1 Ja ni skuaꞌa guaguaꞌa ni naxa oo san, vi Dios,

te jini ni na ñayiu kuu san.

2 Ja jini maa ni nagua saꞌa san vi guaa ndee nuu nukoo san vi guaa ndee nuu ndakoo san.

Te visi jika oo ni, su jini ni nagua ndakani ini san.

3 Ja ni skuaꞌa guaguaꞌa maa ni, te jini ni a jika san axi ndatatu san,

chi jini ni ndiꞌi na ichi jika san.

4 Chi vi kuini ka ja kaꞌan san in tnoꞌo,

te ndiꞌi ja jini maa ni, vi Jitoꞌo san.

5 Chi vi ninii san ni jionduu ña ni,

te ni chisaꞌu guaꞌa ña ni jin ndaꞌa ni.

6 Te ja jini ni ja jaꞌa san kuu in ja saꞌu kuii ini maa san,

in jakaꞌnu ndevaꞌa, ja tu kenta san ja jinkuiꞌnu ini san.

7 ¿Ndenu kuu kiꞌin san ja kuu jika san nuu espíritu ni?

¿Axi ndenu kuu kiꞌin san ja kuu jika san nuu maa ni, vi Dios?

8 Chi visi na kaa san ndee andivi, te yun oo ni.

Axi visi na kee san ndee chii ñuꞌu nuu ka yiyuꞌu ndiyi,

te suni yun oo ni.

9 Chi visi na ndagua san kiꞌin san ichi nuu kana nikandii,

axi visi na koo san ndee inka jioo yuꞌu ndute mar nuu kee ya,

10 te ndee yun te kokoto ña ni jin san,

te kotnii guaꞌa ña ni jin ndaꞌa kuaꞌa ni.

11 Axi kachi san: “Na tayuꞌu nuo nuu ñunee,

axi na kunee nuu ñuꞌu yeꞌe ja ni jionduu ña jion

nagua ja na tayuꞌu ña”.

12 Su vi ni ñunee, ma kuu tayuꞌu ña jin san nuu maa ni.

Te jakuaa, chi yeꞌe na ni kuinio tnoꞌo nduu,

chi inuu ni kuu janee jin jayeꞌe nuu maa ni.

13 Chi maa ni ni saꞌa ndiꞌi jiti san,

te maa ni ni saꞌa ña jin san ndee chii siꞌi san.

14 Saꞌa kaꞌnu ña san jin ni, chi luu ndevaꞌa ni saꞌa ña ni,

te vi ni saꞌu kuii ini san tniuu saꞌa ni,

chi ja jini guaꞌa san ja luu ndevaꞌa saꞌa ni.

15 Chi tu ni oyuꞌu nuu maa ni naxa ni kuvaꞌa ndiꞌi yiki kuñu san,

visi oyuꞌu nuu ni kuvaꞌa san.

Te ni tniuu tnaꞌa ña ni ndee kunu kunu chii ñuꞌu, ja kuu chii siꞌi san.

16 Chi ni ondiaꞌa ni naxa ni kuvaꞌa san,

te ndiꞌi yun ni jinkoso nuu liuru ni.

Te ja ni chikuaꞌa ni nasaa kiuu koteku san,

visi chiaꞌan ka ja koo san ni in kiuu.

17 Nase luluu kuu nuu maa san tnoꞌo ja ndakani ini ni, vi Dios.

Te nase kuakuaꞌa tnoꞌo ndakani ini ni.

18 Chi nuu ja na kaꞌu san, te kuakuaꞌa ka kuu saa ñuti.

Te nuu ndoto san, te vi oo ni san jin ni.

19 Nuu ja suaꞌa te kuu, te kindee ni ja ka jichi ka kanda ñayiu kueꞌe, vi Dios,

te xtajioo ni ñayiu ka jaꞌni ndiyi nuu oo san.

20 Chi ka kaneꞌe ña ñayiu yun jin ni,

te ñayiu ka kaꞌan uꞌu ña,

chi ka jantniuu kueꞌi sivi ni.

21 Chi kaꞌan uꞌu san nuu ñayiu ka kaꞌan uꞌu ña jin ni, vi Jitoꞌo san,

te kiti ini san nuu ñayiu ka ndakoo siki ni.

22 Chi kaꞌan uꞌu san nui jin ndee ini ndee anu san,

te kaꞌan san ja ka kui na ni kuinio ñayiu ka nee uꞌu tnaꞌa jin san.

23 Skuaꞌa guaguaꞌa ni naxa oo san, vi Dios,

te kuni ni naxa oo anu san.

Koto tnuni ña ni, te kuni ni nagua ndakani ini san.

24 Saa te kuni ni a jika san nuu ichi kueꞌe,

te kondeka ña ni ja na kaka san nuu ichi oo nikuii nikani.