1 Me yib boch e pumo’on nu Zif ngak Saul u Gibeah ngrogned ngak ni be mith David u daken e burey u Hakilah u taban fagi ted nu Judeah. 2 Ka ngiyal’nem me yan Saul nge 3,000 e tin nth’abi cheag ko salthaw rok nu Israel ko ted nu Zif ni yad be changarnag David, 3 marbad ra n’ufed e tent rorad nga daken e Burey u Hakilah, ni ba chugur ko kanawo’ u ba’ ni ngek yu Jeshimon. Ma David e ngiyal’nem e kabay u daken e ted u magarger, me nang nike yib Saul ni be gey, 4 me l’oeg e pi damit miyad pir’eg nriyul’ ni bay Saul u rom. 5 Kangiyal’ nem me yan David nge yan i guy e chingi n’en nike mol Saul riy nge Abner nib mo’on ni fak Ner, ni ir e ba tolang ko fa raba’ i salthaw rok Saul. Ma ke mol Saul u lan e tent, ma pi salthaw rok e kar n’ufed e tent rorad nib liyeg Saul.

6 Ma aram me fith David i Ahimelek nib Hitite, nge Abishai nib mo’on ni walagen Joab (ni chitiningirow e Zeruyah) ni ga’ar, “Mini’ e aromew nra un ngog nggu warow ngalan fa gin’en nike n’uf Saul e pi tent riy?”

Me fulweg Abishai ni ga’ar, “I gag e ngu’un ngom.”

7 Aram e re nep’ ni yan David nge Abishai ngalan e gin kanpag fapi tent ko pi salthaw rok Saul riy miyow pir’eg Saul ni be mol u lukngun fapi tent ni bay e sarey rok u charen lolgen nib rog nga but’. Ma be mol Abner nge fare ulung i salthaw ni kar liyeged Saul. 8 Me ga’ar Abishai ngak David, “Ke tay Got e en to’ogor rom ngalan pa’am e nep’ ney. Ere mpaggeg nggu rugoy e sarey rok ngak, nggu michgiy u but’ nri ta’abyay — dabiman e l’agruw yay ni nggu rugoy!”

9 Machane me ga’ar David, “Ri dab mu maad’ad ngak! SOMOL e ra gechignag e en nra rin’ e kireb ngak e re pilung nike turguy. 10 Miki ul ul David ngay nge ga’ar, “I SOMOL ni be par nib fos, e ir e bayi thang e pogofan rok Saul, ndemturug ko bay yim’ nrogon e yam fa bay yim’ u fithik’ e mael. 11 SOMOL e dabun ni ngguy rogon nggu gafgownag e en nike tay ni pilung! Ngad fekew e sarey nge tafen e ran rok, mdarow.” 12 Ma aram me fek David fare sarey nge fare tafen e ran u charen lolugen Saul, mranow Abishai. Dariy be’ ni guy fa nang e n’en ke buch ma ku dariy be’ ni od — yad gubin ni go’ yad bmol, ni bochan e SOMOL e ke k’aring bang i chuchuw ngorad nib gel.

13 Ma aram me th’ab David riy nga barba’ fare loway nge yan nga daken fare burey, nike palog boch, 14 me tolul ngak fa raba’ i salthaw rok Saul nge Abner ni be ga’ar, “Abner! Ga be rung’ag lamag?”

Me fith Abner ni ga’ar, “Mini’ e cha’nem ni be tolul nike pug e en ni pilung?”

15 Me fulweg David ni ga’ar, “Abner, gathi gur e re pumo’on nth’abi cheag u Israel? Ere mangfan ndamur yororiy e masta rom, ni fare pilung? Fin chiney e ke yib be’ u fithik’ e pi tent romed ni nge thang e fan ko masta rom. 16 Abner, de yag nim rin’ e maruwel rom! Kar gog u fithingan SOMOL ni be par nib fos ni gimed gubin ma rib fel’ ni ngam m’ad, ni bochan e dam ayuweged e masta romed ni nge dabi buch ban’en rok, ni ir e ke tay SOMOL ni nge mang pilung. Amsapgad! Bu uw e sarey rok e en ni pilung? Bu uw fare tafen e ran ni immoy u charen lolugen?”

17 Me poy Saul laman David me fith ni ga’ar, “Mog lungum e yer, i gur David ni fakag?”

Me fulweg David ni ga’ar, “Errogon, i gur Pilung.” 18 Miki ga’ar David, “Siro’, mangfan ni ka ga be l’olgeg, i gag e tapigpig rom? Mang e kar gu rin’? Ba mang kireb e kar gu ngongliy? 19 Gur pilung, mmotoyil ko n’en ni nggog. Fa’anra SOMOL e ke pingegem kam togopluw ngog, mab maligach e yira pi’ ngak me thilyeg e leam rok; machane fa’anra ngongol rok boch e girdi’, me ere mang e yigi aw e buch wa’athan rok SOMOL nga dakenrad. Ni bochan e kar tulufedgag nga wuru’ e nam rok SOMOL kug wan ngab nam ni kemus ni yi go’ bogi got rok yug reb e nam e be yag ni gu tayfan. 20 Dab mu pageg nge map’ racha’eg u daken yug reb e but’, nib orel u p’eowchen SOMOL. Mangfan nthingari yib e pilung nu Israel ni nge thang e fan rok bochi ke yanuk ni bod gag? Mangfan nthingari tulufeg ni nge koleg ni bod ba arche’ ni malboch?”

21 Me fulweg Saul ni ga’ar, “Kug rin’ e kireb. David ni fakag, mu sul e ngaray! Ri dakuriy bi’id ni nggu rin’ ban’en nib kireb ngom, ni bochan e dam fek e pogofan rog e nep’ ney. Kug par ndariy rogog! Kug rin’ ban’en nrib gel e kireb riy!”

22 Me fulweg David ni ga’ar, “Ba’aray e sarey rom, i gur pilung. Mu pag reb e salthaw rom nge yib e ngaray nge fek. 23 I SOMOL e ra pi puluwon e pi’in yad ba yul’yul’ ma yad bmat’aw. Ke pi’em ngalan pa’ag e daba’, machane dagu rin’ ban’en ngom, gur e en ke tem SOMOL ni pilung. 24 Bod rogon ni ku gu rin’ ngom e daba’ ni da gu fek e pofogan rom, e mang e yigki rin’ SOMOL ngog ni aram rogon nge chuwegned u gubin e oloboch!”

25 Me ga’ar Saul ngak David, “Fakag, nge fal’eg Got wa’athmed! Gubin e pin’en ni bay mu rin’ ma bay yan i aw ni bfel’ rogon!”

Ma aram me yan David, me sul Saul nga tabnaw rok.