92
Ka ndakuantaꞌu ñayiu nuu ia Dios
Yaa ka jita kiuu ndatatu
Nase guaguaꞌa kuu ja ndakuantaꞌu san nuu ni, vi Jitoꞌo san,
te kata san in yaa nuu maa ni, vi Dios, ja oo ni ndee sukun.
Te tnoꞌo neꞌe ndakani san ja ia ndaꞌu ini kuu ni,
te tnoꞌo jakuaa ndakani san ja ia skunkuu ndaa kuu ni,
nagua kuaꞌan maa yaa ja jita xtnuu kaxin ja oo uxi tuchi,
vi nagua vita vita jita arpa.
Chi saꞌa ni ja kusii ndevaꞌa ini san jin tniuu vii tniuu vaꞌa saꞌa ni, vi Jitoꞌo san,
te kana san ja kusii ini san jin tniuu ja saꞌa ni jin ndaꞌa ni.
 
Nase ndeꞌe kaꞌnu tniuu saꞌa ni, vi Jitoꞌo san,
te ndichi ndevaꞌa ndakani ini ni.
Te ñayiu vasa, chi tu ka jini naxa ndakani ini ni,
te ni tu ka jinkuiꞌnu ini.
Te ñayiu ka saꞌa jakueꞌe, chi ka jitei na kuinio yuku kuii,
te ndiꞌi ñayiu ka saꞌa janeꞌe jayichi, chi ka jai na kuinio ita jin ja ka saꞌi,
su nikuii nikani ni vi nai.
Su maa ni, vi Jitoꞌo san, chi nikuii nikani kuu ni ia kaꞌnu ndevaꞌa.
Chi jandaa, vi Jitoꞌo san, ja ndiꞌi ja ka kaꞌan uꞌu ña jin ni vi naa,
te vi kutenuu ndiꞌi ñayiu ka saꞌa jakueꞌe.
 
10 Su maa ni, ndataa jandakui san, nagua ndakui in isndiki makaa sukun.
Te ni joso ni tatna xiko asin xini san ja ni kaji ña ni.
11 Te kuni san jin nuu san naxa ka ndondiso ñayiu ka kaꞌan uꞌu ña jin san,
te konini san ja ka kana ndaꞌu ñayiu ka ndakoo siki san.
 
12 Te ñayiu ndaa, chi vi jaa vii ndevaꞌi na kuinio yutnu kuun ñuu,
te vi kuaꞌnui na kuinio tnu itni ka oo Líbano,
13 ja ka nukuiin tnu ini veꞌe maa Jitoꞌo,
te ka jaa ita tnu ini nuu oo veꞌe ia Dios.
14 Te visi ja ni ka yii tnu, su vi kokuun ni ndiaꞌa tnu,
te siun ni vi koo ndakui tnu vi vi koo kuii tnu.
15 Te yun vi koi nagua ja vi kokaꞌin nuu ñayiu ñuyiu ja ia ndaa kuu Jitoꞌo,
te maa ya guaa tavaꞌa ña, te tu na tniuu ja tu saꞌa ndaa ya.