1 Vi ndakuantaꞌu ni nuu ia Dios, te vi ndakakuneꞌe ni sivi ya.

Vi ndakani ni nuu ñayiu taka ñuu tniuu naꞌnu ni saꞌa ya.

2 Vi kata ni yaa ja ka chiñuꞌu ni ya,

te vi kaꞌan ni ndiꞌi tniuu vii tniuu vaꞌa ja saꞌa ya.

3 Te vi kokuu teyii ni ja ia ii kuu Dios ni,

te na vi kokusii ini ñayiu ka ndanduku Jitoꞌo.

4 Vi ndanduku ni Jitoꞌo vi jakaꞌnu ya,

te siun ni vi kondanduku ni ya.

5 Vi kondakaꞌan ni tniuu vii tniuu vaꞌa vi tniuu naꞌnu ni saꞌa ya,

vi tnoꞌo ni kaꞌan ya ja ni sandaa ya kuechi ñayiu,

6 maa ni ja ka kuu ni ndikin tata Abraham,

vi seꞌe Jacob, tee ni kaji ya.

7 Te maa Jitoꞌo kuu ia Dios mao,

te maa ya tatnuni nuu ndiꞌi ñuyiu.

8 Chi siun ni naꞌa ya tratu ni saꞌa ya

vi tnoꞌo ja ni tatnuni ya nuu kuakuaꞌa ñayiu ja vi koo nuu yaꞌa kuaꞌa ndevaꞌa ka kuia.

9 Te suu kuu tratu ja ni saꞌa ya jin Abraham

vi tnoꞌo ja ni kee yuꞌu ya nuu Isaac.

10 Te ni ndasaꞌa kutu ya jin Jacob ja kuu na kuinio in ley,

vi jin ñayiu Israel ni ndasaꞌa kutu ya in tratu ja koo nikuii nikani,

11 nuu jiñaꞌa ya: “Nuu maa ron taa rin ñuꞌu ja oo taka ñuu ja tnii Canaán

ja kuu ñuꞌu ja vi niꞌi maa ron ja vi saꞌa jajin ron”.

12 Te nuu joo ni ñayiu yun ni ka okuu,

te joo kuiti ni ka ojika ndaꞌu nuu ñuu yun,

13 te ñuu ñuu ni ka ojikai

vi ni ka ojika ndaꞌui in in ñuu nuu ka tatnuni rey,

14 te tu ni jandetu ia Dios ja vi saꞌa ndevaꞌa ña ñayiu jin,

te ja jaꞌi guaa ni kaꞌan xeen ya jin tee ka kuu rey.

15 Te jiñaꞌa ya: “Ma vi koxnaꞌa ron ñayiu ni kaji rin,

te ni ma vi kosaꞌa ron jakueꞌe jin ñayiu ka ndakani tnoꞌo rin”, jiñaꞌa ya.

16 Yun te ni tetniuu ia Dios soko nuu ñuu yun,

te ni xnaa ya ndiꞌi ja vi kaa ñayiu yun.

17 Su ni tetniuu ya in tee nani José ja kokoxnoꞌo de nuu ñayiu ñuu de,

ja ni ka xiko ña ja kokunukuechi de nuu ñayiu inka ñuu.

18 Te ni ka juꞌni siꞌin de jin cadena,

te ni ka chiꞌi ña jin de vekaa,

19 guaa ndee nuu ni skunkuu tnoꞌo ja ni kaꞌan José,

te ni xneꞌe maa ia Dios ja ndija de tnoꞌo kaꞌan de.

20 Yun te ni tatnuni rey ja ni ka siaa ña jin de,

te ni siaa ña tee tatnuni nuu ñayiu ñuu yun.

21 Te ni jani ña rey yun jin José ja kotatnuni de nuu ndiꞌi ñayiu veꞌe rey,

vi ni skuiso siki ña de ndiꞌi ja nevaꞌa de jin José,

22 nagua ja kaxtnoꞌo de nuu tee ka netniuu naꞌnu,

vi skuaꞌa ña de tnoꞌo ndichi jin tee ka kuu nijaꞌnu nuu ñuu yun.

23 Yun te saa ni jino Israel ja suni nani de Jacob nuu ñuu Egipto,

te ni oo ndaꞌu ni de ñuu yun ja kuu nuu ka oo ñayiu tatatnoꞌo Cam.

24 Te ni saꞌa ia Dios ja ni ka kaya kuaꞌa ndevaꞌa ñayiu ñuu ya,

te ni saꞌa ya ja inu ndakui kai saa ñayiu Egipto yun ja ka kaꞌan uꞌu ña jin ya.

25 Te ni sama ya anu ñayiu Egipto yun ja ni ka skexikoi ñayiu ñuu ya,

te ni ka ndakani kueꞌe ini siki ñayiu ka jinokuechi nuu ya.

26 Yun te ni tetniuu ña ia Dios jin Moisés, tee jinokuechi nuu ya,

vi jin Aarón, tee ni kaji ya.

27 Te ni ka saꞌa de kuaꞌa tniuu naꞌnu ia Dios,

vi tniuu vii tniuu vaꞌa nuu ñuu ñayiu tatatnoꞌo Cam.

28 Te ni tetniuu ia Dios ñunee ja ni kunee ninii ñuu yun,

su tu ni ka onini ñayiu Egipto tnoꞌo ni kaꞌan ya.

29 Te ni saꞌa ya ja ni ka nduu ndute yun niñi,

te ni ka jiꞌi chiaka de.

30 Te ni taꞌu kuaꞌa ndevaꞌa likuara nuu ñuu Egipto,

te vi ndee ini veꞌe rey ni kiukuei ti.

31 Te ni kaꞌan ia Dios, te ni kikuei kuakuaꞌa chiukun naꞌnu

vi chiukun kueli ja ni chitu ti nii ñuu Egipto yun.

32 Te ni tetniuu ya ñiñi nuu tniuu sau,

vi ni kuun ñuꞌu siki ñuu yun.

33 Te ni skuechi ña jin tnu uva vi tnu tichi iuu,

vi ni skuechi kueli ña jin ndiꞌi yutnu ka oo ñuu yun.

34 Te ni kaꞌan ia Dios, te ni kikuei kuaꞌa ndevaꞌa ndetnuni tika langosta,

ja ni ka jaa ti yuku kuii.

35 Te ni ka jaa ti ndiꞌi yuku kuii ja oo nuu ñuu yun,

vi ni ka jaa ti ndiꞌi ja ka jitu ñayiu nuu ñundeꞌi.

36 Yun te ni jaꞌni ya ndiꞌi seyii xtnañuꞌu ñayiu Egipto,

ndiꞌi seyii xtnañuꞌu ñayiu nuu ka ochitu chitui jin jandakui.

37 Yun te ni ndeneꞌe ya ñayiu ñuu ya ka ndiso ndei ndatniuu ja kuu oro vi plata,

te tu na in ñayiu kuꞌu neꞌu tatatnoꞌo Israel.

38 Te ni ka kusii ini ñayiu Egipto ja ni ndekuei ñayiu Israel,

chi ka yuꞌu ndevaꞌa ñai.

39 Te ni jata ia Dios in viko ja kokuu kati ja kisaꞌu ña jin ñayiu Israel,

vi in ñuꞌu ja koyeꞌe tnoꞌo jakuaa.

40 Ni ka jikan ñayiu ñuu ya ja vi kai, te ni tetniuu ya kañuꞌu,

vi ni tetniuu ya xtaa tikute kueli ndee andivi ja ni ka ojai vi ndee ni ka ondutu chii.

41 Te ni june ya yika kava, te ni jinonta in nuu kaꞌnu ndute,

ja ni jika de nuu ñuꞌu yichi, na kuinio in yute.

42 Chi ni ndakaꞌan ya tnoꞌo ii,

ja ni kaꞌan ya nuu Abraham, tee ni ojinokuechi nuu ya.

43 Saa ni kuu ja ni ndeneꞌe ia Dios ñayiu ñuu ja ni kaji ya,

te vi suaꞌa ka kanai ja ka kusii ini ni ndekuei.

44 Te ni jiñaꞌa ya ñundeꞌi ñayiu inka ñuu nuu ñayiu ñuu ya,

te ni ka saꞌa jajin ja ka jitu ñayiu inka ñuu yun,

45 nagua ja vi kuantnoꞌi tnoꞌo tatnuni ya,

te vi skunkui ley ya.

¡Kaꞌnu kuu Jitoꞌo!