9
1 Yamaan naxan sigan tima dimini,
ne bata kɛnɛn gbeen to.
Naxanye dɔxi dimi gbeeni,
kɛnɛnna bata mini ne ma!
2 Ala i bata yamaan nawuya ayi,
i yi e sɛwan nagbo ayi.
E sɛwaxi i yɛtagi
alo muxune nɛma sɛwɛ se xaba waxatini,
alo e ɲaxanma kii naxan yi
e nɛma yɛngɛ yi se tongoxine yitaxunɲɛ.
3 Amasɔtɔ i ya yamaan tɔrɔma goron tongo wudin naxan bun
e nun wure gbelemɛn naxan saxi e tungunna ma
e nun e ɲaxankata muxune bosana,
i bata ne birin kala
alo i a liga kii naxan yi
Midiyane nɔ lɔxɔni.* Midiyane nɔ feen mɔn sɛbɛxi Kitisane 6 han 8 kui.
4 Yaxune sankidin naxanye
birin yɛngɛ yirene yibodonma
e nun dugin naxanye birin bata sin wunli
ne birin ganma nɛn
alo yegen tɛɛni.
5 Amasɔtɔ diina nde bata bari en xa,
dii xɛmɛn bata sɔtɔ en xa.
Mangayaan luma nɛn a tan xa.
A xili bama nɛn a,
“Kabanako Kawandi Tiina,
Ala Sɛnbɛmana,
Habadan Fafe,
Bɔɲɛ Xunbeli Mangana.”
6 A mangayaan nun bɔɲɛ xunbenla
sigama gboɛ ayi nɛn
dan mi naxan na.
A dɔxɔma nɛn Dawuda mangaya gbɛdɛni
a yamanan xun na.
A yi a sɛnbɛ so,
a yi a masuxu kiti kɛndɛn nun tinxinni,
keli to ma han habadan.
Alatala Sɛnbɛn Birin Kanna na ligama a xanuntenya gbeen nin.
Alaa xɔlɔna fe
7 Marigin bata falan ti Yaxuba bɔnsɔnna xili ma,
na yi Isirayila yamaan sɔtɔ.
8 Yamaan birin a kolonma nɛn.
Efirami bɔnsɔnna muxune nun Samari kaane birin yi falan tima wason nun yɛtɛ yigboni, e naxa,
9 “Yinna bitikidine bata bira,† Bitikidin mɔn falama yirena nde yi fa fala “Birikidina.”
en na a ti gɛmɛ masolixine ra.
Xɔdɛ binle bata kala,
en na e masara sumanne ra.”
10 Nayi, Alatala Asiriya kaane radinma nɛn Isirayila kaane ma, Manga Resin‡ Arami kaane mangan nan Resin na. Asiriya kaane nan Manga Resin yaxune ra. Na feen sɛbɛxi Mangane Firinden 16.8-9 kui. yɛngɛfane.
A bata e yaxune sɛnbɛ so.
11 Arami kaan naxanye sogeteden binni,
e nun Filisiti kaan naxanye sogegododen binni,
ne nan Isirayila kaane raxɔrima feu!
Koni hali na birin,
Alaa xɔlɔn mi ɲan,
a yiin mɔn yi lu yitexi e xili ma.
12 Nayi, Alatala bata a yamaan ɲaxankata,
koni e mi e xun xɛtɛxi a ma,
e mɔn mi Alatala Sɛnbɛn Birin Kanna fenxi.
13 Nayi, Alatala Isirayila yamanan birin naxɔrima nɛn
lɔxɔ keden peeni,
fɔlɔ a xunna ma han a xunla,
fɔlɔ tugu binle ma han gbalane.
14 Fonne nun kuntigine nan a xunna ra,
nabiin naxanye wule xaranna tima,
ne nan a xunla ra.
15 Yamani ito yɛɛratine nan e ralɔma ayi,
e muxun naxanye matinxinma,
ne fan yifuxi.
16 Nanara, Marigin mi sɛwaxi a foningene ra,
a mi kininkininma a kiridine nun a kaɲa gilɛne ma.
Amasɔtɔ Ala kolontarene nun
muxu ɲaxine nan e birin na,
e fala ɲaxin nan tun tima.
Koni hali na birin,
Alaa xɔlɔn mi ɲan,
a yiin mɔn yi lu yitexi e xili ma.
17 Ɲaxuyaan muxune ganma yati,
alo tɛɛn naxan ɲanle nun sɛxɛne birin ɲanma,
a yi tɛɛn so fɔtɔnna ɲansanne ra,
e tutin yi lu tɛ kore.
18 Alatala Sɛnbɛn Birin Kanna xɔlɔ gbeen
bata tɛɛn so yamanan birin na.
A luxi nɛn
alo tɛɛn yamaan nan ganma,
muxu yo mi kininkininma a ngaxakedenna ma.
19 Muxune donseen tongoma yiifanna ma,
kamɛn mi ba e ma.
E yi e balon fen e kɔmɛnna ma,
e mi wasa.
Birin baloma a lanfaan nan na.
20 Manase bɔnsɔnna baloma Efirami bɔnsɔnna ra,
Efirami bɔnsɔnna baloma Manase bɔnsɔnna ra,
e tan bɔnsɔn firinne yi keli Yuda bɔnsɔnna xili ma.
Koni hali na birin,
Alaa xɔlɔn mi ɲan,
a yiin mɔn yi lu yitexi e xili ma.