1 Samuela 'akonadi i vetubuau i folofolova 'Auvea faifaina we'e Ilai i 'i'ivaiseni. Tutuyanina 'waineye 'Auvea kebu i da veveifufu-vebogiga tomotoga 'waidie wata bani'odi kebu nani fuedi i da sivemagesediga 'wa da vo i da 'enoneganega.

2 Tamu lovana 'waineye Ilai 'ana 'ivie i 'eno'eno, tomogonina matana i sako, kebu 'ana fata i na 'isa-'atumai. 3 Samuela i 'eno'eno 'Auvea yana vanuga*Tutuyanina me Isileli i yaba-vuvua sali'avu'avuye, Vadavada Tabutabuna 'waineye i 'odu'odu Yaubada 'waineye, we'e nageneye Veakutagona 'ana Didiwaka i 'eno'eno. Malamala fueotogidi i 'a'ava, me Isileli tamu yadi 'eba velu'ui i yogoni Silo, Veakutagona 'ana Didiwaka faifaina. We'e me Isileli yadi Vanuga 'Eba Velu'ui bwaikina Ielusalema, Solomoni bola kebu i da yogoniga. (1 Kini 6) nageneye, Yaubada yana Veakutagona 'ana Didiwaka lilivaneye. We'e Yaubada yana mageta bola kebu i da 'weuga. 4 I 'eno'eno nika 'Auvea i vegole i vo, Samuela!” I tutula i vo, Yau side!” 5 Samuela i tovoi i lilide i nago Ilai 'waineye i vo, Yau side. 'U goleku bega a mai.”

Ilai i voneni i vo, Yau kebu a da golemuga, 'u na vilamu 'u na 'eno.” Samuela i vilai i nago 'ana 'ivie i 'ufobala.

6 'Auvea Samuela i gole-vaituganeni i vo, Samuela!”

Samuela i tovoi i nago Ilai 'waineye i vo, Yau side! 'U goleku begaidi a mai.”

Ilai i voneni i vo, Natuku, yau kebu a da golemuga. 'U na vilamu 'u na 'ufobala.” 7 We'e Samuela bola 'Auvea kebu i da 'asetaiga fai kebu tamu ava'ai i da sivemageseni 'waineye.

8 De'e 'ana vetonu 'Auvea Samuela i goleni, bega i tovoi i nago Ilai 'waineye i vo, Yau side! 'U goleku begaidi a mai.”

Nika Ilai nuana i magetai i 'asetai de'e 'Auvea kwamana i golegoleni. 9 Bega Ilai Samuela i voneni i vo, 'U na nago 'u na 'ufobala, 'ai'edi aitoi i na golemuga 'u na vo, 'Auvea, 'u veifufu 'waikuye, yau yamu tofolova a vivinenega.” Nika Samuela i vilai 'ana 'ivie i 'ufobala.

10 I 'ufobala-vaitugana 'Auvea i mai Samuela lilivaneye i tovoi, i vegole nagami bani'odi i vegoleyedi i vo, Samuela! Samuela!”

Samuela i tutula i vo, Yau yamu tofolova a vavainenega, nika 'u veifufu.”

11 'Auvea i voneni i vo, 'U vainenega a na vonemu. Sai'afoga tamu nani vitana a na 'idewai me Isileli 'awasasadie, valana i na nogai nika yawaidi i na lovoga. 12 Yau vematavuloga a na 'idewai Ilai wata 'ana wauma 'waidie, bani'odi naninidi matatabuna a vona-samulediga i na souyedi. 13 'Akonadi a voneni vematavuloga a na mieni 'ana wauma 'waineye i na 'eno-vagata fai natunavo yau Yaubada i awavesakoyeku, i 'asetai siwe kebu nuanuana i na kiavetonovediga. 14 Bega a vona'awaufaufa-vagata, avinodi Ilai ma natunavo i na 'anivelena-maimaiga 'alo i na vevelomu yadi sakona faifaidi, siwe kebu tamu sai'afo a na nuatavunidi.”

15 Samuela 'ana 'ivie i mianaga 'ana tugusa i 'atai, bega i tovoi 'Auvea yana vanuga 'ana 'awa i sibaledi, we'e ma yana kololo, kebu nuanuana 'Auvea yana vona i na lu'ivoneyeni Ilai 'waineye. 16 Siwe Ilai i vegole i vo, Samuela, natuku!”

Samuela i tutula i vo, Yau side.”

17 Ilai i velutolieni i vo, Tamu ava'aina 'Auvea i vonemu? Nani matatabuna 'u na lu'ivoneyedi, kebu tamu ava'ai 'u na giveni. 'Ai'edi tamu veifufu 'u na giveniga Yaubada vematavuloga bwaikina 'ako i na velemu.” 18 Nika Samuela nani matatabuna i lu'ivoneyedi, kebu tamu ava'ai i da giveniga 'waineye. Ilai i vo, 'Auvea yana nuanua ava'ai i nuani 'atumaina 'waineye, i na 'idewai.”

19 Samuela i tataulai we'e 'Auvea i labilabini, naninidi i vona-samulediga 'adi mogitana i sousouyedi. 20 Bega me Isileli matatabudi 'atamana Dani 'wainega i nagoga 'atamana Biasiba, i 'aseta-'atumaia Samuela 'Auvea yana vona 'ana tolu'ivona. 21 Tutuya fuedi 'Auvea taunina i sisivemageseni 'atamana Silo 'waineye, yana nuanua i lulu'ivoneyedi Samuela 'waineye.