3
Yerusalɛn kaane mi e tuli mati
1 Gbalon na taan xa,
naxan findixi taa murutɛxi xɔsixin na,
ɲaxankata tiine dɛnaxan yi.
2 Mɛn kaane mi ndende xui ramɛma,
e mi e tuli matima maxadi xuine ra,
e mi laxi Alatala ra,
e mi e masoma e Ala ra.
3 E kuntigine luxi nɛn
alo yata xaɲɛne.
E kitisane luxi nɛn
alo kankon naxanye suben suxun ɲinbanna ra,
e mi sese ramara xɔtɔnna xa.
4 E nabine xurutare,
e muxune yanfanten.
E saraxaraline se sariɲanxine raxɔsima,
e sariyan kalama.
5 Anu, Alatala dɔxi taani nɛn
alogo a xa a tinxinyaan mayita.
A kiti kɛndɛn sama lɔxɔ yo lɔxɔ waxatin birin.
Koni fe ɲaxi rabane mi yagima mumɛ.
6 N bata siyane raxɔri
n yi e taa makantanxine kala.
N yi e taane nun e kirane findi yire rabeɲinxine ra.
Muxe mi fa dɔxɔma e taane yi,
muxe mi danguma e kirane xɔn.
7 N na a fala nɛn mɛn kaane xa, n naxa,
“Xa ɛ yi gaxu n yɛɛ ra nun,
xa ɛ yi tin n ma maxadi xuiin na nun,
n mi yi ɛ dɔxɔden kalama nun.
N nɛma ɛ fe ɲaxine saranma ɛ ra,
ɛ tan mɔn ɛ mafurama fe ɲaxi rabadeni ɛ feene birin yi.”
8 Alatalaa falan ni ito ra, a naxa,
“Ɛ waxatin mamɛ,
n fama ɛ suxudeni yɛngɛni waxatin naxan yi.
Bayo, n bata a ragidi,
n xa siyane nun yamanane birin malan,
n yi n ma xɔlɔ gbeen nagodo e xili ma.
Bayo n ma xɔlɔ gbeen bɔxɔn birin halagima nɛn alo tɛɛna.”
Siyane findima nɛn Ala gbeen na
9 Nayi, n fala sariɲanxine rasoma nɛn yamanan muxune dɛ,
alogo e xa Alatala maxandi a xinla ra.
E birin yi a batu e bode xɔn.
10 Naxanye n batuma,
naxanye raxuyaxi ayi bɔxɔn xun xɔn,
ne sa fama nɛn saraxane ra n xa
sa keli Kusi yamanan baane kidi ma.* Kusi: Yamanan naxan Misiran faxa ra Nila baan dɛ. Fati fɔrɛ yamanan nan yi a ra.
11 Na lɔxɔni,
ɛ mi fa yagima ɛ kɛwanle fe ra,
ɛ n yulubin naxanye tongo
bayo, n wasodene birin bama nɛn ɛ yɛ na lɔxɔni.
Ɛ yi ba ɛ yɛtɛ yigboɛ n ma geya sariɲanxin fari.
12 N muxu diɲaxine nun yiigelitɔne luma nɛn ɛ yɛ,
naxanye e yigi sama Alatala yi.
13 Isirayila muxu dɔnxɛne mi fa tinxintareyaan nabama sɔnɔn.
E mi wule falama.
E mi yanfa falane tima.
E na e yigiyaden li waxatin naxan yi
muxu yo mi e yigbɛtɛnɲɛ mɛnni.
14 Siyon kaane, ɛ ɲaxan!
Isirayila kaane,
ɛ gbelegbele sɛwani!
Yerusalɛn kaane,
ɛ sɛwa ɛ bɔɲɛn ma feu!
15 Alatala bata kitin masiga ɛ ra,
a yi ɛ yaxune ragi ɛ bun.
Alatala, Isirayila mangana ɛ xɔn.
Ɛ mi fa gaxuma gbalo fe yo yɛɛ ra.
16 Muxune a falama nɛn Yerusalɛn kaane xa na lɔxɔni,
e naxa, “Siyon kaane,
ɛ nama gaxu!
Siyon kaane, ɛ nama tagan!
17 Alatala, ɛ Ala ɛ xɔn,
naxan ɛ rakisima a sɛnbɛ gbeeni.
A sɛwama nɛn ɛ fe ra han!
A i madɛndɛnma nɛn a xanuntenyani,
a sɔnxɔ sɛwani ɛ fe ra.
18 N sali lɔxɔn ɲaxankatane bama nɛn ɛ ma,
naxanye bata yi findi goronna nun yagin na ɛ ma.
19 Na waxatini,
naxanye birin ɛ ɲaxankata,
n kelima nɛn ne xili ma.
Naxanye ɲaxankataxi,
n yi ne rakisi.
Naxanye yi raxuyaxi ayi,
n yi ne malan.
N yi tantunna nun xinla fi e ma yirene birin yi,
e yagin sɔtɔ dɛnaxanye yi.”
20 Alatala naxa,
“Na lɔxɔni,
n mɔn fama nɛn ɛ ra ɛ konni,
n yi ɛ malan.
Bayo n na ɛ findima nɛn xili kanne nun binye muxune ra
bɔxɔn muxune birin yɛ,
n na fa ɛ muxune ra ɛ yɛtagi waxatin naxan yi
naxanye yi suxi yɛngɛni.”