102
Ba meybil rok be’ ni kab pagel nike yib e gafgow ngak*TITLE NI HEBREW: Ba meybil rok be’ ni ka ri gafgow ni pu’og lanyan’ nga but’ u p’eowchen SOMOL.
1 SOMOL, mu telim ko meybil rog,
mu rung’ag lamag ni gu be yornag e ayuw!
2 Nap’an nra yib e oloboch ngog,
ma dab mu pi’ keru’um ngog!
Mu telim ngog,
ngiyal’ ni gu ra piningem ma ga fulweg lungug nib papey!
3 Yafos rog e be m’ay ngabang ni bod e ath;
ma be mo’oruf dowag ni bod ba nifiy.
4 Kug parde’ nga but’ ni bod e pan nike mroroy;
kug fangan’ ko ggan.
5 Gu be gel’gel’ ngalang;
Kug par ni go’ gub thum i yil nge biyach.
6 Gu bod ba arche’ ni malboch u lan e ted ni desert,
bod ba arche’ ni owl u bang ni kann’ag nike mogothgoth.
7 Der mol owcheg;
gu bod ba arche’ ni go’ ir u daken e chigiy ko naun.
8 Polo e rran ni be yog e pi to’ogor rog e thin nib kireb ngog;
kar ted fithingag ni kemang ba yaba’.
9-10 Bochan e damumuw nge gelngin e puwan’ rom,
ma aram e awat e kemang ggan rog,
ma lu’ag e ke ma’thuk nga fithik’ e garbad rog.
Ya ka mu chibiyeg ngalang kamun’eg nga orel.
11 Yafos rog e bod e taglul’ ni ganowrug;
Gu bod e pan nike mroroy.
12 Machane gur, SOMOL, e pilung ndariy n’umngin nap’an;
gubin e mfen ni bay um par u wan’rad.
13 Bay mu sak’iy nge kireban’um ngak yu Zion;
ke taw nga nap’an ni ngan runguy;
irera’ ngal’an nike taw ngay.
14 Pi tapigpig rom e ba t’uf yu Zion rorad,
ni yug aram rogon nike mogothgoth;
ke kireban’rad ngak,
ni yug aram rogon nike puth.
15 Bayi rus e pi nam ngak SOMOL;
gubin e pilung nu fayleng e bay rrusgad nga gelngin.
16 Nap’an nra ubung SOMOL yu Zion bayay,
me dag feni gilbugwan.
17 Bayi rung’ag laman e girdi’ rok nike n’agrad
me motoyil ko meybil rorad.
18 Mu yoloyed nga but’ nge nang e bin bayib e mfen e n’en ke rin’ SOMOL,
ya nge tin e girdi’ ni dawor ni gargalegrad e chiney ma bay ra pining e sorok ngak.
19 Me changar SOMOL nga but’ u tagil’ nib tolang ma ba thothup,
i changar u tharmiy nga but’ ko fayleng.
20 I rung’ag e gel’gel’ rok e pi kalbus,
me chuweg u kalbus e pi’in kan turguy ni ngarm’ad.
21 Ma aram e fithngan e bay un weliy u Zion,
ma bay ni pining e sorok ngak u Jerusalem
22 ko ngiyal’ ni nge yib e pi nam nge pi lung nga ta’bang
ni ngar liyorgad ngak SOMOL.
23 I SOMOL e ke me’waer nigeg ni kugub bitir;
ke ngochnag e yafos rog.
24 A Got, dab mu fekeg e chiney
ni dawor gu pilbithir.
A SOMOL, gur ga ma par ni dariy n’umngin nap’am;
25 Kakrom ma ga sunmiy e fayleng,
ma pi tharmiy e mu ngongliy nga pa’am.102:25–27 Heb 1:10–12
26 Pin’ey e bayi m’ay, machane gur e bay mu par;
gubin ni bayi wod ni bod e mad.
Bay mu n’agrad ni bod e mad,
ma bay ra m’aygad ngabang.
27 Machane, gur e gubin ngiyal’ ni kargom,
ma yafos rom e dariy tungun.
28 Pifakmad e bay ur pired ni dariy ban’en nra buch rorad,
u tan pa’am
ma pi’in owcharad e dabi buch ban’en rorad.
*^ TITLE NI HEBREW: Ba meybil rok be’ ni ka ri gafgow ni pu’og lanyan’ nga but’ u p’eowchen SOMOL.
102:25 102:25–27 Heb 1:10–12
DRAFT VERSION — Proofreading in progress