9
Yaubada yana veakutagona i 'idewai Noa 'waineye
1 Nag 1:28Yaubada Noa ma natunavo i vesauluva-'atumaiedi bega i vonedi i vo, 'Wa na venatuvea'wa 'ami 'aila'a i na vebwaika nika fwayafwaya 'wa na luvaia. 2 'Aisaya bwaikidi, siaidi daledaledi, manuga wata igana, 'asiau wata tutuya i mimai 'waidie i na kololoyemi we'e 'omi 'wa na veveimeyedi. 3 Basenadi mosomoso wata 'ai vuavuaga a velemi yami 'eba 'ani. 'Asiau bega i na nunagoga wata 'aisaya a tauyemi, 'waidiega 'wa na 'ani'ani. 4 Vei 7:26,27; 17:10-14; 19:26; VeL 12:16,23; 15:23Siwe kebu 'aisaya dayadayagina 'wa na 'aniaga fai dayaga yawaimi lamuna. 5 'Ai'edi aitoi tamu tomogo i na nikei bega dayagina yana iloilolo 'wainega i na wafa, i lubwaineni to'ainikenina 'ana tutula wata i na wafa. 'Ai'edi tamu 'aisaya tomogo i na ovai i na wafa, 'aisayanina i na nikei i na wafa. Aitoi tomogo iana i na nikei i na wafa, i lubwaineni tomogonina wata i na wafa.
6 Sou 20:13; Nag 1:26Yaubada tomotoga i 'idewadi taunina 'ana 'isa'isa bani'odiga.
Begaidi aitoi tamu iana i na nikei i na wafa, i lubwaineni tomogonina wata i na wafa.
7 Nag 1:28We'e 'omi 'wa na venatuvea'wa bega 'ami 'aila'a i na vebwaika fwayafwaya 'wa na luvaia.” 8 I 'a'avana Yaubada Noa ma natunavo i vonedi i vo, 9 Tutuya de'e yaku veakutagona a 'idewai 'omi wata tubumiavo taiadi 'waimie. 10 Wata veakutagonanina a na 'idewai 'aisayanidi wakayega 'omi taiadi 'wa souyemiga 'waidie, bani'odi manuga, 'aisaya walawala'ai wata tauvanuga. 11 Yaku veakutagonanina side bani'odiga. Kebu wata tamu tutuya nani ma yawaidi a na luvewafadiga wayagata 'wainega. 'Asiau bega i na nagoga kebu wayagata 'wainega fwayafwaya a na luvela'ovi.” 12 Wata Yaubada i vona i vo, De'e yaku veakutagona 'ana 'eba 'isa a na yatoi faifaimi. 'Omi, nani ma yawaidi matatabudi wata lakata i mimaiga taiadi. 13 Yaku abavole 'akonadi a yatoi waowa 'waineye, kumanina yaku veakutagona tomia fwayafwaya matatabumi 'waimie 'ana tugusa. 14-15 Tutuyanina waowa a na mieni fwayafwaya tabwaneye nika abavole 'wa na 'iseni, yaku veakutagona a na nuave'avini 'waimie wata nani ma yawaidi fuedi 'waidie. Side bani'odi. Kebu tamu tutuya tomia fwayafwaya matatabumi wayagatayega a na luvela'ovimi.
16 Tutuyanina abavole waowa 'waineye a na 'iseni nika a na nuani de'e yaku veakutagona 'eno'eno-vagaina 'ana tugusa, yau Yaubada wata nani matatabuna ma yawaidi i miamiani fwayefwayeye faifaidi.” 17 Begaidi Yaubada Noa i voneni i vo, E'e, de'e abavolenina yaku veakutagona 'ana tugusa, wata nani matatabuna fwayefwayeye faifaidi a vona'awaufaufa.
18 Noa natunavo wakayega i souyediga 'adi wagava side, Semi, Ami wata Iefeta. Ami natuna Kenani. 19 Noa natunavo 'adi 'aitonu 'waidiega, fwayafwaya matatabuna i luvaia.
20 Tutuyanina mwai bwaikina i 'a'ava, Noa bakula i velamu kalefa talagina i bakuli. 21 Tamu 'aiata 'waineye oine taunina i 'idewaiga i yemu nuana i lugaugauya, konekonena i 'eno'eno vadavada nageneye. 22 Ami kumanina Kenani tamana, tamana i 'iseni, nika i souyeni tanotanoge enavo i vonedi. 23 Bega Semi wata Iefeta tamu talauma i 'ewai, 'avaladiega i kiave'avini mulidiega i luku vadevadeye tamadi konekonena i velu'uvai. Maigidi i siviviedi bega kebu tamadi i na 'iseni konekonena
24 Tutuyanina oine yana toketokena i 'a'ava i tovoi, nika i 'asetai ava'ai Ami yana tubu-'walaboda i 'idewaiga 'waineye i 'iseni. 25 Bega Noa Kenani i awavesakoyeni, kumanina Ami natuna i vo,
I lubwaineni Kenani vita bwaikina i da veveluagai.
I da vetofolova-maimaiga yana 'aila'a 'waidie, taunina bani'odi tofolova-maimaiga.”
26 Mulieta Noa i vo,
'Auvea ta na subiai, taunina Semi yana Yaubada.
we'e Kenani i da vetofolova-maimaiga Semi 'waineye.
27 Nuanuaku Yaubada Iefeta yana 'eba veimea i da 'ivebwaiki,
wata tubunavo 'ai'aiwabu i da veluagai Semi yana 'aila'a 'waidiega,
we'e Kenani i da vetofolova-maimaiga Iefeta 'waineye.”
28 Tutuyanina wayagata bwaikina i 'a'ava, Noa i miamia 350 malamala . 29 I miamia 'ana malamala 950 i veluagai, mulieta yawaina i 'a'ava.