña jin ni tnoꞌo nduu,

6 ni kueꞌe xeen ja jika nuu nee,

ni jakueꞌe ja jika sagua nduu ja xnaa ña.

7 Chi visi in mil ñayiu vi ndonso ja vi kuu ichi ndaꞌa satni ni,

te uxi mil ichi ndaꞌa kuaꞌa ni,

su maa ni, chi tu nagua ndoꞌo ni.

8 Chi maa ni kondiaꞌa guaꞌa ni,

te kuni ni ja vi ndaniꞌi vi ndatnaꞌa maa ñayiu kueꞌe jin ja ni ka saꞌi.

9 Chi ni kaji ni Jitoꞌo Dios ja tavaꞌa ña ya jin ni,

te maa ia kaꞌnu ndevaꞌa yun kuu ia jito jini ña jin ni.

10 Te ma kii ni in jakueꞌe siki ni,

te ni kueꞌe xeen, ma koo nuu veꞌe ni.

11 Chi tatnuni ya nuu ia ka jinokuechi nuu ya

ja vi kokoto ña ya ndiꞌi ni nuu ichi jika ni.

12 Te vi kotnii ya ndaꞌa ni kiꞌin ni

nagua ja ma kachi jaꞌa ni jin ni in yuu.

13 Te kuain niꞌnu ni ndikaꞌa vi koo xeen ndevaꞌa,

vi kachi jaꞌa ni seꞌe kueli ndikaꞌa vi kiti xeen ndevaꞌa.

14 Te kachi ia Dios: “Skaku niꞌnu maa rin jin nuu ndiꞌi jakueꞌe yun,

chi kutoo ñai jin rin,

te koto kuni rin jin, chi jini ñai jin rin.

15 Te nuu ndakakuneꞌe ñai jin rin,

te konini rin tnoꞌo kaꞌin,

te koo maa rin jin nuu tnaꞌi tnoꞌo suchi ini,

te skaku niꞌnu rin jin, te kuñaꞌa rin jayiñuꞌu nui.

16 Te suni kuñaꞌa rin kuakuaꞌa kuia ja kotekui,

te xneꞌe rin nui ja na kuni ja skaku niꞌnu rin jin.”