1 Skaku niꞌnu ña ni nuu ndaꞌa ñayiu kueꞌe, vi Jitoꞌo san,

te koto kuni ña ni jin san nuu ñayiu inu yachi ndevaꞌa ini.

2 Chi ninoꞌo ni jakueꞌe ka ndakani ini ja vi saꞌi,

te ndiꞌi ni kiuu ka skaxin tnaꞌi ñayiu.

3 Te tnoꞌo ka kaꞌin kuu na kuinio yaa ndugua in koo,

te ñuꞌu chitu texeen koo yun nuu yuꞌi.

4 Koto kuni ña ni jin san, vi Jitoꞌo, nuu ndaꞌa ñayiu ka saꞌa jakueꞌe,

te skaku niꞌnu ña ni nuu ndaꞌa ñayiu inu yachi ndevaꞌa ini,

ja ka kuini ja vi skanakau ñai jin san.

5 Chi ni ka jakin yuꞌu ñayiu inu teyii ndevaꞌa yun in xeyu

vi yoꞌo kuiñi nuu ichi jika san, ja vi kakuiko ñai jin san.

6 Te jiñaꞌa san nuu Jitoꞌo: “Maa ni kuu ia Dios san,

te tanundaꞌa ni, konini ni joo tnoꞌo kaꞌan san nuu jikantaꞌu san nuu ni.

7 Jitoꞌo, maa ni kuu ia Dios san, ia ndakui ja skaku niꞌnu ña ni jin san.

Maa ni kuu na kuinio in ixini kaa ja yisaꞌu ni xini san, kiuu ja ka jaxin tnaꞌa san.

8 ’Ma kuandetu ni ja vi niꞌi ñayiu kueꞌe yun nagua ka ndioo ini mai, vi Jitoꞌo,

te ni ma kuandetu ni ja vi saꞌi nagua ka ndakani ini, nagua ja ma vi kokuu teyii.

9 Te saꞌa ni ja na nanakau jakueꞌe ni ka kaꞌan maa ñayiu ka jionduu ña jin san siki mai,

te na vi ndaniꞌi vi ndatnaꞌa mai,

10 te na junkuei ñuꞌu tikayi ja kai koko koko siki mai.

Te tnaa ni jin nuu ñuꞌu, in nuu jitnu kunu ndevaꞌa, nagua ja ma nanakuei saꞌun kai.

11 Te ma vi koo ka ñayiu ka kaꞌan tnoꞌo kueꞌe nuu ñuyiu yaꞌa,

te na kenta jakueꞌe siki ñayiu inu yachi ndevaꞌa ini, te na xnaa ña jin.

12 ’Chi jini san ja saꞌa ndaa Jitoꞌo ja jaꞌa ñayiu ka kundaꞌu,

te kuiin niꞌnu kuiin sagua ya ja jaꞌa ñayiu ka kusuchi ini.

13 Chi ndija ja vi saꞌa kaꞌnu ñayiu ndaa sivi ni,

te vi koo ñayiu ka saꞌa guaꞌa nuu ndiaꞌa maa ni, vi Dios.”