Nagami
'Eba kiavemageta
Buki de'e i lulu'ivona 'eba velamu faifaina. I veveifufu fwayafwaya bani'odiga i souyeni, tomotoga 'ada 'idewadewa wata me Isileli yadi 'eba velamu faifaina. Buki de'e nageneye nani 'adi 'ailuga bwaikidi faifaidi i veifufu.
1) Daba 1-11 i veveifufu Yaubada fwayafwaya wata tomotoga i 'idewadiga faifaina. De'e dabanidi nagedie tomotoga kumekumetadi faifaidi i veveifufu bani'odi Adama, Ive, Keni wata Ebeli. We'e Noa yana tutuye fwayafwaya matatabuna Yaubada i 'u'umi wayagata bwaikina 'wainega. I 'a'avana, tamu tutuya tomotoga vanuga bwaikina wata manamanawena i yogoni i laka abame 'ana wagava Babeli.
2) Daba 12-50 i kikiavemagetaga me Isileli 'adi wauma yana 'eba velamu faifaina. De'e 'wainega 'ana fata me Isileli tubudiavo kumekumetadi ta na 'asetadi bani'odi Ebelamo, Aisake wata Iakobo. We'e Iakobo natunavo 'adi 'aila'a 12, 'waidiega wauma Isileli i souyedi.
Buki 'ana tokiluma kebu 'ana wagava i da kilumiga wata i da lu'ivoneyeni 'waideye, we'e Buki Tabu 'ana to'aseta bwaikidi i vo, Buki de'e Mosese 'ana kilukiluma 'alo yana buki.”
Kilumanina me Isileli faifaidi, 'wainega i na 'asetai yadi Yaubada i venua'ivinedi taunidi yana tomotoga wata naninidi i 'i'idewadiga me Isileli faifaidi i na nuanuanidi.
Mosese Buki de'e i kilumi, malamala 1500 bani'odi i 'a'avana mulieta Iesu i tubuga.
1
'Eba Velamu
1 'Eba velamu vauvau 'waineye, Yaubada abama wata fwayafwaya i 'idewadi. 2 We'e fwayafwaya bola kebu i da souyeniga wata nage'avana. Dudubala bwaikaotogina malaveta i umai, we'e Yaubada 'Anu'anununa tabwaneamo i lulubewe-vuvueni. 3 2 Kol 4:6Mulieta Yaubada i vo, Mageta i na souyeni,” nika mageta i souyeni i awa'ai'aia. 4 Yaubada magetanina i 'iseni i awave'atumaieni, mulieta Yaubada mageta i 'idia dudubala 'wainega. 5 Yaubada mageta i goleni 'Aiata we'e dudubala i goleni Lovana. I lovani i nagoga i 'atai, 'aiata kumekumetana 'ana tugusa.
6 2 Fit 3:5Mulieta Yaubada i vo, Malaveta kamwaneye 'awasasa'ava i na souyeni bega ufa i na 'idia, 'ifwaidi tabwaneye i na laka we'e 'ifwaidi dibuneye.” 7 Nika Yaubada 'awasasanina i 'idewai bega ufa dibuneye wata ufa tabwaneye i 'idia. Yana voneye 'ana mogitana i souyeni. 8 Yaubada 'awasasa'ava i goleni Abama. I lovani i nagoga i 'atai, 'aiata 'ana veluga 'ana tugusa.
9 Mulieta Yaubada i vona i vo, Ufa matatabuna abama 'ayaneye i na ula vi'ai 'aitamogana 'waineye, fwayafwaya lalana i na vemageta.” Yana voneye 'ana mogitana i souyeni 10 Yaubada fwayafwaya lalana i goleni Fwayafwaya we'e ufa i ulaulaga i goleni Eyaga Yaubada i 'iseni i awave'atumaieni. 11 Wata Yaubada i vona i vo, Fwayafwaya i na uga, mosomoso ma biladi wata 'ai vuavuaga ma waifeidi i na ve'alatabotabo we'e natudiavo 'adi 'isa'isa bani'odi.” Yaubada yana voneye 'ana mogitana i souyedi. 12 Fwayafwaya i uga, mosomoso ma biladi we'e natudiavo 'adi 'isa'isa bani'odi, wata 'ai vuavuaga ma waifeidi we'e natudiavo 'adi 'isa'isa bani'odi. Yaubada i 'isediga i awave'atumaiedi. 13 I lovani i nagoga i 'atai, 'aiata 'ana vetonu 'ana tugusa.
14 Mulieta Yaubada i vona i vo, Mageta i na souyedi abame bega 'aiata wata lovana i na 'idia, magetanidi 'asa'aiana tutuya 'adi tugusa 'eba 'isa'inana, tutuya koyova wata tutuya 'aile'wa, 'aiata wata malamala faifaidi. 15 Magetanidi i na 'awaaiaidi abame bega fwayafwaya i na magemageseni.” Yaubada yana voneye 'ana mogitana i souyedi. 16 Yaubada mageta 'ailuga bwaikidi i 'idewadi, mageta bwaikina 'aiata i na magemageseni, we'e mageta sai'afo bwaikina lovana i na magemageseni. Wata 'ubwana i 'idewadi. 17-18 Magetanidi Yaubada abame i yatodi bega fwayafwaya i na magemageseni, 'aiata wata lovana i na veveimeyedi, nika 'wainega mageta wata dudubala i na 'idia. Yaubada i 'isedi i awave'atumaiedi. 19 I lovani i nagoga i 'atai, 'aiata 'ana ve-4 'ana tugusa.
20 I 'a'avana, Yaubada i vona i vo, 'Aisaya ma yawaidi tulina tulina ufeye wata eyage i na vefueotoga, we'e manuga i na yaveyavega fwayafwaya wata abama 'awasasadie.” 21 'Aisayanidi Yaubada i 'idewadiga i vefue-'afo'afo ufeye wata eyage ma waumidi tulina tulina, wata 'aisaya bwaikaotogidi i miamianiga eyage i 'idewadi. We'e manuga yavoga tulina tulina wata i 'idewadi. Yaubada i 'isedi i awave'atumaiedi. 22 Yaubada i vesauluva-'atumaiedi i vo, 'Wa na venatuvea'wa bega 'ami 'aila'a i na vebwaika eyaga nageneye wata manuga 'ami 'aila'a i na vefue fwayafwaya tabwaneye.” 23 I lovani i nagoga i 'atai, 'aiata 'ana ve-5 'ana tugusa.
24 I 'a'avana Yaubada i vona i vo, Fwayafwayayega 'aisaya ma yawaidi i na souyedi, bani'odi tauvanuga, walawala'ai wata daledaledi fatala tulina tulina.” Yaubada yana voneye 'ana mogitana i souyedi. 25 Yaubada 'aisayanidi i 'idewadi, walawala'ai wata tauvanuga fatala tulina tulina 'waidiega, kumanidiavo i daledale wata i yabayaba fwayafwaya 'waineye. Yaubada i 'isedi i awave'atumaiedi.
26 1 Kol 11:7I 'a'avana Yaubada i vona i vo, Tomotoga ta na 'idewadi 'ida bani'odiga 'ada 'isa'isa, kumanidiavo i na veveimea 'aisaya eyage wata manuga i yaveyavega 'awasasa'aveye. Nani matatabuna fwayefwayeye i na veveimeyedi, bani'odi 'aisaya tauvanuga, walawala'ai wata daledaledi.”
27 Nag 5:1,2Mad 19:4; Mak 10:6Nika Yaubada tomotoganidi i 'idewadi taunina 'ana 'isa'isa bani'odiga.
Taunina 'ana 'isa'isanina bani'odi i 'idewadi,
iavetana wata vevinena i 'idewadi.
28 Yaubada i awave'atumaiedi i vo, 'Wa na venatuvea'wa bega 'ami 'aila'a i na vebwaika fwayafwaya 'wa na luvaia wata 'wa na ve'itulamuyeni. 'Wa na vetoveimea igana eyage, manuga 'awasasa'avaneye, wata nani ma yawaidi matatabudi i miamia fwayefwayeye.” 29 Wata i vo, 'Wa na 'isedi. Mosomoso ma biladi 'aitamogana 'aitamogana fwayafwaya matatabuna 'waineye wata 'ai vuavuaga ma waifeidi 'aitamogana 'aitamogana a velemi, 'asa'aiana 'ami'ami. 30 We'e 'aisaya fwayefwayeye, manuga 'awasasa'aveye, 'aisayanidi i daledale, naninidi matatabudi ma yawaidi mosomoso wata welavi 'akonadi a veledi 'waidiega i na 'ani'ani.” Yana voneye 'ana mogitana i souyeni. 31 Yaubada nani 'aitamogana 'aitamogana i 'idewadiga i 'isedi, matatabudi 'adi 'isa 'atumaiotogidi. I lovani i nagoga i 'atai, 'aiata 'ana ve-6 'ana tugusa.