1 Yaubada Noa wata 'aisayanidi waka nageneye i nuanidi, bega kaukau i butuya fwayafwaya i na yagivelalai, nika wayagata i velamu i na dakwalili.

2 Fwayafwayayega ufa i vunavunalaga i kiabodai, wata abamayega yavaleta bwaikina i 'wei'weiga i tova. 3 Fwayafwayayega mwai i velamu i 'awalia i obuobu. 4 'Aiata 150 i 'a'ava weta'i 'ana ve 5 'waineye, wayagata bwaikina i velamuga, wata 'ana weta'inina i veluagai, waka i miabui 'oya Alalati tabwadie. 5 Weta'i 'ailuga wata 'ana vetonu we'e kamwaneye, wayagata bwaikina i velamu i 'awalia i obuobu, nika 'ifwaidi 'oya tabwa'avadi i vemageta.

6 'Aiata 40 i 'a'ava, mulieta Noa waka 'ana tutubweka i 'idewaiga i sibaleni. 7 Nika bwayobwayo i vetunei i nago 'ani'ie wata i vilai mai, i yaveyavega ufa tabwaneamo 'ana tugusa wayagata bwaikina i lala. 8 Wata bunebune i vetunei i nago i lauala nuanuana fwayafwaya lalana i na veluagai. 9 Siwe bunebune kebu tamu yana 'eba toa i da veluagai, begaidi i vilai i nago wakeye. Tutuyanina i le'wa, Noa waka 'ana tutubweka 'wainega nimana i 'iyoyoeni nimaneye i toa, i lukuveni waka nageneye. 10 I lulukamata 'aiata 7 i 'a'ava, mulieta Noa bunebune wata i vetunei. 11 Lavilavie bunebune i vilai i mai 'waineye, 'awaneye welavi olive lukuna yauyauvina i 'alagagai. Bega Noa i 'asetai, mwai bwaikina 'akonadi i lalala. 12 I lulukamata 'aiata 7 i veluagai, wata bunebune i vetune-vaitugani. Yana nagonina 'waineye kebu i da vilai.

13 Noa 'ana malamala 601 i veluagai, malamala 'ivauna 'ana 'aiata kumekumetana 'waineye, weta'i 'ana ve-10 i 'a'ava, 'ana ve-11 we'e kamwaneye, wayagata wata ufa bwaikina fwayafwayayega i lala. Waka nagena ta'uta'ula i sidadei, i 'iseni fwayafwaya 'akonadi i vemageta. 14 Weta'i 'ana veluga 'aiata 27 'waineye, fwayafwaya matatabuna i lalala.

15 Yaubada Noa i voneni i vo, 16 'Wa souyemi waka 'wainega, 'omu, yamu vavine, natumwavo wata yadi vevinevo taiadi. 17 Tutuyanina 'u na souyemuga 'aisayanidi matatabuna taiadi, bani'odi manuga, 'aisaya bwaikidi wata siaidi i daledale fwayefwayeye. 'U na veyavulidi i na 'a'avana i na venatuvea'wa nika i na vefue fwayafwaya i na luvaia.”

18 Yaubada i veifufu i 'a'avana, Noa ma yana vavine wata natunavo yadi vevinevo taiadi i souyedi wakayega. 19 'Aisaya walawala'ai wata 'aisaya tauvanuga, kumanidiavo i yabayaba wata i daledale, manuga i yaveyavega, nani matatabuna i miamianiga fwayefwayeye ma 'adi 'auvo i souyedi wakayega.

20 I souyedi i 'a'avana, Noa nuanuana 'Auvea i na subiai bega 'eba velomu i didigi i na velomu 'waineye. 'Aisaya wata manuga tulina tulina basenadi i awave'atumaiediga*'Ana mogitana vona Ibeliu 'waineye, 'aisaya vunavunagidi. velomu faifaina, 'ifwaidi i miedi bega i velomuyedi i kabunidi 'waineye. 21 Magaina 'iwanina 'wainega i sosoana bega taunina 'waineye i vo, Kebu wata tamu tutuya fwayafwaya a na vematavulogi. Avinodi tomotoga i vevenua'ivina sakona faifaina yadi tutuya kwamana 'wainega, siwe kebu wata fwayafwaya a na 'ivesako-vaitugani. We'e mogitana kebu tamu tutuya nani matatabuna ma yawaidi a na luvela'ovidi, bani'odi 'akonadi a 'idewai. 22 Fwayafwaya 'asa'aiana i na 'eno'eno, tutuya koyova wata tutuya 'aiala, tutuya fayo wata tutuya yauyauta, tutuya 'aikolu wata tutuya 'idi, lovana wata 'aiata, tutuyanidi matatabuna kebu i na 'a'ava.”