106
Siun ni ka kusoꞌo ñayiu Israel nuu ia Dios
1 ¡Kaꞌnu kuu ia Dios!
Vi ndakuantaꞌu ni nuu ia Dios, chi ia guaꞌa kuu ya.
Te nikuii nikani kundaꞌu ini ña ya.
2 ¿Na in kuu kaꞌan na kuaꞌa naꞌnu tniuu saꞌa Jitoꞌo,
axi na in kuu kaꞌan na kuaꞌa kaꞌnu kuu maa ya?
3 Na taꞌu na ndetu ñayiu ka skunkuu tnoꞌo tatnuni ya,
te siun ni ka saꞌa ndai.
4 Ndakaꞌan ña ni jin san, vi Jitoꞌo, nuu kundaꞌu ini ni ñayiu ñuu ni,
kuꞌun ini ña ni jin san kiuu kii ni ja skaku niꞌnu ni ñayiu,
5 nagua ja kuni san ja vi jinkoo vaꞌa ñayiu ni kaji ni,
te na vi kokusii ini san jin ñayiu ñuu ni,
te na kokuu teyii san jin ñayiu ni saꞌa jajin maa ni.
6 Ni ka saꞌa san yika kuechi, inuu jin nagua ni ka osaꞌa ndi tata velu san,
ni ka saꞌa san jakueꞌe vi ni ka saꞌa san janeꞌe jayichi.
7 Chi tu ni ka tanuu ndi tata velu san tniuu vii tniuu vaꞌa ni saꞌa ia Dios nuu ni ka oi ñuu Egipto,
te tu ni ka ndakaꞌin ja kundaꞌu ini ndevaꞌa ña ya jin,
te ni ka ndakoi siki ya yatni yuꞌu ndute mar kuaꞌa.
8 Su ni skaku niꞌnu ña ya nagua ja na koo jayiñuꞌu nuu maa ya,
saa te ni xneꞌe ya jakaꞌnu ya.
9 Ni kuxeen ya nuu ndute mar kuaꞌa, te ni yichi de,
te ni ondeka ña ya ja ni ka yaꞌa ñayiu Israel ndee nuu kunu kaꞌa mar,
na kuinio ja ni ka yaꞌi in nuu ñuꞌu teꞌa.
10 Te ni skaku niꞌnu ña ya nuu ndaꞌa ñayiu ka kaꞌan uꞌu ña,
vi nuu ndaꞌa ñayiu ka skexiko ña.
11 Te ni ndachisaꞌu ña ndute yun jin ñayiu ka kaꞌan uꞌu ña yun,
te ni in tu ni kaku ja koteku.
12 Yun te saa ni ka kandija ñayiu Israel tnoꞌo ni kee yuꞌu ia Dios,
te ni ka jitai in yaa ja ni ka saꞌa kaꞌnui ya.
13 Su ñama kuiti ni ka ndunaa ini tniuu naꞌnu ni saꞌa ya,
te tu ni ka ondetui ja vi kuni tniuu kaꞌan ya ja saꞌa ya.
14 Te ni ka jioꞌo ndevaꞌa ndetnuni ñayiu Israel ja vi kai kuñu nuu ni ka oi nuu ñuꞌu teꞌa yun,
te ni ka jito tnuni ia Dios nuu tu na ñayiu ka oo.
15 Te ni jiñaꞌa ia Dios nagua ni ka jikain,
su suni ni tetniuu ya in kueꞌe xeen ndevaꞌa ja ni ka jiꞌi kuaꞌa ñayiu.
16 Te nuu ka oi nuu ka ndaa veꞌe saꞌuin yun,
ni ka kukuasun ini nuu Moisés vi nuu Aarón, tee ni saꞌa ii maa Jitoꞌo.
17 Yun te ni nune nuu ñuꞌu, te ni koko ña jin Datán vi ni ka jinkisaꞌu Abiram,
vi ñayiu ka ndikin ña jin de.
18 Te ni kandaꞌa ñuꞌu ja ni teñuꞌu ña jin ñayiu yun,
te ni teñuꞌu ña yaa ñuꞌu yun jin ndiꞌi ñayiu kueꞌe.
19 Te nuu ni ka oo de yuku Horeb, ni ka saꞌa de in chikeru, ni ka xtute de oro,
te ni ka saꞌa de in chuꞌchi, te ni ka chiñuꞌu ñayiu Israel.
20 Saa te ni ka xndendoi Dios, ia yeꞌe tajan,
te ni ka chiñuꞌi chuꞌchi ja kuu in isndiki jaa yuku.
21 Te ni ka ndunaa ini Dios, ia ni skaku niꞌnu ña jin,
ja ni saꞌa ya tniuu naꞌnu ñuu Egipto.
22 Vi ni saꞌa ya tniuu naꞌnu ñuu nuu ka oo ñayiu tatatnoꞌo Cam,
vi tniuu ja saꞌu kuii inio jin ndute mar kuaꞌa.
23 Te ni kuini ia Dios ja xnaa ña ya, su ni jinkuiin niꞌnu sagua Moisés, tee ni kaji ya,
te ni yaꞌa ini ya jin ja kiti ini ya, te tu ni xnaa ña ya.
24 Su ni ka skexiko ñayiu Israel ñuu vii ndevaꞌa yun,
te tu ni ka kandijai tnoꞌo ni kee yuꞌu ia Dios.
25 Chi saa suaꞌa ni ka kaꞌan kuechi siki ia Dios nuu ka oi nuu veꞌe saꞌuin,
te tu ni ka jantnoꞌi tnoꞌo ni tatnuni ya.
26 Yun te ni skaa ya ndaꞌa ya nuu ka oo ñayiu yun,
te ni kee yuꞌu ya ja vi kui nuu ñuꞌu teꞌa yun.
27 Te saꞌa ya ja junkuei ndikin tatai nuu ndaꞌa ñayiu sava ka ñuu ja ka kaꞌan uꞌu ña,
te katenuu ña ya ja kiꞌinkuei taka ñuu.
28 Yun te nuu kuee ka, te ni ka kiundui ja ni ka chiñuꞌi Baal-peor,
te ni ka jai ja ni ka soko nuu chuꞌchi ja masu teku.
29 Te ni ka skiti ini ia Dios jin jakueꞌe ndevaꞌa ka saꞌi yun,
te ni tetniuu ya in jakueꞌe siki.
30 Yun te ni ndakoo Finees, te ni saꞌa ndaa de,
te ni junkuiin jakueꞌe yun.
31 Te ni chikuenta ia Dios tniuu ndaa ja ni saꞌa de,
ja siun ni vi kondakaꞌan nikuii nikani.
32 Te suni ni ka skiti ini ia Dios yuꞌu ndute nuu nani Meriba,
te vi ja kuechi ñayiu yun, te ni kendoo kueꞌe Moisés nuu ia Dios.
33 Chi ni ka skiti ini ñai jin de, te ñama ni kaꞌan de,
te tu ni ndakani ini de na tnoꞌo ni kaꞌan de.
34 Te tu ni ka xnaa de ñayiu taka ñuu
nuu ni kaꞌan ia Dios ja vi xnaa de.
35 Chi saa suaꞌa ni ka saka tnaꞌa de jin ñayiu taka ñuu yun,
te ni ka kutuaꞌa de nagua ka saꞌa ñayiu yun.
36 Te ni ka chiñuꞌu ñayiu Israel taka chuꞌchi ñayiu yun,
te ja jaꞌa yun kuu ja ni ka kanakaui nuu tnundoꞌo.
37 Chi ni ka jaꞌni seyii vi sesiꞌi ja ni ka sokoi nuu ja ka kuu tachi yun.
38 Te ni ka jati niñi ñayiu tu na kuechi tavi,
niñi seyii vi niñi sesiꞌi ja ni ka sokoi nuu taka chuꞌchi ñayiu ñuu Canaán,
te ni kutneꞌe ñuu yun jin niñi ja ni ka jati yun.
39 Te ni ka kutneꞌe mai ja siun ni ka saꞌi,
chi tu ni ka okui ñayiu ndaa nuu ia Dios jin ndiꞌi jakueꞌe ka saꞌi yun.
40 Te ni kiti ini ndevaꞌa ia Dios nuu ñayiu ñuu ya,
te ni skexiko ya ñayiu ni saꞌa jajin ya.
41 Te ni xndendoo ña ya nuu ndaꞌa ñayiu sava ka ñuu,
te ñayiu ka skexiko ña, ni ka otatnuni nui.
42 Te ndevaꞌa ndetnuni ni ka osaꞌa ña ñayiu ka kaꞌan uꞌu ña jin,
vi ni ka otatnuni xeen ndevaꞌa.
43 Te kuaꞌa jichi ni skaku niꞌnu ña ia Dios,
su visi ni saa, te tu ni ka jantnoꞌi tnoꞌo ja ni xteku ña ya jin,
te ni ka tnaa niꞌnui mai nuu jakueꞌe ka saꞌi.
44 Su visi ni saa, te nuu ndiaꞌa ia Dios ja ka kusuchi ini,
vi nini ya ja ka kana ndaꞌui ja chituu ña ya,
45 te ni ndakaꞌan ya tratu ni saꞌa ya jin ñayiu yun,
te ja siun ndaꞌu ndevaꞌa ini ya, te ni ndasama ini ya ja ni tetniuu ya tnundoꞌo.
46 Te ni saꞌa ya ja suni ni ka kundaꞌu ini ña ñayiu ni ka jiso ña jin.
47 Skaku niꞌnu ña ni, vi Jitoꞌo, ja kuu ni ia Dios maa san,
te ndaxtutu ña ni neꞌu ñayiu sava ka ñuu,
nagua ja na vi ndakuantaꞌu san nuu ni,
te sii ini ndevaꞌa na vi saꞌa kaꞌnu ña san jin ni.
48 Na vi ndakuantaꞌuo nuu Jitoꞌo, ia Dios ñayiu Israel, ja oo ya nikuii nikani.
Te ndiꞌi ñayiu ñuu na vi kachi: “Saa na kokuu”.
¡Kaꞌnu kuu Jitoꞌo!