6
Fwayafwaya matatabuna sakona i veimeyeni
1 Tutuyanina tomotoga 'adi 'aila'a i vevebwaika fwayefwayeye, wata natudiavo vevine i vevenatunedi. 2 Tomia abama 'ifwaidi*'Ana mogitana vona Ibeliu 'waineye, Yaubada natunavo iavetadi. vevine 'adi 'isa 'atumaidi i 'isedi, bega taunidi yadi venua'ivina 'waidiega i nagidi. 3 Bega 'AUVEA i vona i vo, 'Anu'anunuku kebu a na tauyeni tomotoga 'waidie i na 'eno-vagata, fai tomogodi 'a'a'avidi. Begaidi tutuya de'e 'wainega i velamu i nunagoga, tomotoga 'adi malamala 120 i na veluagai yawaidi i na 'a'ava.”
4 Tomia abamanidi vevine taiadi i veveluaga i vevenatuna, bega tomotoganidi tovemata'ai'ai wata tolugavia ma'adiwagava tutuya basenadi bani'odi. I golegoledi Nefilimi, tutuyanina 'waineye fwayefwayeye i miamiani, wata tutuya i mimaiga tomotoganidi i na souyedi.
Tomotoga yadi sakona i vebwaika
5 Mad 24:37; Luk 17:26; 1 Fit 3:20'Auvea i 'iseni tomotoga yadi sauluva sakoidi i vebwaika-'afo'afo fwayefwayeye. Tutuya matatabuna yadi nuanua wata yadi venua'ivina 'aitamogana 'aitamogana 'asa'aiana sakona-vebogi. 6 Nika 'Auvea nuana i 'uvani wata nuafouna i toke i veviga tomotoga i 'idewadiga fwayefwayeye faifaidi. 7 Bega 'Auvea i vo, Tutuya de'e tomotoga a 'idewadiga a na 'ewayavuledi fwayafwaya 'wainega, tomotoganidi, 'aisaya bwaikidi, 'aisaya daledaledi wata manuga taiadi, mogitana nuaku a 'uvani a 'idewadiga faifaidi. 8 Siwe Noa 'aisena yana sauluva tonovina bega 'Auvea i awave'atumaieni.
Noa ifuifufuna
9 2 Fit 2:5De'e Noa 'ana wauma ifuifufudi.
Noa yana sauluva 'atumaina wata magemagetana, 'aiseotogina kumanina kebu tamu yana sakonaga tomia fwayafwaya matatabuna 'waidiega, we'e Yaubada i labilabini. 10 Noa natunavo iavetadi 'adi 'aitonu Semi, Ami wata Iefeta. 11 Tutuyanina 'waineye Yaubada mataneye tomia fwayafwaya yadi sauluva sakoina i vebwaika-'afo'afo wata i vevetalaga-vebogi. 12 Yaubada i 'iseni 'asa'aiana sakona i veveimea fai tomia fwayafwaya matatabudi yadi sauluva i sako-'afo'afo. 13 Bega Yaubada Noa i voneni i vo, Tutuya de'e 'waineye a nuani tomotoga bei a na ve'ilovedi wata a na luvela'ovidi fai i veve'inikenike bega fwayafwaya matatabuna 'waineye vetalaga i vevebwaika. 'Asa'aiana, tomotoganidi wata fwayafwaya taiadi a na 'u'umidi.
14 Bega waka tamu 'u na yogoni welavi saifilosi†Saifilosi welavi fa'alina waka 'eba 'aiyogona, kebu yana buta-matayo'oga 'wainega, wakanina nagena, dolena wata 'ayana taiadi koluta‡I fitai koluta 'wainega nika ufa kebu i na susula i na luku waka nageneye. 'wainega 'u na dekuya. Tutudaba 'u na bibini bega 'awasasa i na vefue. 15 Waka side bani'odi 'u na 'aiyogonayedi. 'Ana vemanawe 140 mita, 'ana vebababa 23 mita wata 'ana velaka 14 mita. 16 Waka 'ana saila'a 'u na tutuya welavi 'wainega wata tutubweka 'u na yatoi waka i na luvivili saila'a dibuneye, 'ana velaka nimamu 'ana tubwa 'ana vemanawe. 'Awa ma 'ana saiboda 'u na 'idewai bibina lilivaneye, we'e talalia 'aitonu 'u na liadi waka nageneye, tamu dibuneye, tamu kamwaneye wata tamu tabwaneye.
17 'U na vainenega, tutuya 'ale'usana 'waineye, nani ma yawaidi fwayefwayeye a na luvela'ovidi wayagata bwaikina 'wainega. Nani matatabuna i na ve'alawafawafa.” 18 Wata Yaubada i vo, Yaku veakutagona a na 'idewai 'omu 'waimuye, 'u na dodoga wakeye, yamu vavine, natumwavo iavetadi ma yadi vevinevo taiadi. 19 'Aisaya ma yawaidi matatabudi fatala tulina tulina 'waidiega 'ailuga 'u na vedodogidi wakeye. 'Aisayanidi iavetana 'aitamogana wata vevinena 'aitamogana ma yawaidi taiadi 'wa na miamia wakeye. 20 Manuga, 'aisaya bwaikidi, siaidi wata daledaledi 'u na vedodogidi. 'Aisayanidi ma 'adi 'auvo yavoga tulina tulina 'waidiega i na maia, bega 'u na 'isave'avinidi ma yawaidi i na miamiani. 21 'U na toke 'ani'ani tulina tulina 'u na 'ewadi, i na 'a'avana 'u na vedodogidi 'omi wata 'aisaya 'ami'ami.” 22 Ibu 11:7Noa nani matatabuna i 'idewadi ava'ai Yaubada i voneyeniga.