2
1-2 Sou 20:11Ibu 4:4,10Side bani'odi abama, fwayafwaya wata naninidi nagedie taiadi i 'idewa'a'avadi, bega 'aiata 'ana ve-7 'waineye Yaubada bei i veawai. 3 Yana 'idewadewa wata yana folova i ve'a'avaiga, i veawai, begaidi Yaubada 'aiatanina i vesauluva-'atumaieni wata i vetabuya taunina faifaina.
Yaubada tomogo wata vavine i 'idewadewadi
4 Side bani'odiga 'Auvea Yaubada abama wata fwayafwaya i 'idewadiga 'ana veifufu.
5 Fwayefwayeye welavi siaidi wata mosomoso bola kebu i da ve'alatabotabo, fai 'AUVEA Yaubada 'wei kebu i da tauyeni fwayafwaya i na tauvebikai, wata fwayafwayanina 'ana tofolova tomotoga kebu. 6 We'e fwayafwayayega ufa-luluvuala i sousouyedi fwayafwaya matatabuna i 'i'ivebikadi.
7 1 Kol 15:45'Auvea Yaubada tomogo i 'idewai fwayafwaya 'aufofoualina 'wainega. I yuvedamani yawaina i luku tomogo kabunineye nika i tovoi ma yawaina. 8 Wata 'Auvea Yaubada bakula i bakuli inala yana 'eba laka Ideni weyaginega, nika tomogonina i 'idewaiga, bei ivemiani. 9 Ve 2:7; 22:2,14'Auvea Yaubada welavi tulina tulina i 'idewadi i ve'alatabotabo fwayafwayayega, welavinidi 'adi 'isa 'eba nua'ewa wata vuagidi 'atumaiotogidi 'ani faifaina. Bakulanina kamwaneye Mia-vagata 'ana Welavi wata 'Aseta 'ana Welavi i tovotovoi, 'Atumaina wata Sakoina.
10 'Awalawa Ideni 'wainega, ufa i sousouyeni i ivoivo bakula i 'i'ivebikadi, wata ufanina 'aitamogana 'wainega i 'idia 'eto'awadakadakadi 'adi 4 i souyedi. 11 Nimailina kumekumetana 'ana wagava ufa Fisoni, i sousouyeni i ivoivo 'awalawa Avila matatabuna i luvivileni, wata bei golida i veluagai. 12 Golida 'awalawanina 'waineye 'asa'aiana golida mogitana, vane magaina 'atumaina wata kileu 'avu'avuna 'adi wagava onisi wata bei i veluagadi. 13 Nimailina 'ana veluga 'ana wagava Gioni, i sousouyeni i ivoivo 'awalawa Kusi matatabuna i luvivili. 14 Nimailina 'ana vetonu 'ana wagava Tigilisi, i sousouyeni i ivoivo inala yana 'eba laka weyaginega 'awalawa Asula lilivaneamo. We'e nimailina 'ana ve 4 'ana wagava ufa Iufiletisi.
15 'Auvea Yaubada tomogo i naweni bakula Ideni 'waineye i valovei bega i na veto'isave'avina wata bei i na folofolova. 16-17 We'e 'Auvea Yaubada tomogo i voneni i vo, Bakula nageneye welavi fuedi i tovotovoi 'omu yavuyavumu 'waidiega 'u na 'ani'ani siwe 'Aseta 'ana Welavi, 'Atumaina wata Sakoina faifaidi vuagina kebu 'u na 'aniaga. 'Ai'edi 'u na 'aniaga, 'u na wafaotoga.”
18 Mulieta 'Auvea Yaubada i vo, Kebu 'ana 'isa 'atumaina tomogo 'aisena i na miamia, 'ana 'au a na 'idewai 'ana to'aivaita.” 19 'Aisaya wata manuga 'Auvea Yaubada i 'idewadi fwayafwaya 'wainega, matatabudi i miedi Adama 'waineye. Nuanuana i na 'asetai ava'ai wagavaga Adama i na goledi. 'Aisayanidi 'adi wagava Adama i velediga, 'asa'aiana 'adi wagavanidi. 20 Bega tomogo 'aisaya tauvanuga, walawala'ai wata manuga 'awasasa'aveye, 'aitamogana 'aitamogana 'adi wagava i goledi. We'e Adama 'aisena kebu 'ana 'auga i na 'i'ivaiseni. 21 Begaidi 'Auvea Yaubada tomogo i luve'enovi nika i 'enowafa. Tutuyanina i 'eno'eno lumalumana i siyo'ei wata 'awasasana vigonega i yatobodai. 22 Lumalumananina 'Auvea Yaubada tomogo 'wainega i 'ewaiga bega vavine i 'idewai. I 'a'avana vavine i mieni tomogo 'waineye. 23 Nika tomogo i vona i vo,
De'e kumanina be'ama yau luluku 'wainega i souyeni,
Wata vigoku 'wainega bani'odi.
'Awaie i na goleni 'ana wagava Vavine,
fai tomogo 'wainega i souyeni.”
24 Mad 19:5; Mak 10:7,8; 1 Kol 6:16; Efe 5:31Side lamunanina bega iaveta tamadiavo wata inadiavo 'waidiega i na 'a'awa'ididi, ma'itufa yadi vevinevo taiadi i na luluvetubama nika i na veve'aitamoga.
25 Tomogo ma yana vavine 'adi 'ailuga konekonedi siwe kebu i da bunumayaga.