1 Tutuyanina Samuela i ve'auvea natunavo i silakaidi bega me Isileli i na veveimeyedi, wata i na vetovevonayavuga faifaidi. 2 Yana tubu'edakumeta 'ana wagava Ioeli we'e bwasiona 'ana wagava Ebaya, 'adi 'ailuganidi i vetovevonayavuga 'atamana Biasiba Isileli nageneye. 3 We'e tamadi yana sauluva kebu i da vetutuyameni, mani 'ana 'ewa wata 'ana vefolova 'wainega i yogosako. Wata tomotoga givagivayega kukua 'alo mani i veleveledi taunidi 'adi 'aivaita faifaina bega vekaliega i na veveimea.

4 Bega me Isileli to'edakumeta 'au'auveadi matatabudi i va'auta Lema, Samuela taiadi i veifufu. 5 VeL 17:14To'edakumetanidi i voneni i vo, 'U 'iseni, 'omu 'akonadi 'u veve'auvea, we'e natumwavo yamu sauluva kebu i da 'ewaiga. Nuanuama tamu kini 'u na venua'ivineni 'u na silakai i na veveimeyema, bani'odi 'ifwaidi tomotoga 'aila'a tulina tulina ma yadi kinivo.”

6 Yadi nuanua kini faifaina Samuela kebu i da sosoaneniga begaidi i nago 'Auvea 'waineye i velu'ui. 7 'Auvea Samuela i voneni i vo, Ava'ai i vonemuga yadi nuanua matatabuna 'u na 'idewai. 'Omu kebu i da vedumwe'ai'aiemuga, we'e mogitana yau yadi kini i vedumwe'ai'aieku. 8 Basenadi a vagavaidi a miedi Itifitayega siwe i vevedumwe'ai'aieku i 'odu'odu mali yaubadavo 'waidie. Wata bani'odi 'asiau sauluvanina i 'idewai 'omu i vedumwe'ai'aiemu. 9 'Asa'aiana, yadi nuanua 'u na 'idewadimo, we'e nagami 'u na velu'ase'ase-dewadi 'awaie bani'odi kini i na vevesauluvedi 'waidie.”

10 Bega Samuela 'Auvea yana vona matatabuna i lu'ivoneyeni tomotoga 'waidie, kumanidiavo i vevelu'ui kini faifaina. 11 I vonedi i vo, Side bani'odi 'awaie kini i na vesauluvedi 'waimie. Natumiavo iavetadi i na lukakadedi yana tolugaviavo, 'ifwaidi i na vetofolova yana salioti*Salioti tamu fwayafwaya 'ana waka, 'aisaya osi i luluyo'ei. wata yana 'aisaya osi 'waidie, we'e 'ifwaidi i na veimeyedi i na kumeta i na lilide yana salioti manawadie. 12 'Ifwaidi i na vetomata'ai'ai tolugaviavo 1,000 'waidie, 'ifwaidi 50 'waidie, 'ifwaidi i na vetobakula kininina faifaina, 'ifwaidi i na 'a'aiala 'ana'ana. We'e 'ifwaidi kukua 'eba vetalaga wata yana salioti 'adi kukua i na 'i'idewadewa. 13 Natumiavo vevinedi i na 'ewadi yana tovetago wata yana to'anikabu, we'e 'ifwaidi 'ana vane 'ana to'idewadewa. 14 Yami bakula 'atumaidi ma 'ani'aninidi, kalefa wata olive talagidi i na elomi i na 'anivelenedi yana tovemata'ai'aivo wata to'edakumetavo 'waidie. 15 Tutuyanina yami bakula 'wa na 'aile'wa fekafeka 'alo witi 'wa na kwaudi 10, kwau 'aitamogana i na 'ewai yana tofolovavo bwaikidi wata siaidi i na veutadi. Wata bani'odi yami oine i na elomi. 16 Yami tofolova iavetadi wata vevinedi i na 'ewadi we'e yami 'aisaya bulumakau wata doniki 'atumaidi i na 'ewadi, taunina yana folova faifaina. 17 I na vonemi yami 'aisayavo 'wa na 'ididi fatala 10 'waidie, i na 'a'avana fatala 'aitamogana i na elomi taunina faifaina, we'e 'omi 'wa na vetofolova-maimaiga 'waineye. 18 Tutuyanina vitanidi 'waidiega 'wa na 'abiawa kini yana veimea 'wainega, 'wa na vevelu'ui 'Auvea 'waineye 'aivaita faifaina, siwe kebu bonami i na nogai.”

19-20 Siwe tomotoga i baila, kebu nuanuadi Samuela yana velu'ase'ase i na nogai. We'e i kwayega i vo, Kebu, nuanuama kini i na veveimeyema bani'odi 'ifwaidi tomotoga 'adi 'aila'a tulina tulina ma yadi kinivo. Yama kininina i na vetovevonayavuga faifaima wata i na kumesema vetalaga 'waidie.”

21 Tutuyanina Samuela tomotoga yadi vona i nogai bega i vilai yadi nuanua i lu'ivoneyeni 'Auvea 'waineye. 22 Bega 'Auvea i vo, Ava'ai i vonemuga yadi nuanua 'u na 'idewai bega kini 'u na veledi.”

I veifufu i 'a'avana Samuela tomotoga i vonedi i vo, Matatabumi 'wa na vilami 'wa na nagoi yami 'atamane.”