9
Tetniuu ia Dios tnundoꞌo siki ñayiu ka kaꞌan uꞌu ña jin ñayiu Israel
1 Yaꞌa kuu tnoꞌo Jitoꞌo Dios ja ni kaꞌan ya ja oo ya siki ñuu Hadrac vi siki ñuu Damasco. Chi kuini ja vi kinuu guaꞌa ndiꞌi ñayiu nuu Jitoꞌo Dios, te saa ni ndiꞌi tatatnoꞌo Israel na vi kinuu nuu ya. 2 Te suni saa ni ñuu Hamat, ñuu ja netnaꞌa yatni jin ñuu Hadrac, vi suni ñuu Tiro vi ñuu Sidón, na vi kinuu guaꞌa nuu ya, visi ñayiu ndichi ka kuu ñayiu ñuu yun. 3 Ñayiu ñuu Tiro ni ka saꞌi in muro, te ni ka jiondui ja ndesi guaꞌa ñui, te yun ni ka tatutui plata na kuinio ñuyaka, vi oro na kuinio ndeꞌi ja oo nuu ichi. 4 Su vitna te ndakindee ndiꞌi Jitoꞌo Dios, te xnaa ya ndiꞌi barco ka jantniui ja ni ka nduu kuikai, te kai ndiꞌi ñui.
5 Te nuu vi kuni ñayiu ñuu Ascalón, te vi yuꞌu ndevaꞌi. Te suni ñayiu ñuu Gaza, chi vi tnaꞌa ndevaꞌi tnundoꞌo, te saa ni ñayiu ñuu Ecrón, chi tu nagua vi kuun ini kai. Te naa rey ñayiu ñuu Gaza, te tu ka na ñayiu vi koo ñuu Ascalón. 6 Te ñayiu inka ñuu vi koo ñuu Asdod, te kachi ia Dios: “Xnaa rin tnoꞌo teyii ñayiu filisteo. 7 Te kindee rin ja ma vi kokaa kai kuñu jin niñi, te ma kuandetu ka rin ja vi kokai ndei ja oo ii ja vi kai. Su nuu ñayiu filisteo yun xndendoo rin sava ka ñayiu ja vi koi nuu maa rin, te vi kokui na kuinio tatatnoꞌo maa ñayiu Judá. Te ñayiu ñuu Ecrón vi kokui ñayiu maa rin, na kuinio ñayiu jebuseo. 8 Yun te kokoto maa rin ñayiu ñuu rin, nagua ja ni in ñayiu kaꞌan uꞌu ña ma kiui, te ni ma ndee, te ni in ka ñayiu saꞌa ndevaꞌa ña, ma koo ka, chi vitna te koo maa rin kokoto rin jin”, kachi ya.
Vaji rey yoso de in mentu luluu
9 Vi kokuu sii ini ndevaꞌa ron, ñayiu Sión,
te vi kana jaa ron ñayiu Jerusalén ja ka kusii ini ron.
Vi kondiaꞌa ja vaji tee kuu rey ron nuu ka oo ron,
te kuu de in tee ndaa, in tee kundee, te saꞌa ndaꞌu de maa de.
Yoso de in mentu, in mentu luluu, seꞌe mentu siꞌi kiti jiso.
10 Te xnaa de carreta ñayiu Efraín, vi kuai ñayiu Jerusalén,
vi kaꞌnu de kuji ja ka jaxin tnaꞌa jin ñayiu,
te kaꞌan de ja na vi koo mani ñayiu,
te kotatnuni de ndee nuu jinkituu yuꞌu ndute mar in lado jin ndee nuu jinkituu ndute mar inka lado,
ndee yute Éufrates vi guaa ndee jaꞌa ñuyiu.
Skaku niꞌnu ia Dios ñayiu Israel
11 Te ja jaꞌa maa ron, chi jin niñi ja ni saꞌa rin tratu jin ron,
te skaku niꞌnu rin ndikin tata ron nuu inka ñuu
nuu kuu na kuinio yau ñuꞌu ja tu na ndute ñuꞌu,
ja kuu in vekaa nuu ka ndesi.
12 Te roon ja ka ndesi ron vekaa,
ja ka ndetu kaꞌnu ña ron,
vi ndajiokuiin kuanoꞌokuei ñuu ron nuu tavaꞌa guaꞌa ña.
Te suni kaꞌan rin vitna ja viꞌi ka javii javaꞌa saꞌa ña rin
saa nagua tnundoꞌo ni ka tnaꞌa ron.
13 Chi skaa rin Judá na kuinio kuji rin,
te ni saꞌa rin Efraín na kuinio yutnu ndugua rin.
Chi kuantniuu rin seꞌe ron ñuu Sión ja vi ndakoi siki seꞌe ñuu Grecia,
te saꞌa rin ja vi kokuu ron na kuinio yuchi kani ja vi kaxin tnaꞌa ron.
14 Yun te xneꞌe Jitoꞌo Dios ja maa ya kuu nuu ñayiu maa ya,
te skunta ya yutnu ndugua ya na kuinio nuu kuun tajan,
te tiuu maa Jitoꞌo Dios trompeta ya,
te kii ya nuu yiꞌi in tikacha ja vaji ichi sur.
15 Te kokoto maa Jitoꞌo Dios jin ñayiu maa ya.
Te vi kuain niꞌnui yuu ja ka kani ña jin yuu yoꞌo yuu,
te vi xnai ndiꞌi ñayiu ka kaꞌan uꞌu ña jin,
te na kuinio ja vi koꞌo ndevaꞌi niñi, te vi kuvai na kuinio nuu ka jiꞌi vinu,
guaa ndee vi chitu chii na kuinio in vasu ja ñuꞌu chitu niñi kiti,
axi na kuinio skina altar ja chitu jin niñi kiti ja ka soko.
16 Te skaku niꞌnu ia Dios ñayiu ñuu maa ya kiuu yun na kuinio jin in taju ndikachi,
te vi koyeꞌe niꞌnui nuu maa ya na kuinio yuu yeyeꞌe ja ka ndetuu yika corona.
17 Te nase guaꞌa vi nase luluu vi koo ndiꞌi ñayiu yun,
chi triu kuñaꞌa jandakui suchi yii kuechi,
te vinu kuñaꞌa ja vi kokusii ini suchi siꞌi kuechi.