7
Ba meybil ni fan ko n’en nib mat’aw*ROGON NI HEBREW: Ba tang ni yin’ David ngak SOMOL ni bochan Kush ni fare Benjaminite.
1 SOMOL ni Got rog, ku gub ngom ni ngam mang rungrung ngog;
mu ayuwegneg ma ga fekeg u pa’ e pi’in yad be tulfeg,
2 ya ra dangay, ma bay ra fekedgag ni bod ba gamanman ni layon
ko gin ndariy be’ riy ni nge ayuwegneg,
ngar popofedgag u rom.
3-4 SOMOL ni Got rog, fa’anra kug rin’ e kireb ngak yug be’,
ara kugthig u tanggin e fager rog
fa dariy tapgin mu gu k’aring e cham ko to’ogor rog;
fa’anra kug rin’ reb e pin’ey
5 me’ere mu pag e pi to’ogor rog ngar tulufed gag ngar koled gag,
mu pagrad ngar th’ebed gag nga but’ ngum’
ngan digeyeg u but’ ni dakriy e pogofan rog!
6 SOMOL, mu sak’iy u fithik’ e damumuw rom,
mu togopluw ko damumuw rok e pi to’ogor rog,
mu od ngam ayuwegneg.
Tin nib mat’aw e ir e ga be ta’chiylen,
7 ere mu kunuy urngin e girdi’ nga to’obem,
ma ga gagiyeg u tharmiy nga dakenrad.
8 Gur e tapufthin rok urngin e girdi’.
SOMOL, mu duwgiliy ni gu bfel’
ya gamnang ni bfel’ e rog;
9 Gur e ga ba Got ko mat’aw,
ma ga ma pufthinnag lanin’mad nge ar ar romad.
Mu taleg e pi’in kireb ko ngongol nib kireb
ma ga tow’athnag e pi’in ni bfel’.
10 I Got e yoror rog;
ma ayuweg e pi’in yad ma fol rok.
11 I Got e tapufthin nib mat’aw
ma urngin ngiyal’ nma gechignag e pi’in kireb.
12 Fa’anra dab ra thilyeged pangirad,
ma bayi uthum Got e saydon rok.
Ke tel e gat’ing rok ke fal’eg rogon ke tay;
13 ke fek e pi talinecham rok nib yargel
ke paluweg e pi gan e gat’ing rok ni be yik’.
14 Amguy rogon nma leamnag e girdi’ ni kireb e tin tagan;
yad ma tanomnag e oloboch miyad rin’ e sasalap.
15 Machane pi wup ni kar ngongliyed ni fen yug boch e girdi’,
e ku yad e yad be aw ngay.
16 Ere gechig ko kireb rorad e ke aw ngorad
ma wodmang rorad e be maad’ad ngorad.
17 Gu be pining e magaer ngak SOMOL nga feni mat’aw;
ma gu be tangnag feni sorok SOMOL ni Th’abi Tolang.
DRAFT VERSION — Proofreading in progress