14
Alatala fa lɔxɔna
1 Alatalaa lɔxɔn fama.
Yaxune ɛ seene yitaxunma nɛn ɛ yɛɛ xɔri.
2 N siyane birin malanma nɛn
e yi Yerusalɛn yɛngɛ.
Taan suxuma nɛn.
Banxine yi kui geli.
E yi fu ɲaxanle ma.
Taan fɔxɔ kedenna yi siga suxuni.
Koni yama dɔnxɛn luma nɛn taani.
3 Alatala kelima nɛn
a yi na siyane yɛngɛ,
alo a yi yɛngɛn soma waxati gbɛtɛ yi kii naxan yi.
4 A tima nɛn na lɔxɔni Oliwi geyaan fari,
naxan Yerusalɛn yɛtagi a sogeteden binni.
Oliwi geyani bɔma nɛn a tagi,
keli a sogeteden binni
han a sogegodode binni.
Folo gbeen yi lu na.
Geyaan fɔxɔ kedenna xɛtɛma nɛn kɔmɛnna ma,
a fɔxɔ kedenna boden fan yi siga yiifanna ma.
5 Nayi, ɛ ɛ gima nɛn n ma geyane folon na.
Amasɔtɔ geyane folon sigama nɛn han Aseli.
Ɛ ɛ gima nɛn
alo ɛ to ɛ gi bɔxɔ xuruxurunna yɛɛ ra,
Yusiya waxatini, Yuda mangana.
Nayi, Alatala fama nɛn, n ma Ala,
e nun malekane birin.
6 Na lɔxɔni,
kɛnɛn mi luma na,
hanma xunbenla hanma ige xundina.
7 E nun lɔxɔn bonne keden mi a ra.
Alatala nan na lɔxɔn kolon.
Yanyi mi luma na,
kɔɛ mi luma na.
Hali kɔɛɛn na,
kɛnɛnna luma nɛn na.
8 Na lɔxɔni,
siimaya igen minima nɛn Yerusalɛn taani.
A fɔxɔ kedenna yi siga sogetede baan binni,
a fɔxɔ kedenna yi siga sogegodode fɔxɔ igen binni.
A minima nɛn soge fure waxatini alo ɲɛmɛna.
9 Alatala nan findima bɔxɔn birin mangan na.
Na lɔxɔni,
Alatala nan keden yatɛma Ala ra,
a keden peen xinla yi lu na.
10 Yerusalɛn rabilinna bɔxɔn birin
findima nɛn mɛrɛmɛrɛn na,
keli Geba yi han Rimɔn yi,
Yerusalɛn yiifanna ma.
Yerusalɛn tima nɛn.
Taan danne yi lu iki:
Keli Bunyamin dɛɛn na
han dɛ singen yireni
han tongonna dɛna.
Keli Xananɛli sangansoon ma
han mangana manpa ige badena.
11 Muxune dɔxɔma nɛn taani.
A mi fa halagima.
Yerusalɛn luma nɛn bɔɲɛ xunbenli.
12 Siyaan naxanye Yerusalɛn yɛngɛxi,
Alatala fitina fureni ito nan sama ne fari:
E birin fatin kunma nɛn e ɲɛɲɛn na.
E yɛɛne kunma nɛn e yɛ yinla ra,
e lɛnne fan yi kun e dɛ.
13 Na lɔxɔni,
Alatala gaxu gbeen nasoma nɛn e yi,
e yi e bode suxu e yiin ma,
e yi e bode yɛngɛ.
14 Yuda kaane fan Yerusalɛn xun mayɛngɛma nɛn.
E e rabilinna siyane birin ma nafunle tongoma nɛn:
xɛmaan nun gbetin nun dugi gbegbe.
15 Na fitina fure sifan soone nun gbaxalone*Gbaxaloni itoe sɔtɔma soon nun sofanla na diin sɔtɔ waxatin naxan yi.
nun ɲɔgɔmɛne nun sofanle fan suxuma nɛn
e nun xuruseen naxanye birin yaxune daaxadeni.
16 Nayi, siyaan naxanye birin Yerusalɛn yɛngɛxi
na muxu dɔnxɛne fama nɛn ɲɛɛ yo ɲɛɛ,
e Manga Alatala Sɛnbɛn Birin Kanna batu,
e yi Bubu Kui Sanla raba.†Bubu Kui Sanla fe sɛbɛxi Saraxaraline 23.33-38 kui.
17 Xa bɔxɔn xabilana nde tondi sigɛ Yerusalɛn taani
Manga Alatala Sɛnbɛn Birin Kanna batudeni,
tulen mi fama e konni.
18 Xa Misiran kaane tondi sigɛ,
xa e mi fa, tulen mi fama na.
Alatala fitina furen nagodoma e ma nɛn
a naxan nagodoma siyane ma
naxanye tondixi sigɛ Bubu Kui Sanla rabadeni.
19 Ala Misiran kaane fe ɲaxin saranma e ra na kii nin,
a siyane yulubine birin saran e ra,
naxanye mi sigama Bubu Kui Sanla rabadeni.
20 Na lɔxɔni,
hali talandin naxanye singanxi soone ra
a sɛbɛma nɛn ne ma fa fala:
“A Sariɲanxi Alatala xa.”
Tunden naxanye Alatalaa banxini
ne fan yatɛma nɛn se rasariɲanxine ra
alo saraxa ganden goronne.
21 Tunden naxanye birin Yerusalɛn nun Yuda yi,
ne birin nasariɲanma nɛn Alatala Sɛnbɛn Birin Kanna xa.
Naxanye birin fama saraxa badeni,
ne nde xalima nɛn,
alogo e xa sa kudin so e kui.
Na lɔxɔni, sare mati yo mi fa luma
Alatala Sɛnbɛn Birin Kanna batu banxini.