1 Oo yutnu anu san, ja kata san yaa nuu ni, vi Dios,

te kata san jin ndiꞌi san jin anu san yaa ja saꞌa kaꞌnu ña san jin ni.

2 Te ndoto ron ja kuu ron xtnuu kaxin ja oo uxi tuchi, vi arpa,

te na vi xtoto inka kiuu jaa.

3 Te saꞌa kaꞌnu ña san jin ni neꞌu ñayiu ñuu ni, vi Jitoꞌo,

te kata san yaa nuu ni neꞌu ñayiu ninii ñuyiu.

4 Chi kaꞌnu ndevaꞌa ka ja ndaꞌu ini ni saa andivi,

te tniuu ndaa ja saꞌa ni kenta ndee andivi.

5 Chi kaꞌnu ndevaꞌa kuu maa ni ndee ichi siki andivi, vi Dios,

te ja yeꞌe tajan ni kenta ninii ñuyiu,

6 nagua ja na vi kaku niꞌnu ñayiu kutoo maa ni.

Te konini ni joo tnoꞌo ka kaꞌan san, te skaku niꞌnu ña ni jin jakaꞌnu ni.

7 Te ni kachi ia Dios ndee veꞌe ii nuu oo ya:

“Kusii ini rin ja ni kundee rin, te kaꞌnde rin ñuꞌu Siquem

vi chikuaꞌa rin chikoꞌi Sucot ja kuñaꞌa rin vi koo ñayiu ñuu rin.

8 Chi kuenta maa rin kuu ñuu Galaad vi ñuu nuu ka oo ndikin tata Manasés,

te ndikin tata Efraín ka kuu na kuinio ixini kaa ja ñuꞌu xini rin,

te ndikin tata Judá ka kuu na kuinio yutnu nee rin ja tatnuni rin.

9 Te ñuu Moab kuu na kuinio in tijaꞌan nuu ndaꞌa rin,

te siki ñuu Edom skunta rin ndijan rin,

te kana sii ini rin ja ni kundee rin siki ñayiu filisteo.”

10 Su ni kachi san: “¿Na in kondeka ña jion ja kiꞌon nuu oo ñuu ja yikorra guaꞌa yun?

¿Vi na in kondeka ña jion kiꞌon ja kentao guaa ndee ñuu Edom?”

11 Tu na inka, chi maintnoꞌo ni maa ni, vi Dios, guaa junsiaꞌa ña ni,

maa ni, ja ni skexiko ña ni jin san,

te tu ka jaꞌan ni jin soldado san ja chituu ni de.

12 Chituu ña ni ja na vi kundee san siki ñayiu ka kaꞌan uꞌu ña jin san,

chi tu nagua jiniuꞌu ja vi chituu ña ñayiu ñuyiu jin san.

13 Chi jin maa ia Dios, te vi saꞌo tniuu naꞌnu,

te kuaꞌin niꞌnu maa ya ñayiu ka kaꞌan uꞌu ña jion.