101
N’en ni micheg ba pilung
1 Tang rog e murung’agen e yul’yul’ nge mat’aw,
A SOMOL, gu be yin’ e re tangney ngom.
2 Bayi fel’ pangig.
Are wi’in e ga ra yib ngog?
Bay gu par ni gu ba machalbog u nu’an rog
3 ma dariy bi’id nrayag ni gu kadan’ug ko n’en nib kireb.
Gu ba fananikay e ngongol rok e pi’in kar pi’ed keru’rad ngak Got;
dab gu’un ngorad ko n’en ni yad be rin’.
4 Dab gu sasalap
ma dab gu’un ko tin kireb.
5 Bay gu n’ag e en
nma gungun’nag be’ nga dalib,
Dabi k’adan’ug rok be’
nib tolngan’ ma ba ufanthin.
6 Bayi fel’ u wun’ug e pi’in yad ba yul’yul’ ngak Got
ma bay gu pagrad ngar pired rog u tafen e pilung.
Pi’in nri yad ba yul’yul’
e ni pagrad ngar pigpiggad ngog.
7 Dariy ba sasalap l’ugun nra par u naun rog;
dariy be’ nma dake modingnag ir nra par u p’eowcheg.
8 Gubin e rran ni bay gu thirif u but’
e pi’in kireb u daken e but’ rodad;
bay gu thurbeg urngin e pi’in kireb e leam rorad
ngar chuwgad ko fare binaw rok SOMOL.
DRAFT VERSION — Proofreading in progress