3
Tomogo wata vavine Yaubada yana veimea i geuya
1 Ve 12:9; 20:2'Auvea Yaubada 'ana 'idewadewavo 'aisaya walawala'ai 'waidiega 'o'olo yana nuauya bwaikina we'e 'aisaya 'ifwaidi sai'afo. Tamu tutuya 'o'olo vavine i velutolieni i vo, Mogitana Yaubada i vonemu bega welavi matatabudi 'waidiega vuagidi kebu 'u na 'anidiga?”
2 Nika vavine i tutula i vo, Yaubada i tauyema bega welavi vuagidi bakula de'e 'wainega 'a na 'anidi. 3 Siwe wata i vonema i vo, Welavinina i tovotovoi bakula kamwaneye kebu 'wa na kiatonoviga wata vuagina kebu 'wa na 'aniaga, i na nunago 'wa na wafa.”
4 'O'olo vavine i voneni i vo, Kebu tamu sai'afo 'wa na wafaga. 5 Yaubada i talabodemiga fai i 'asetai tutuyanina vuaganina 'wa na 'ania nuami i na magetai nika 'omi Yaubada bani'odiga, 'atumaina wata sakoina 'wa na 'asetadi.” 6 Mulieta vavine welavinina i 'iseni, 'ana 'isa 'eba nua'ewa we'e vuagina 'atumaiotogidi 'eba 'ani, nuanuana i na 'ania bega 'aseta wata nuamageta i na veluagai. Begaidi i kadia i 'ania, nika 'ifwaidi yana lamoga i veleni, wata i 'ania. 7 Tutuyanina i 'ani'a'ava nika 'adi 'ailuga nuadi i magetadi, yadi vekonekone faifaina i bunumayaga, bega welavi lukudi bababadi i agilidi, i 'a'avana i ve'wesenedi tomogodi i velubabaledi.
8 Lavilavie, yagi'oya 'ana tutuye, tomogo ma yana vavine 'Auvea Yaubada butu'aina i nogai i mimai. Tomogo ma yana vavine i giva welavi 'awasasadie bakula nageneye. 9 'Auvea tomogo i goleni i vo, 'Omu ava'aibe?” 10 I tutula i vo, Yau bakula nageneye butu'aimu a nogai bega a kololo fai konekoneku nika a giva.” 11 'Auvea i voneni i vo, Aitoi i vonemu konekonemu? Welavinina a talabodeniga, vuagina 'u 'ania?” 12 Tomogo i vo, Vavinenina 'u velekuga, welavi vuagina i veleku a 'ania.” 13 2 Kol 11:3; 1 Tim 2:14Nika 'Auvea Yaubada vavine i voneni i vo, Awale naninina 'u 'idewai?” Vavine i vo, 'O'olo i vekalieku bega a 'ania.”
Yaubada tomogo ma yana vavine i vematavulogidi
14 'Auvea Yaubada 'o'olo i voneni i vo,
Fai sauluva sakoina 'u 'idewaiga,
'Aisaya tauvanuga wata 'aisaya walawala'ai matatabudi 'waidiega
'omu 'aisemu 'amu vematavuloga bwaikaotogina a velevelemu.
Kamomuyega 'u na 'iu'iula,
we'e fwayafwaya 'aufofoualina 'u na 'ani'ania
yamu mia tutuya matatabuna 'waineye.
15 Ve 12:17'Omu wata vavine a na kiavekamogalimi, 'wainega tauni'avami 'wa na vegavia.
Wata bani'odi 'omu tubumwavo wata vavine tubunavo taiadi i na vegavia.
Tamu 'waidiega 'unu'unumu i na nikei,
We'e 'age'edu'eduna 'u na ovai.” *Wata 'wa na 'iseni 1 Ioni 3:8
16 'Auvea vavine i voneni i vo,
Veviga venatuna 'waineye a na 'ivebwaiki,
We'e yamu lamoga 'ana nuanua nuamie i na 'eno'eno
siwe i na veveimeyemu.”
17 Ibu 6:8Adama 'waineye i vo,
Fai yamu vavine bonana 'u nogai
bega welavi vuagina a talabodeniga 'u 'ania,
'waimuyega fwayafwaya matatabuna i sako
Bega yamu mia matatabuna 'waineye 'u na vetafewa 'ani'ani 'ana veluaga faifaina.
18 Domwa lovelovenidi i na ve'alatabotabo fwayefwayeye,
siwe 'u na bakubakula, 'wainega 'u na 'ani'ani.
19 'U na folova bwaikina, 'u na ibala
bega 'ani'ani 'u na veluagai.
Mulieta 'u na vilamu 'u na vefwayafwaya bega 'u souyemu.
'Omu fwayafwaya 'aufofoualina, wata bani'odi 'u na vilamu 'u na vefwayafwaya.”
20 Adama yana vavine i goleni Ive fai taunidi nani ma yawaidi matatabudi inadi. 21 Nika 'Auvea Yaubada Adama ma yana vavine 'adi talauma 'aisaya bunudiega i 'idewadi bega i ve'wesenedi. 22 Ve 22:14Mulieta 'Auvea Yaubada i vona i vo, 'Asa'aiana, tomogo 'akonadi 'ida bani'odi, 'atumaina wata sakoina i 'asetadi. Kebu i da lubwaineni Mia-vagata 'ana Welavi vuagina i na 'ania, i na nunago miamia-vagaina i na veluagai.” 23 Begaidi 'Auvea Yaubada bakula Ideni 'wainega i veugeugedi i souyedi, bega Adama fwayefwayeye i na bakubakula, fwayafwayanina 'wainega Yaubada i 'idewai. 24 I veugeugediga, ma'itufa anelose toketokedi 'adi wagava Selebimu i yatodi Bakula Ideni 'waineye, we'e yadi kefata 'ala'alaina i luluvivila. Anelosenidi i tovotovoi bakula lilivaneye, we'e inala lakavinega, Mia-vagata 'ana Welavi 'ana 'eda i na tovibodai.