1 Vi kakan ni nuu Jitoꞌo Dios ja na skuun ya sau kuee,

chi maa ya tetniuu tajan vi skuun ya sau guaꞌa,

nagua ja na nana yuku kuii nuu ñundeꞌi in in ni.

2 Chi nuu ka jikan tnoꞌo nuu chuꞌchi, te ninoꞌo ni tnoꞌo tnoꞌo ka kaꞌan,

te ñayiu ka jitotnuni, chi ninoꞌo ni ja tu jiniuꞌu ka jani,

te ñayiu ka kaꞌan naxa kei jani yun, chi ka kaꞌin ja jani vaꞌa kuu,

te maa ni ja ka xndaꞌu ñai.

Te yun guaa yaꞌa yun ni ka jika ñayiu ñuu ia Dios na kuinio ndikachi,

te ka tnaꞌi tnundoꞌo, chi tu na in jito ña jin.

3 Te yun guaa kachi Jitoꞌo:

Ni kiti ini rin siki tee ka jito ña jin ñayiu yun,

te tetniuu rin tnundoꞌo vi tnaꞌa tee ka tatnuni yun,

chi jandaa ndija ja maa rin kuu Jitoꞌo Dios, ia ndakui ndevaꞌa,

ja jito rin ñayiu Judá ja ka kui na kunio ndikachi rin,

te saꞌa rin jin ja na koo jayiñuꞌu nui

na kuinio kuai ja ni kundee ti nuu ni ka jaxin tnaꞌa.

4 Te neꞌu maa ñayiu Judá kee in tee ja kuu na kuinio kava kaꞌnu ja kituu skina veꞌe,

vi nduyu ja kotnii veꞌe saꞌun, vi kuji ja kokaxin tnaꞌa,

vi neꞌu maa ñayiu yun kekuei ndiꞌi tee vi kotatnuni.

5 Te maa ñayiu yun vi kokuu tee ndakui,

ja vi kokuain niꞌnu de siki tee ka jaxin tnaꞌa jin de nuu ndeꞌi ja oo ichi yun,

te vi kaxin tnaꞌa de, chi oo maa rin ja kuu rin Dios jin de,

te vi kuñaꞌa de jakanoo nuu tee ka yoso kuai.

6 Chi kuñaꞌa rin jandakui nuu ndikin tata Judá,

te skaku niꞌnu rin ndikin tata José,

te saꞌa rin ja vi ndajiokuiin ñui, chi kundaꞌu ini rin jin,

te vi koi na kuinio ja tu na ama skexiko rin jin,

chi maa rin kuu Dios mai,

te konini rin tnoꞌo ka kaꞌin nuu ka ndakuatui.

7 Te ndikin tata Efraín vi koo ndakui na kuinio tee jaxin tnaꞌa,

te vi kokuu sii ini, na kuinio tee jiꞌi vinu.

Te nuu vi kuni seꞌe de ja siun ni kuu, te suni vi kusii ini,

chi vi kosii ini nuu maa Jitoꞌo Dios.

8 Te suaꞌa ni tutu rin jin nuu ndakana rin,

te vi ndututui nuu ndatau rin jin,

te vi ndakaya vii ndevaꞌi, nagua ni ka oi ama ka.

9 Visi ni jatenuu rin jin nuu sava ka ñuu,

su ndee ñuu jika yun vi ndakaꞌan ñai jin rin,

te visi yun ka oi jin seꞌi,

su koo in kiuu, te vi ndajiokuiin ñui.

10 Chi saꞌa rin ja vi ndajiokuiin ndee ñuu Egipto

vi nukuaka rin jin ndee ñuu Asiria,

te nusiaꞌa rin jin ja vi koi nuu ñuꞌu Galaad vi nuu ñuꞌu Líbano,

te vi ni ma kenta ñuꞌu yun ja vi koi.

11 Te vi tnaꞌi kuakuaꞌa tnundoꞌo nuu vi ndayaꞌi nuu ndute mar,

te tatnuni rin nuu ola ndute yun ja na jinkuiin,

te yichi ndiꞌi ndute yute Nilo,

te xnaa rin ndiꞌi tnoꞌo teyii ñayiu Asiria,

te skiꞌin Egipto jandakui.

12 Te saꞌa rin ja vi koo ndakui ñayiu maa rin,

te vi kondikin ñai jin rin, kachi Jitoꞌo Dios.