4
Keni wata Ebeli
1 Adama yana vavine taiadi i veluaga nika i veinainage, mulieta kwamana iavetana i tubuga i goleni Keni. Ive i vona i vo, 'Auvea yana 'aivaita 'wainega kwamana iavetana i tubuga 'waimega.” 2 'Ifwaidi tutuya i 'a'avana, natudi 'ana veluga i tubuga i goleni Ebeli, Keni taina. Natudiavo i taulai, Ebeli 'aisaya sifi 'adi to'isave'avina we'e Keni tobakula. 3 Tamu tutuya 'waineye, Keni 'ani'ani yana bakulayega i miedi bega i na 'anivelenedi 'Auvea 'waineye. 4-5 Ibu 11:4We'e Ebeli yana 'aisaya sifi akavau 'adi tubuga 'atumaidi wata yafayafadi i miedi i 'anivelenedi 'Auvea 'waineye. 'Auvea Ebeli yana 'anivelena i awave'atumaieni, we'e Keni yana 'anivelena kebu i da awave'atumaieni, begaidi Keni i nuasako ma yana luvulewa. 6 'Auvea Keni i velutolieni i vo, Awale 'u nuasako? Maigimu 'ana 'isa ma yamu luvulewa? 7 'Ai'edi yamu sauluva 'atumaina wata magemagetana yau a na awave'atumaiemu. We'e 'ai'edi kebu, sakona i lulukamata vita i na velemu 'wa da vo bani'odi 'aisaya kasikasisina i bodaboda nuanuana tomogo i na luvela'ovi. Sakona nuanuana i na veveimeyemu siwe i lubwainemu 'u na vetoketoke-'iaweni.”
8 Mad 23:35; Luk 11:51; 1 Ion 3:12Keni taina Ebeli i voneni i vo, Ta na nago wala'aie ta na yabayaba.” Tutuyanina i le'wa wala'aie nika Keni taina i nikei i wafa. 9 Mulieta 'Auvea Keni i voneni i vo, Taimu Ebeli, ava'aibe bei?” Keni i tutula i vo, Kebu a da 'asetaiga, yau kebu 'ana to'isave'avinaga.” 10 Ibu 12:24'Auvea i vo, Ava'ai 'u 'idewai? Fwayafwayayega taimu dayagina i taidaida 'waikuye. 11 Tutuya de'e bega i na nagoga 'amu vematavuloga 'u na 'ewai fwayafwaya 'wainega, we'e fwayafwayanina 'waineye taimu dayagina nimamuyega i iloilolo i obuobu, 'wa da vo fwayafwaya 'awana i da o'ei dayaganina i da tononi. 12 Tutuyanina 'u na folofolova fwayafwayanina 'waineye, kebu 'aile'wa 'u na veluagai. Tomotoga 'omu 'adi gavia bega 'u na yaba-vuvua fwayafwaya matatabuna 'waineye.”
13 Keni 'AUVEA i voneni i vo, 'Aku vematavuloga bwaikaotogina, kebu 'aku fata a na tovoieni. 14 Tutuya de'e fwayafwaya wata yamu 'atumaina 'wainega 'u veugeugeku, wata yaku mia 'u fetoi begaidi a na miayaba-vuvua kebu yaku 'eba mia. 'Ai'edi aitoi i na veluagaku, i na luvewafaku.”
15 Siwe 'AUVEA i voneni i vo, Kebu. 'Ai'edi aitoi i na luvewafamuga, 'ana vematavuloga tutuya 7 ma 'ana 'imoso'i i na veveluagai.” Wata'AUVEA tamu tugusa i yatoi Keni 'waineye, bega aitoi nuanuana i na luvewafai, tugusanina i na 'iseni i na baileni. 16 Bega Keni 'AUVEA yana 'atumaina 'wainega i souyeni i nago 'awalawa Nodi bei i mia, bakula Ideni inala yana 'eba laka weyaginega.
Keni tubunavo
17 Mulieta Keni yana vavine taiadi i veluaga, nika i veinainage i venatuna Inoki i tubuga. Keni 'atamana bwaikina 'ana to'aiyogona, begaidi natuna 'ana wagavayega 'atamananina i goleni Inoki. 18 Inoki natuna Iladi, Iladi natuna Meuyaela, Meuyaela natuna Metusaela, Metusaela natuna Lemeki.
19 Lemeki vevine 'adi 'ailuga i nagidi, tamu 'adi wagava Adai, we'e tamu Saila. 20 Adai i venatuna Ibali i tubuga. Kumanina ma enavo vadavada nagami 'waidie i mia, wata nagami 'aisaya 'adi to'isave'avina tamadi. 21 Taina 'ana wagava Iubala, kumanina ma enavo nagami 'eba lauinava gita wata 'umo i 'asetai, 'waidiega i 'wava'wava. 22 Saila natuna iavetana i tubuga, 'ana wagava Tubala-Keni. Tomogonina yana 'aseta bwaikina 'eba folova kainumu wata balonisi tulina tulina 'waidiega i 'i'idewadi. We'e Tubala-Keni novuna 'ana wagava Nama. 23 Tamu 'aiata 'waineye, Lemeki yana vevinevo i vonedi i vo,
Adai wata Saila, bonaku 'wa na nogai.
Yau Lemeki, yaku vevinevo, 'wa na vainenega a na vonemi.
Yau tomogo 'aku daba i daba a luvewafai,
we'e tamu tubuau veviga i veleku a nikei i wafa.
24 'Ai'edi tamu aitoi Keni i na nikeiga, tutuya 'adi 7 'ana vematavuloga i na veluagai,
we'e yau Lemeki, 'ai'edi i na luvewafakuga, 'ana vematavuloga i na veluagai tutuya 'adi 77.”
Seti yana tubuga
25 Adama yana vavine taiadi i veluaga nika i miana, mulieta i venatuna, kwamana iavetana i tubuga i goleni Seti. Ive i vo, Kwamana de'e Yaubada i velema Ebeli tutulina, kumanina Keni i luvewafai.”
26 Seti i vebwaika i nagi, yana vavine i venatuna natuna iavetana i tubuga i goleni Inosi. Tutuyanina 'waineye tomotoga i velamu ma yadi subia 'Auvea 'waineye i 'odu'odu.