1 Yun te ni xneꞌe ia jinokuechi nuu Dios in yute ja oo vii ndevaꞌa, te ndute yun taa ja kotekuo. Te ndute yeyeꞌe kuu de, na kuinio vidrio, te ni kee de nuu oo mesa nuu tatnuni maa ia Dios jin ia kuu Lelu ya. 2 Te jika ndute yun maꞌñu sagua kayi kaꞌnu maa ñuu yun, te nduu jioo yuꞌu yute yun, ka nukuiin yutnu kuii ja taa ja kotekuo. Te kuun kiti vixin tnu uxi uu jichi ja kuia, chi nuu yoo nuu yoo kuun kiti vixin tnu. Te ndaꞌa yuku tnu yun kuu tatna ja ka nduvaꞌa ñayiu taka ñuu. 3 Te ma koo ka nagua ni xtau tniaꞌa ia Dios ñuu yun. Te maa ini ñuu yun koo mesa nuu tatnuni ya jin ia kuu Lelu ya. Te yun vi koo ñayiu ka jinokuechi nuu ya vi kochiñuꞌu ñai jin ya. 4 Te vi kuni yunuu ya, te tnei vi kondisoi sivi ya. 5 Te ma koo ka jakuaa ñuu yun, te ma vi kojiniuꞌu ka ñayiu vi koo yun ñuꞌu ja koyeꞌe nui, ni ndaꞌa nikandii ja koyeꞌe, chi maa Jitoꞌo Dios kosieꞌe, te vi kotatnuni nikuii nikani.

6 Yun te kachi ia jinokuechi nuu Dios:

―Tnoꞌo ja ni jini ron yaꞌa, chi tnoꞌo ndaa ja kukanu ini ron kuu. Te maa Jitoꞌo Dios ja ni jiñaꞌa ya Espíritu ya nuu tee ni ka ndakani tnoꞌo ya, kuu ia ni tetniuu ia ka jinokuechi nuu ya, nagua ja vi xneꞌe nuu ñayiu ka jinokuechi nuu maa ya nagua kuu ja oo yatni ja kokuu ―kachi ya.

7 Te kachi Jesús:

―Vi kinuu guaꞌa, chi ñama ndii rin, te na taꞌu na ndetu ñayiu tavaꞌa tnoꞌo ia Dios ja yoso nuu liuru yaꞌa ja kaxtnoꞌo nagua kokuu ―kachi ya.

8 Te maa san kuu Juan ja ni jini san vi ni onini san taka tnoꞌo yaꞌa. Te nuu ni ndiꞌi ni jini san vi ni onini san, te jinkuiin jiti san nuu jaꞌa ia jinokuechi nuu Dios ja xneꞌe taka tniuu yun nuu san ja chiñuꞌu san ya nuu siun. 9 Su yun te kachi ya:

―Ma saꞌa ron siun, chi suni jinokuechi rin nuu ia Dios, nagua ka jinokuechi maa ron jin ñani ron ja ka ndakani ron tnoꞌo ia Dios, vi ndiꞌi ñayiu ka tavaꞌa tnoꞌo ya ja yoso nuu liuru yaꞌa. Te maintnoꞌo maa ia Dios guaa chiñuꞌu ron ―kachi ya.

10 Te suni kachi ka ya:

―Ma tayuꞌu ron tnoꞌo ia Dios ja yoso nuu liuru yaꞌa ja kaxtnoꞌo nagua kokuu, chi ja oo yatni tiempu ja skunkuu. 11 Te ma kondiꞌni ron nagua ka saꞌa ñayiu, chi na ñayiu saꞌa jakueꞌe, te na kosaꞌa mai jakueꞌe yun. Te na ñayiu oo tneꞌe anu, te na kosaꞌa tneꞌe ka mai anui. Su na ñayiu saꞌa ndaa, te na kosaꞌa mai tniuu ndaa. Te ñayiu oo vii anui nuu ia Dios, te na kondasavii kai mai ―kachi ya.

12 Yun te kachi Jesús:

―Vi kinuu guaꞌa, chi ñama ndii rin, te kindaꞌa rin ja vi kutaꞌu in in ñayiu, nakuu nakuu na tniuu ni ka saꞌi. 13 Te maa rin kuu jaxtnañuꞌu vi jasandiꞌi, ja ni skejaꞌa vi jaxndiꞌi, nuu jinkondee vi nuu skundiꞌi ―kachi ya.

14 Te na taꞌu na ndetu ñayiu ka ndakate saꞌuin ja vi koo vii nuu yika kuechi, chi vi niꞌi kiti vixin kuun yutnu taa ja kotekuo ja vi kai, te kuu kiukuei yeꞌe ja vi koi ñuu yun. 15 Su ichi yeꞌe vi kendoo ñayiu ka saꞌa jakueꞌe ja ka kuu na kuinio tiꞌina, vi ñayiu tasi, vi ñayiu ka saꞌa kuechi ñuyiu jin inka ñayiu, vi ñayiu jaꞌni ndiyi, vi ñayiu chiñuꞌu chuꞌchi, vi ñayiu too ja xndaꞌui inka ñayiu.

16 Maa rin kuu Jesús, te ni tetniuu rin ia jinokuechi nuu rin nagua ja ndakani ya ndiꞌi tnoꞌo yaꞌa nuu ñayiu ka skuaꞌa. Te maa rin kuu yoꞌo ja kuu ndikin tata rey David. Maa rin kuu kimi ndii ja yeꞌe vivii tnoꞌo neꞌe. 17 Te Espíritu ia Dios vi ñayiu maa ya ka kui na kuinio suchi siꞌi ja vi tnandaꞌa jin Lelu ya ka kachi:

―Neꞌe ni.

Te na ñayiu nini tnoꞌo yaꞌa na kaꞌin:

―Neꞌe ni.

Te na ñayiu yichi, te kuini ja koꞌi ndute, na kiꞌin nuu ya, te suaꞌa ni niꞌi uin ndute koꞌi, te kotekui nikuii nikani.

18 Te ndiꞌi ñayiu ka nini tnoꞌo ia Dios ja yoso nuu liuru yaꞌa ja kaxtnoꞌo nagua kokuu, chindetu san jin, ja nuu ja ndee ñayiu ndasonee ka in uu tnoꞌo saa nagua yoso nuu liuru yaꞌa, te konaꞌi ja suni saa ndasonee ka ia Dios tnundoꞌo tnaꞌi saa nagua yoso nuu liuru yaꞌa. 19 Te nuu ja ndee ñayiu kindee in uu tnoꞌo ja yoso nuu liuru yaꞌa ja kaxtnoꞌo nagua kokuu, te suni saa ni ndakindee ia Dios kiti vixin kuun nuu yutnu taa ja kotekuo ja ma kuu vi kai, te ma kuandetu ya ja kiukuei ñuu ii, nagua yoso nuu liuru yaꞌa.

20 Te ia ndakani ndaa tnoꞌo yaꞌa kachi:

―Ja ndaa ndija ja ñama ndii rin.

Saa na kokuu. Neꞌe ni, vi Jitoꞌo san Jesús.

21 Te maa Jitoꞌo Jesukristu na koto na kuni ña ya jin ndiꞌi ni. Saa na kokuu.