4
Meybil ko Ayuw ni Gonowrug
Mu fulweg taban e meybil rog,
A Got, ni gur e rungrung rog!
Nap’an ni ug moy u fithik’ e oloboch, ma gur e mu aywegeg.
Mu gol ngog e chiney ma ga rung’ag e meybil rog.
 
Gimed e girdi’, bu uw n’umngin nap’an ni nga mogned e thin ni kireb ngog?
Uw n’umngin nap’an ni nge t’uf romed e n’en ni dariy ban’en ni bfel’ ngay
ma gimed be lek e n’en nde riyul’?
 
Mu ted u wan’med ni SOMOL e ke mel’eg e pi’in nib mat’aw ni nge milfarad ngak,
ma be rung’ag lamag nap’an ni gu ra pining.
Mu dada’gad ko marus mi gimed tal ko denen;
mu fal’eged i leamnag e ren’ey,
u nap’an ni gimed ra thig nga chob romed nib math gulungmed.
Mu pi’ed e maligach nib mat’aw ngak SOMOL,
mi gimed tay e pagan’ romed nga daken.
 
Me yo’or e girdi’ ni nge meybil ni be lungurad:
SOMOL, kum fal’eg’ boch wa’athmad.
Mu changar ngomad u fithik’ e runguy!”
Machane, felfelan’ ni kam pi’ ngog
e bagel boch ko felfelan’ ni yad ra tay
ko urngin e grain nge wayin rorad.
 
Nap’an gu ra thig nga but’, mu rug mol ni gu ba gapas;
kemus ni gur, SOMOL, e ga ra aywegeg ni dabi buch ban’en rog.