10
Gbalon Yuda taane xili ma
1 Gbalon na kanne xa
naxanye tɔnne dɔxɔma hakɛni,
naxanye sariyane sɛbɛma bodene tɔrɔ xinla ma,
2 e tondi sɛnbɛtarene xun mayɛngɛ kitin sɛ.
Yiigelitɔɔn naxanye n ma yamaan yɛ,
e mi ne kitin sama.
E kaɲa gilɛne kansunma,
e kiridine muɲa.
3 Ɛ fe saranna na ɛ sɔtɔ lɔxɔ naxan yi,
gbalon na fa sa keli wulani,
ɛ nanse ligama?
Ɛ ɛ gima siga nde kon yi
alogo ɛ xa maliin sɔtɔ?
Ɛ nafunle luma minɛn?
4 Fɔ ɛ mafelen kasorasane tagi,
hanma ɛ bira bɔxɔni binbine yɛ.
Koni hali na birin,
Alaa xɔlɔn mi ɲan,
a yiin mɔn yi lu yitexi e xili ma.
Gbalona Asiriya kaane xili ma
5 Ala naxa,
“Gbalona Asiriya yamanan xa,
naxan findixi bosaan na n yii n ma xɔlɔna fe ra!
N ma fitinan dunganna a tan nan yii.
6 N na a sofane rasigama nɛn
Ala kolontare siyaan xili ma.
N yi e radin yamaan xili ma
naxanye n naxɔlɔma
e xa sa mɛn kaane yii seene suxu,
e yi e nafunle tongo,
e yi e yibodon
alo borona kiraan xɔn!
7 Koni Asiriya kaane mi na feen to na kiini.
E tan e miri na fe ma kii gbɛtɛni.
E tan yi waxi halagi nan tun ti feni,
e yi siya wuyaxine raxɔri fefe!
8 Amasɔtɔ e naxa,
‘N ma sofa kuntigine mi findixi mangane xan na ba?
9 N mi Kalano taan suxi
alo Karakemisi taan ba?
N mi Xamata taan ligaxi
alo Arapada taan ba?
N mi Samari taan ligaxi
alo Damasi taan ba?* Asiriya kaane bata yi taani itoe suxu. E sɛbɛ kiina a yitaxi, a e luma e masoɛ Yerusalɛn taan nan na.
10 N bata suxure batu yamanani itoe suxu,
naxanye suxurene yi fisa Yerusalɛn
nun Samari yamanan gbeene xa.
11 N naxan liga Samari yamanan nun a suxurene ra,
n mi nɔɛ na ligɛ Yerusalɛn nun a suxurene ra ba?’ ”
12 Koni Marigin na yelin a wanle birin nakamalɛ Siyon geyaan fari e nun Yerusalɛn yi, a Asiriya mangan fan saranma nɛn a yɛtɛ yiteen nun a yɛɛ rawason na. 13 Amasɔtɔ na mangan yi a falama nɛn, a naxa,
“N feni itoe birin ligaxi
n fangan nun n ma fe kolonna nin,
amasɔtɔ xaxilimaan nan n na.
N bata yamanane danne kala,
n yi e nafunle muɲa,
n mangane ba e dɔxɔdene yi
alo sɛnbɛmaan yɛtɛna.
14 N bata siyane nafunle tongo
alo muxun xɔli tɛɛn tongon kii naxan yi.
N bata bɔxɔ xɔnna seene birin malan
alo muxun xɔli xɛlɛ rabeɲinxine matongon kii naxan yi.
E sese mi nɔxi e gabutɛni tɛ,
hanma e dɛ xanli bi, e wuga.”
15 Bunbin nɔɛ a yɛtɛ matɔxɛ
dangu a rawali muxun na ba?
Sɛrana a yɛtɛ matɔxɛ
dangu a rawali muxun na ba?
Bosaan nɔɛ a tongo muxun nawalɛ ba?
Dunganna nɔɛ muxun tongɛ ba?
16 Nanara, Marigina Alatala Sɛnbɛn Birin Kanna
yama hiyabuxini ito radoyenma nɛn.
Halagi ti tɛɛ gbeen yi so e binyen na.
17 Isirayilaa kɛnɛnna,
Ala yɛtɛɛn findima nɛn tɛɛn na.
E sariɲantɔɔn yi findi tɛɛ dɛgɛn na,
a Asiriya yamanan ɲanle
nun a sɛxɛne birin gan,
e ɲan lɔxɔ kedenni.
18 A fɔtɔn gbeene raxɔrima nɛn fefe
e nun wudin naxanye birin bogima.
A yamanan halagi
alo furemaan nɛma doyenɲɛ.
19 Wudi dɔnxɛn naxanye na lu Asiriya fɔtɔnne yi
hali dii ɲɔrɛna,
a nɔɛ e yatɛn sɛbɛ nɛn.
Yamaan muxu dɔnxɛne fe
20 Na lɔxɔni, Isirayila yamaan muxu dɔnxɛn naxanye na lu e nii ra Yaxuba bɔnsɔnni, ne mi fa e lannantenyaan sama e ɲaxankata muxune yi sɔnɔn. E fa e lannayaan sama Alatala nin, Isirayilaa Ala Sariɲanxina. 21 Yamaan muxu dɔnxɛne xɛtɛma nɛn Ala sɛnbɛmaan ma, Yaxuba bɔnsɔnna muxu dɔnxɛne. 22 Anu, Isirayila kaane, hali ɛ yamaan wuya ayi alo mɛɲɛnsinna naxan fɔxɔ igen dɛ, hali na, e dɔnxɛdin nan tun xɛtɛma. Halagin bata ragidi, naxan gboma ayi, a mɔn tinxin. 23 Marigina Alatala Sɛnbɛn Birin Kanna bata halagin naxan nagidi, a na rakamalima nɛn yamanan birin yi.
Ala a yamaan xunbama nɛn
24 Nanara, Marigina Alatala Sɛnbɛn Birin Kanna ito nan falaxi, a naxa, “N ma yamana, ɛ tan naxanye dɔxi Siyon yi, ɛ nama gaxu Asiriya kaane yɛɛ ra! E ɛ bɔnbɔma nɛn dunganna ra, e yi gbengbetenni te ɛ xili ma alo Misiran kaane yi a ligama kii naxan yi nun. 25 Koni benun waxati, n ma xɔlɔn ɲanma nɛn ɛ xili ma. N fitinaxin yi keli e kaladeni.” 26 Alatala Sɛnbɛn Birin Kanna bosaan tongoma nɛn Asiriya kaane xili ma, alo a keli Midiyan kaane xili ma kii naxan yi Orebi fanye yireni. A a dunganni bandunma nɛn baan xun ma, alo a liga Misiran yamanani kii naxan yi.
27 Na lɔxɔni,
a goronna bama nɛn ɛ tungunna ma,
e goron tongo wudin naxan sa ɛ kɔɛ ma konyiyani,
ɛ xungboma nɛn han na yi gira, a bira.
Yaxune yi maso Yerusalɛn ra
28 E bata Ayati taan li.
E danguma Migiron nin,
e yi e goronne lu Mikimasi taani.† Yaxune ganla yi fɛ nɛn Yerusalɛn yɛngɛdeni kirani ito xɔn. A bunna nɛɛn fa fala “Yaxune bata maso.”
29 E danguma geya longori ra kiraan nan xɔn
e a fala, e naxa,
“En xi Geba yi.”
Rama kaane xuruxurunma gaxuni.
Sɔli a taan Gibeya muxune bata e gi.
30 Galin kaane, ɛ gbelegbele!
Layisa kaane, ɛ tuli mati!
Anatɔti kaane, ɛ makininkinin de!
31 Madimena kaane bata xuya ayi,
Gebimi kaane e luxunden fenma.
32 To, yaxune sa tima nɛn Nobi yi,
e yi e yiini te,
e yi e kɔnkɔ Siyon taa faɲin geyaan xili ma,
Yerusalɛn geyana.
33 Marigina Alatala Sɛnbɛn Birin Kanna
wudi yii gbeene sɛgɛma nɛn sɛnbɛni.
Wudi kuyene yi rabira bɔxɔni.
Naxanye kondeye mate han,
a ne ragodoma nɛn.
34 A fɔtɔnna ɲansanne sɛgɛma nɛn bunbin na,
Liban fɔtɔnne yi bira Sɛnbɛ Kanna bun.