1 Maa ni kuu Dios san, ia saꞌa kaꞌnu san.

Te nuu ndakuatu san nuu ni, ma kasi yuꞌu ni,

2 chi tee kueꞌe vi tee tnoꞌo ka kaꞌan kueꞌe siki san,

te chia inu tnoꞌo de ja ka xtavi kuechi ña de jin san.

3 Te ka jionduu ña de jin tnoꞌo kiti ini,

vi ka ndakoo de siki san, visi masu nagua saꞌa san.

4 Te visi kaꞌan too san jin de, su ka ndatniuyaꞌu kueꞌe de, chi ka kaꞌan kueꞌe de siki san,

su sein, chi ndakuatu san ja jaꞌa de.

5 Te nuu tniuu ja saꞌa san javaꞌa jin de, te ka ndatniuyaꞌu de jin jakueꞌe,

te sein, chi kaꞌan too san jin de; su maa de, chi ka skexiko ña de jin san.

6 Te kani ni in tee kueꞌe ja na ndakoo siki de,

te ichi ndaꞌa kuaꞌa de, na koo Tachi ja kokaꞌan kuechi ja jaꞌa de.

7 Te na tavi kuechi de nuu kiꞌin de ja kundaa ja jaꞌa de,

te tnoꞌo ja kaꞌan de nuu ndakuatu de na kokuu ja xtavi kuechi ña jin de.

8 Te joo ni kiuu na koteku de,

te inka ñayiu na nukonee tniuu ni onee de.

9 Te na vi kendoo ndaꞌu seꞌe de, vi na kendoo ndaꞌu ñasiꞌi de.

10 Te na vi kokaka ndaꞌu seꞌe de,

te na vi kokakain ja vi skutaꞌu ña ñayiu jin,

te ndee jika nuu kaa veꞌe tikundui, na vi ndukui ja vi kai.

11 Te na kikuei ñayiu ka ndita nuu de, te na vi kindei ndiꞌi ja nevaꞌa de,

te na vi suꞌu ñayiu inka ñuu ndiꞌi ja ni niꞌi de ja ni jinkonevaꞌa de.

12 Te ni in ñayiu ma vi kundaꞌu ini ña jin de,

te ni in, ma vi kaꞌan ndaꞌu seꞌe de ja ni ka ndondaꞌui.

13 Te na vi naa ndikin tata de, te na naa in jichi ni sivi de,

te ma vi kuni uun ka ña ñayiu vajikuei nuu kuee ka.

14 Te na ndakaꞌan Jitoꞌo jakueꞌe ni saꞌa tata de,

te ma xnaa ya yika kuechi ni saꞌa nana de.

15 Te siun ni na kondakaꞌan Jitoꞌo yika kuechi yun,

te na xnaa ña ya nuu ñuyiu yaꞌa, nagua ja ma vi kondakaꞌan ka ña ñayiu jin de.

16 Chi tu ni ndakaꞌan de ja kundaꞌu ini de ñayiu ka kundaꞌu,

vi ñayiu ka kusuchi ini vi ñayiu tu nagua ka nevaꞌa saꞌun,

chi saa suaꞌa ni sondikin ña de guaa ndee ni jaꞌni ña de.

17 Chi too de ja xtau tniaꞌa de ñayiu, te na nanakau tniaꞌa yun siki maa de.

Te ja siun tu ni kuini de ja kaꞌan vii kaꞌan vaꞌa de jin ñayiu,

te na kujioo javii javaꞌa ia Dios nuu oo de.

18 Te na kekuiꞌnu de tniaꞌa yun na kuinio saꞌun de,

te na kiundoꞌo nuu jiti de na kuinio ndute,

vi na kenta ndee nuu yiki de na kuinio ndute xeꞌen.

19 Te na kondii de tniaꞌa yun na kuinio in saꞌun,

te suni na koxtatnuu chii de na kuinio sinchu de.

20 Te yaꞌa na kokuu yaꞌu ja kuñaꞌa Jitoꞌo nuu ñayiu ka kaꞌan kuechi siki san,

vi nuu ñayiu ka kaꞌan kueꞌe ja jaꞌa san.

21 Su maa ni, vi Jitoꞌo, saꞌa ni javaꞌa jin san ja na koo jayiñuꞌu nuu ni.

Skaku niꞌnu ña ni jin ja ndaꞌu ndevaꞌa ini ni vi ja kutoo ña ni.

22 Chi tnaꞌu ini san, te tu saꞌun nagua nevaꞌa san,

vi kusuchi ndevaꞌa ini san.

23 Chi ndi joo ndi joo kuaꞌan san mayichi san, na kuinio kuandaꞌu ja kuaꞌan manaa,

te ka siuꞌu ña jin san na kuinio tika langosta.

24 Te vi suaꞌa ka kisi koꞌndo san ja mavikuita ja kuaꞌa jichi ondite san,

te vi saꞌun ni makuxii san, te tu oo ndakui ka san.

25 Te kuu san na ni kuinio in ja ka jaku ndee ñayiu,

te nuu ka ndiaꞌa ñai jin san, te ka skuiko xini ja ka saꞌa kuasun ñai.

26 Chituu ña ni, vi Jitoꞌo, ja kuu ni ia Dios maa san.

Skaku niꞌnu ña ni jin ja ndaꞌu ini maa ni.

27 Saa te na vi kuni ñayiu yun, ja jin ndaꞌa maa ni, vi Jitoꞌo san, kuu ja ni saꞌa ni yaꞌa.

28 Te tu ni ja saꞌi ja ka xtau tniaꞌa ña jin san, su saꞌa vii saꞌa vaꞌa ña maa ni jin san,

te nuu vi ndakoo de siki san, te vi kendoo kanoo maa de,

su maa san ja jinokuechi san nuu ni, chi kokusii ini san.

29 Te na vi kendoo kanoo maa tee ka kaꞌan kuechi siki san,

te na vi kakondii de ja kanoo yun na kuinio in saꞌun.

30 Te jin yuꞌu maa san ndakuantaꞌu san nuu Jitoꞌo,

te saꞌa kaꞌnu san ya neꞌu nuu ka oo kuakuaꞌa ñayiu.

31 Chi kaꞌan niꞌnu maa ya ja jaꞌa ñayiu ka kundaꞌu,

nagua ja skaku niꞌnu ña ya nuu ndaꞌa ñayiu ka xtavi kuechi ña.