1 Nuu maa ni kana ndaꞌu san, vi Jitoꞌo. Neꞌe ñama ni, te chituu ña ni jin san.

Konini ni joo tnoꞌo kaꞌan san nuu jikantaꞌu san nuu ni.

2 Te na kenta tnoꞌo ja ndakuatu san guaa ndee nuu ni,

na kuinio in xiko asin nuu kai suja vixin.

Te ja kaneꞌe san ndaꞌa san ichi nuu oo maa ni,

kuu na kuinio in kiti ja soko san nuu ni ore mañini.

3 Koto ni yuꞌu san, vi Jitoꞌo, nagua ja ma kaꞌan san tnoꞌo kueꞌe.

4 Te ma kuandetu ni ja ndakani ini san saꞌa san in jakueꞌe,

ni ma kuandetu ni ja saꞌa san jakueꞌe, nagua ka saꞌa ñayiu ka saꞌa janeꞌe jayichi,

te ni ja kaa san ndei ka jaa ñayiu kueꞌe yun nuu ka saꞌi viko.

5 In javaꞌa kuu nuu maa san, nuu ja in ñayiu ndaa na kani ñai jin san,

te tnoꞌo ja ka kuxeen nuu san kuu na kuinio in tatna xiko ja ka chiꞌi xini san.

Su siun ni kondakuatu san siki ja ka saꞌa ñayiu kueꞌe yun.

6 Te nuu junkuei tee ka tatnuni nuu ñayiu ka saꞌa jakueꞌe yun in yuꞌu kava,

saa te vi kuni ja tnoꞌo ndaa kuu tnoꞌo kaꞌan san.

7 Te na kuinio ja junkuiin jichi nuu ñuꞌu ja ka jani yukun,

saa vi kutenuu yiki ñayiu kueꞌe yun yuꞌu yau ñaña.

8 Nuu maa ni yinuu guaꞌa san, vi Jitoꞌo san,

chi kukanu ini ña san jin ni, te ma kuandetu ni ja vi kaꞌni ña jin san.

9 Te koto kuni ña ni jin san, nagua ja ma kanakau san nuu xeyu vi nuu ñunu

ja ka jakin ñayiu ka saꞌa jakueꞌe, ja vi kakuiko ña jin san.

10 Te na vi nanakau maa ñayiu ka saꞌa jakueꞌe nuu ñunu ja ka jakin yun.

Su sein, chi na yaꞌa jioo ni san, kiꞌin san.