1 Nani matatabuna i ve'a'avadina, 'AUVEA Noa i voneni i vo, 'Omu ma yamu 'aila'avo wakeye 'wa na dodoga fai 'omu 'aisemu yamu sauluva tonovina matakuye tomotoga matatabudi 'waidiega. 2 'Aisayanidi a awave'atumaiedi*'Ana mogitana vona Ibeliu 'waineye, 'aisaya vunavunagidi. velomu faifaina fatala tulina tulina 'waidiega, iavetadi 7 wata vevinedi 7 'u na 'ewadi we'e 'aisayanidi kebu a da awave'atumaiediga 'ailuga 'ailuga 'u na 'ewadi, iavetadi wata vevinedi. 3 Wata bani'odi manuga, yavoga tulina tulina 'waidiega, iavetadi 7 wata vevinedi 7 'u na 'ewadi bega 'waidiega i na venatuvea'wa fwayafwaya 'waineye bega yavoga tulina tulina ma yawaidi i na miamia. 4 'Aiata 7 i na 'a'ava, mulieta a na ve'wei. 'Aiata 40 wata lovana 40 nagedie 'wei bwaikina i na 'wei'wei fwayefwayeye. 'Weinina i na nagoga nani matatabuna ma yawaidi a 'idewadiga fwayefwayeye a na ve'a'avadi.” 5 Naninidi matatabuna 'Auvea Noa i voneniga, i 'idewa'a'avadi.

6 Tutuyanina Noa 'ana malamala 600 i veluagai mwai bwaikina fwayafwaya i ulai. 7 Noa ma yana vavine, wata natunavo yadi vevinevo taiadi i dodoga wakeye mwai bwaikina 'wainega i 'ita'ita'iedi. 8 Wata bani'odi 'aisaya tulina tulina, 'ifwaidi 'eba 'ani wata 'ifwaidi 'eba velomu, manuga wata 'aisaya siaidi daledaledi matatabuna taiadi i dodoga. 9 Yaubada Noa 'ana veimea i voneniga 'asa'aiana bani'odi i vetutuyameni, begaidi 'aisaya 'ailuga 'ailuga i luku waka nageneye, iavetana wata vevinena. 10 'Aiata 7 i 'a'ava, mulieta weyagata wata ufa bwaikina fwayafwaya i ulatavutavuni.

11 Tutuyanina Noa 'ana malamala 600 i veluagai, weta'i 'ana veluga 'aiata 17 'waineye, fwayafwaya matatabuna dibunega ufa i vunala wata abamayega 'wei yavaleta ma lufwalufwana i obu. 12 I 'wei 'wei 'aiata 40 wata lovana 40 nagedie.

13 'Aiatanina 'waineye, Noa ma yana vavine, natunavo 'adi 'aitonu, Semi, Ami wata Iefeta yadi vevinevo taiadi i luku waka nageneye. 14 'Aisaya tulina tulina, iavetana wata vevinena, 'aisaya tauvanuga wata 'aisaya walawala'ai, bwaikidi wata siaidi, manuga tulina tulina ma fafedi. 15 'Aisaya ma yawaidi matatabuna 'waidiega, 'ailuga 'ailuga i mai Noa 'waineye, mulieta i luku waka nageneye. 16 Fai bani'odi Noa 'ana veimea Yaubada i voneniga i vetutuyameni, 'aisaya tulina tulina iavetana wata vevinena i luku waka nageneye. Mulieta 'Auvea waka 'ana 'awa i simawai.

17 'Aiata 40 nagedie wayagata i vevebwaika nika ufa fwayafwaya i ulai i veawana, waka i ulalakai i lu'afueni.

18 Mwai i vebwaika-'afo'afo nika waka i ulalakai ufa tabwaneamo 'atumaina i lulu'afueni. 19 Fwayefwayeye avinodi 'oya manamanawetogidi, siwe i ula-vuyovuyoidi. 20 Mwai i ula i laka 'oya manamanaweotogidi i ula-tavutavunidi, wata sai'afo i vagalaka 'ana 'etoava bani'odi 7 mita. 21 Nani matatabuna fwayefwayeye ma yawadi bani'odi manuga, 'aisaya tauvanuga, 'aisaya walawala'ai, 'aisaya siaidi daledaledi fwayafwaya tabwaneye, wata tomotoga matatabudi i ve'alawafawafa. 22 Nani matatabuna yawayawaidi i miamiani fwayafwafwaya lalana 'waineye, i ve'alawafawafa.

23 Nani ma yawaidi i miamianiga fwayefwayeye matatabudi 'Auvea i ve'a'avadi, tomotoga, 'aisaya bwaikidi, siaidi i daledale wata manuga, matatabudi i ve'alawafawafa fwayefwayeye. Noa ma yana 'aila'avo, 'aisayanidi waka nageneye taiadi 'aisedi i luvegalaladi. 24 'Aiata 150 nagedie wayagata fwayafwaya i ulai.