91
Got ni ir e be yoror rodad
1 En nra yan ngak SOMOL ni nge dabi buch ban’en rok,
en be par u tanggin gelngin e ayuw rok e En ni Gubin ma Rayag Rok,
2 e rayag ni ga’ar ngak,
“I gur e manaf rog nge yoror rog!
I gur e Got rog; ni gur e bpagan’ug ngom.”
3 Rib mudugil nra ayuwegnem u urngin e riya’ nda mu nang ni bay’,
ngu gubin e liliy ni yima yim’ riy.
4 Ra upunguyem nga pon;
ga ra par u tan pa’ ni dabi buch ban’en rom;
feni yul’yul’ e ra yororiyem me n’ufegem.
5 Ma dabiyag ni ngam tamdag nnep’ nga ban’en ni gomanga ra yib i maad’ad ngom,
ara mu ga da’da’ ko cham nike yib ngom ni rran,
6 ara pi riya’ nma aw ko girdi’ nnep’,
ara pi kireb nma thang e fan ko girdi’ ni rran.
7 Rayag ni nge aw bbiyu’ e girdi’ u to’obem nga but’ ni karm’ad,
fa ragag biyu’ u gubin yang u to’obem,
machane gur e dabi buch ban’en rom.
8 Bay mu changar ma gguy
rogon ni yibe gechignag e pi’in kireb.
9 Ni bochan e kam pag fam ngak SOMOL ni ir e ngi i n’ufegem,
ni Ir e Th’abi Tolang nma yoror rom,
10 ma aram e dariy ba riya’ nra yib ngom,
ma dabi chugur e cham ko tabinaw rom.
11 Ra pi’ Got e pi engel rok ngu’ur matanagiyed gur,
ma yad be yoror rom ko gin ga be yan riy i yan.Mat 4:6; Luk 4:10
12 Yad ra fekem
nge dabi maad’ad em ko malang.
13 Bay u mot’ e layon nga but’ nge porchoyog,
ni layon nib damumuw nge porchoyog ni bay e yub u l’ugun.Luk 10:19
14 Be ga’ar Got, “Bay gu ayuweg e pi’in gub t’uf rorad,
mu gu yoror rok e pi’in yad manangeg.
15 Nap’an ni yad ra non ngog mu gu fulweg lungurad;
mra yib e oloboch ngorad, ma gu bay rorad.
Gu ra chuwegrad u fithik’ nggu tolang nagrad.
16 Gu ra tow’ath nagrad ko yafos nib n’uw nap’an,
mu gu mat’aw nagrad ngog.”
DRAFT VERSION — Proofreading in progress