1 Re babyor ney e yib rok Paul ni kemang reb e kalbus ni bochan Kristus Jesus, ma ki yib rok walagdad i Timothy —

Ngak e fager romow i Filemon ni gamad nga ta’ab maruwel, 2 nge ngak girdi’en fare galesiya nma mu’ulung nga naun rom, nge ngak walagdad ni bpin i Apphia, nge ngak Arkippus ni ir reb e salthaw rok Kristus ni bod gadad: 3 I Got ni Chitamangidad nge Somol i Jesus Kristus e ngu’ur ayuwegew gimed ma yow be pi’ e gapas nga lanin’med.

4 Filemon ni walageg, gubin ngiyal’ ni gu ra meybil ngak Got, ma gu ma unegem ko meybil rog ma gu ma pining e magaer ngak e Got rog ni bocham. 5 Ya gu be rung’ag murung’agen rogon feni t’uf rom urngin e girdi’ rok Got nge rogon nib mich Somol Jesus u wun’um. 6 Gu be meybil ni ta’ab girdi’ ni kad ted ni bochan e michan’ rodad ngak Kristus e bayi ayuwegmed ngam nanged fan urngin e tin ni bfel’ ni be yib ngodad u daken Jesus Kristus. 7 T’ufeg rom, i gur walageg ni gab t’uf rog, e ba gel e felfelan’ nike pi’ ngog, ma ba ga’ e athamgil nike pi’ nga lanin’ug! Ya kam pi’ e felfelan’ nga laniyan’ urngin e pi’in girdi’en Got.

8 Ireray fan nrayag ni nge dab kug tamdag ni nggog ngom e n’en ni ngam rin’, ya walageg gur u daken Kristus. 9 Machane rogon ni gab t’uf rog e ke gagiyeg nigeg ni nggu wenignag ngom ni ngam rin’. Yug ireray rogon ni gag Paul, ni gag e mol’og rok Kristus Jesus, ma ku errogon e chiney ni kug mang reb e kalbus ni bochan. 10 Ere gu be wenig ngom ni bochan Onesimus, ni ir e kemang be’ ni fakag u daken Jesus Kristus; yu roy u kalbus e kug mang ba matam ngak, ya kug pow’iy ke thap ngak Kristus. 11 Kakrom e immoy e cha’ney i Onesimus ndariyfan ngom, ma chiney e ke ga’ fan*Onesimus e ba ngachal ni Greek ni fan “ba ga’fan.” ngom nge gag.

12 Kug pi’ e chiney ke sul ngom, nike un lanin’ug ngak. 13 Gu ba’adag ni nggu tay rog u roy e ngiyal’ney ni gu ba’ u kalbus ni bochan fare Thin Ni Bfel’, ni fan e nge yan nga luwam nge ayuwegneg. 14 Machane dabug ni ngug gel nigeg ngom ni ngam ayuwegneg; ya gu ba’adag ni ngam rin’ ni gur e leam rom. Ere dab gu rin’ ban’en ndawori fel’ ko leam rom.

15 Sana pagem Onesimus nge par u orel nge n’uw nap’an ni bochan e nge sul ngom me par rom ni gubin ngiyal’. 16 Ya chiney e gathi kemus ni ir reb e sib, ya kabfel’ ngak be’ nib sib, ya kemang reb i walagdow nib t’uf rodow u daken Kristus. Rib t’uf rog! Me gur e ri kab gel fene bayi t’uf rom, ni be’ nib sib ma be’ ni walagem u daken Somol!

17 Ere fa’anra ga be leam nigeg ni gadow ngabang, me ere mpag nge sul ngom ma ga fal’eg owchem ngak ni bod rogon ni ga ra rin’ ngog. 18 Ma fa’anra ke rin’ ban’en nib kireb ngom, ara bay e malfith rok rom, ma ga tay nge mang malfith rog. 19 Re bugithin ni ba’aray e ri gag e kug yoloy nga pa’ag: I gag Paul e bay gu thang ngom (Susun e dab gu puguran ngom ni ku errogon gag ni gu magaer rom, ya gu ayuwegnem ngam nang Kristus.) 20 Ere walageg u daken Kristus, wenig ngom mu ayuwegneg ko re bugithin ney ni bochan Somol; mu felfelan’ nigeg, ya gur be’ ni walageg gur u daken Kristus!

21 Gu be yoloy e re bugithin ney ma mmudugil u wun’ug ni bay mu rin’ e tin kug wenignag ngom — ma ri gu manang ni bayi pag rogon e tin ni bay mu rin’ ko tin ni gu be wenignag ngom. 22 Mu kum fal’eg rogon reb e singgil ngog, ya gu be finey ni bayi fulweg Got taban e meybil romed ni gimed gubin nge fulwegeg ngomed.

23 Epafras ni ba’ rog u kalbus ni bochan Kristus Jesus e be ga’ar e nge falan’ Got ngom, 24 ma ku errogon e pi’in gamad nga maruwel ni Mark nge Aristarkus, nge Demas nge Luke. 25 I Somol Jesus Kristus e ngi i ayuwegmed ni gimed gubin.