KAEN ANINGEG E BABYOR
90
(Psalms 90—106)
Murung’agen Got nge girdi’*TITLE NI HEBREW: Ba meybil rok Moses, ni be’ ni girdi’en Got.
1 Somol, gubin ngiyal’ ni gur e tabnaw ngomad.
2 U m’on ndawor mu sunumeg e yochi burey,
u m’on ndawor mu sunumeg e fayleng,
ni gur ba Got ni urun,
ma gur e Got ni dariy n’umngin nap’an.
3 Ga be yog ngomad ni nggu sulod ko n’en ni gu sumgad riy;
ga ma pingegmad nggu sulod ko but’.
4 Bbiyu’ i duw e bod ta’reb e rran u wun’um;
ra yan i aw u puluwom ni bod e fowap nike chuw,
bod feni ngoch ba awa ko nep’.
5 Gur e ga ma chuwegmad ni bod e ran ni sugbur;
dabi n’uw nap’anmad ni bod ba lik’ay.
Gamad bod e pan ni tugul ni kadbul,
6 nge ga’ kaen nge puf e floras riy,
me blayal’ me m’ingkowon nge mororay.
7 Ke ful’mad e damumuw rom;
ku gu rusgad ko damumuw rom nib gel.
8 Kam tay e denen romad nga p’eowchem,
pi denen romad nib mith e ka mu tay ko gin ga ra guy riy.
9 Damumuw rom e ke ngochnag e yafos romad;
nap’mad be may nga bang ni bod ba kathkath.
10 Ya kemus ni medlip i ragag e duw nap’mad,
ra mada’ ko meruk i ragag ni fa’anra ba gel fithik’ i dowmad;
machane oloboch nge magfan’ e be yib ngomad ko pi duw nem;
dar n’uw nap’an e yafos me m’ay, ma gamad chuw.
11 I mini’ e ke thamiy mirin e damumuw rom nike mus nga gelngin?
Mini’ e manang gelngin e marus ni yira tay ni fa’an ga ra damumuw?
12 Mu fil ngomad feni ngoch nap’an e yafos romad,
nge yag ni gu gonopgad.
13 A SOMOL, uw n’umngin nap’an ni ngki par e damumuw rom?
SOMOL mu runguy e pi tapigpig rom!
14 Mu suguymad ni yu kadbul ko t’ufeg rom ni dabimus,
nge yag ni ug tanggad ma gamad be par nib felan’mad u n’umngin nap’an e yafos romad.
15 Mpi’ ngomad e chiney e felfelan’ ni bod gelngin e kireban’ ni mpi’ ngomad
u lan urngin e pi duw ni kug gafgowgad riy.
16 Mu pagmad, e pi tapigpig rom, ngu guyed e pi maruwel rom;
mu gagiyegnag e pi’in ni owchemad ngar guyed gelngim nib gil.
17 SOMOL ni Got romad, mang yigi par fal’egwa’ath rom romad.
Ma ga man’og nagmad ko urngin e tin bay u gu rin’ed!
DRAFT VERSION — Proofreading in progress