1 Samuela
'Eba kiavemageta
Buki 'adi 4 i veveifufu me Isileli wata me Iuda yadi 'eba veimea faifaidi. Bukinidi 1 Samuela wata 2 Samuela, 1 Kini wata 2 Kini. De'e bukinina kumekumetana 'adi 4 'waidiega, 'ana wagava Samuela tamu tomogo bwaikina faifaina. Tomogonina toveimea bwaikina me Isileli i 'edakumesedi wata i vetovevonayavuga faifaidi, wata kumanina kini 'adi 'ailuga i silakaidi, 'adi wagava Saulo wata Devida. Bukinina nageneye i veveifufu me Isileli faifaidi i nagoga 'ana tugusa Kini Saulo i wafa.
1 Samuela 'ana 'idi
Samuela yana tubuga. (1:1-28; 2:1-11; 3:1-21)
Me Isileli nuanuadi kini i na veimeyedi. (8:1-22)
Samuela Saulo i iwagi i vekini. (9:1-3, 15-16, 10:1-2, 5-24)
Saulo yana veimea. (11:14-15; 13:13-14; 15:1-4)
'Auvea Saulo i vedumwe'ai'aieni. (15:7-23, 27-29, 34-35)
Samuela Devida i iwagi i vekini. (16:1-7, 10-14)
Saulo Devida i ve'unumagigieni. (18:5-6, 7-9)
Devida i dega Saulo 'wainega. (21:1-6)
Saulo yana wafa. (31:1-5)
1
Samuela yana tubuga
1 Tamu tomogo 'ana wagava Elekana i miamia Lemataimu-Sofimu, me Ifeleimi yadi fwayefwayeye 'oya siaidi 'waidie. Kumanina Dielomu natuna, Eliva tubuna, Tou aisena, we'e Sufai mata'olo'olona wauma Ifeleimi 'wainega. 2 Elekana yana vevinevo 'adi 'ailuga, Aana wata Fenina. Fenina ma natudiavo we'e Aana kakalidi.
3 Malamala 'aitamogana 'aitamogana Elekana ma yana 'aila'a i nunago 'atamana bwaikina 'ana wagava Silo, bei i 'odu'odu wata i vevelomu 'Auvea tomia abama yadi Tovemata'ai'ai 'waineye. Tutuyanina 'waineye 'Auvea yana tovelomu 'adi 'ailuga, Ilai natunavo Ofini wata Feniasi. 4 'Aiatanidi 'waidie Elekana i vevelomu 'Auvea 'waineye, we'e 'aisaya du'udi† yana vavine Fenina ma natudiavo i veleveledi 'adi 'aisaya. 5 Avinodi 'Auvea kebu tamu kwamana Aana i da velediga, siwe Elekana i nuakalikaliedi bwaikina begaidi du'u 'atumaiotogina i veleveledi. 6 'Auvea Aana i 'ivekakalidi, tutuya matatabuna Fenina i sidibidibiedi bega i nunuavita fai kebu natudiga. 7 Malamala 'aitamogana 'aitamogana i nunago 'Auvea yana vanuga† 'waineye, bei Fenina 'adi 'aimuli i luluvulewedi begaidi ma yadi nuavita i lulumatageu wata kebu i da 'ani'ani. 8 Elekana yana vavine i velutolieni i vo, Aana, awale 'wa 'we'we'wela wata kebu 'wa da 'ani'aniga? 'Ai'edi ma natumiavo iavetadi 10 'wa da sosoana, siwe fai yau taiadi i lubwainemi 'wa da sosoana-'afo'afo.”
Aana wata Ilai
9 Tamu tutuya 'atamana Silo 'waineye velomu 'ana 'ani wata yemu i 'a'ava, nika Aana i tovoi i nago i velu'ui 'Auvea 'waineye. We'e tovelomu Ilai i miabui i miamia 'Auvea yana vanuga 'ana 'awa lilivaneye. 10 Aana i nuavita bwaikina, ma yadi 'we'wela i vevelu'ui. 11 *Aana i vona'awaufaufa 'Auvea 'waineye i vo, Ie 'Auvea, 'omu tomia abama yadi Tovemata'ai'ai we'e yau yamu tofolova. 'Ai'edi 'u da 'isanuakalikaliemaga 'ama vita 'u da 'iseni, we'e yama velu'ui 'u da nogai kwamana iavetana 'u da velema, bola 'a na vevilai 'waimuye. Kwamananina 'asa'aiana 'omu faifaimu yana mia matatabuna 'waineye, 'ana 'eba 'isa nava'auna kebu i na boboboiga.”
12 Aana i vevelu'ui 'Auvea 'waineye, Ilai i ve'wada 'awadi i 'ise'iseni. 13 Aana nuadiega i vevelu'ui, siwe i ve'awayabwayabwana kebu bonadi i da sousouyeniga. Ilai i vo 'ako ufa toketokena i yemu nuadi i lugaugauya. 14 Bega i vonedi i vo, 'Wa 'ailove! Awale ufa toketokena 'wa yemu nuami i lugaugauya?”
15 Aana i tutula i vo, Yama 'auvea, yau vavine kebu ufa toketokena 'ana toyemu, we'e mogitana yama nuanua wata yama 'anigosako 'a lulu'ivoneyeni 'Auvea 'waineye. 16 Kebu 'u na vo 'ako yau vavine tamu tosakona, we'e mogitana yama nuavita wata yama 'we'wela faifaidi 'a vevelu'ui 'Auvea 'waineye.”
17 Bega Ilai i vo, Ma yami sosoana 'wa na nago, ava'ai faifaina 'wa velu'uiga, me Isileli yada Yaubada i da velemi.”
18 Aana i vo, Kaiwa bwaikina yama 'auvea, fai 'u nuanuanima.” I veifufu'a'avana i viladi i nago i 'ani, yadi nuavita i 'a'ava.
19 I 'atai 'awa'awaiogose Elekana ma yana 'aila'a i tovoi i nagoi 'Auvea i subiai wata i 'odu 'waineye, mulieta i viladi Lema yadi 'atamane. Tutuyanina Elekana yana vavine Aana taiadi i veluaga, 'Auvea yadi velu'ui i nuanuani bega i tutuli. 20 Tutuya 'ifwaidi i 'a'avana Aana i miana mulieta i venatuna, kwamana iavetana i tubuga, i goleni Samuela. Bega i vo, Kwamananina faifaina 'a velu'ui 'Auvea 'waineye.”
Aana Samuela i 'aniveleneni 'Auvea 'waineye
21 Malamala i 'a'avana, Elekana ma yana 'aila'avo i nagoi Silo, i na 'anivelena-maimaiga wata i na velomu 'Auvea 'waineye. 22 We'e tutuyanina 'waineye Aana kebu taiadi i da nagoga, yadi lamoga i voneni i vo, Yau 'a na miamia 'ana tugusa kwamana 'a na dabai, i na 'a'ava 'a na naweni 'a na 'aniveleneni 'Auvea 'waineye. Yana mia matatabuna bei i na mia-vagata.”
23 Elekana i vo, Ava'ai 'wa voneyeniga de'e 'atumaina, bega 'wa na miamia 'ana tugusa kwamana 'wa na dabai. 'Auvea i da ivaisemi yami vona'awaufaufa 'ana mogitana 'wa na 'idewai.” Begaidi i miamia kwamana i veveuya i nagoga i dabai.
24 Tutuyanina kwamana i dabai, avinodi siaina siwe inana yadi lamoga taiadi i naweni Silo 'Auvea yana vanuga 'waineye. I nagoga side naninidi i 'ewadi i nawedi velomu faifaina. Bulumakau 'ana malamala 'aitonu, falawa venuana 'aitamogana wata oine ma ba'alina 25 Tutuyanina bulumakau i velomuyeni i 'a'avana kwamana i mieni Ilai 'waineye. 26 Aana i vo, Yama 'auvea, 'u na nuani basenadi malamalanidi i a'ava 'waidie, yau kumanima side bei lilivamuye 'a tovoi, bega 'a vevelu'ui 'Auvea 'waineye. 27 'A vevelu'uiga 'Auvea 'waineye kwamana iavetana faifaina, bega side kwamananina yama velu'ui 'ana tutula. 28 Bega 'asiau kwamana 'a mieni, 'a na 'aniveleneni 'Auvea 'waineye. Yana mia matatabuna 'Auvea i na veveimeyeni wata i na 'i'isave'avini.” I vona'a'ava Samuela i 'odu 'Auvea i subiai.