5 Bega tofolovanina i velutoli i vo, Bani'odi a na munega 'ai'edi vavine ne'e'elina a na veluagai siwe kebu nuanua taiadi a na maiga? 'Ana fata Aisake a na vagavaia taiadi 'a na nago, 'awalawanina 'wainega 'u maiga 'waineye i na mia?”

6 Ebelamo i vo, 'U na 'asetai, kebu tamu sai'afo natuku a da tauyeni bega 'u na naweni. 7 'Auvea Yaubada abame i vagavaiku tamaku yana 'eba mia wata 'aku tuvada 'wainega, i vona'awaufaufa 'waikuye i vo, De'e fwayafwayanina matatabuna i na 'aniveleneni tubukwavo 'waidie.’ Wata 'Auvea yana anelose i na vetunei i na kumeta awasasadie i na miamia nika bei natuku yana vavine 'u na vagavaia. 8 'Ai'edi vavinenina kebu nuanuana taiadi 'wa na maiga, 'omu 'akonadi yavuyavumu vona'awaufaufanina 'wainega. Siwe kebu tamu sai'afo natuku a da tauyeni taiadi 'wa na vilami 'atamananina 'waineye.”

9 Bega tofolovanina yana vona'awaufaufa i kiavetoketokei, 'ana toveimea Ebelamo 'abi'abina dibuneye i yatoi bega yana vona'awaufaufa i 'idewaiga i na vematayakeyakeni. 10 Mulieta tofolovanina Ebelamo yana kameli 'adi 10 i 'ewadi, nuakalikali 'adi tutula bwaikidi tulina tulina 'ana toveimea i veleni kameli kwavudie i vedodogidi. I 'idewadewa i 'a'avana nika i tauya i nago Alami-Na'alimi, bei Ebelamo taina Naoli i miamia. 11 'Akonadi i lavia bega Ebelamo yana tofolova, 'aisaya kameli 'agedi i vetufano'uyedi ufa lilivaneye. Tutuyanina 'waineye vevine i mimaia ufa koi faifaina.

12 Mulieta tofolovanina i velu'ui i vo, 'Auvea, 'omu 'aku toveimea Ebelamo yana Yaubada, 'asiau ava'ai a na 'idewaiga 'u da 'ivaiseku wata 'u da vevesauluva 'atumaina 'aku toveimea Ebelamo 'waineye. 13 Yau side a tovotovoi ufa-luluvuala lilivaneye, vevine tubuvauvau 'atamananina 'ana tomotoga i mimaia ufa koi faifaina. 14 Yaku nuanua side bani'odi. Vevinenidi 'waidiega tamu a da voneni a da vo, 'Ana fata yamu 'eba koi ufa 'u da koia 'u da veleku a da yemu?’ 'Ai'edi vavinenina i na vo, Ufa side 'u yemu, wata yamu kameli a na veyemudi,’ 'asa'aiana vavinenina 'u venua'ivineni Aisake faifaina, bega a na 'asetai 'akonadi 'u vesauluva 'atumaina 'aku toveimea 'waineye. De'e bani'odi i na ve 'waikuye nika a na 'asetai 'aku toveimea 'u nunuakalikalieni mogitana.”

15 Bola kebu i da velu'ui i 'a'ava, nika tamu vavine ne'e'elina i 'iseni yana 'eba koi ufa i gabai i mimai. 'Ana wagava Libeka, vavinenina Betueli natuna, Ebelamo taina Naoli yana vavine Milika natudi. 16 Libeka 'ana 'isa 'atumaiotogina, kebu i da nagiga wata bola kebu tamu aitoi taiadi i da veluaga. I nago ufa-luluvuala 'waineye 'ana ufa 'eba koi i veadagi, i 'a'ava i vilai i lakama. 17 Bega tofolovanina i lilide i nago i voneni i vo, Nuanuaku ufa siaina 'u da veleku a da yemu yamu ba'ala 'wainega.”

18 Vavine i vo, 'Aku toveimea, ufa side 'u yemu.” Bega ba'ala 'avalanega i sita'ia i obu nika i veleni i yemu. 19 Tutuyanina ufa i yemu 'a'avana i vo, Wata yamu kameli 'adi ufa a na koidi i na yemu, nika matatabudi i yemu i nagoga nika 'adi sala.” 20 Bega i lilide i nago yana ba'ala ma ufana iwagi 'eba yemu 'waineye, i vilai i nago ufanina 'waineye moso'ina i koia, bega matatabudi i yemu i nagoga nika 'adi sala.

21 Tofolovanina i ve'wada i 'ise'iseni wata i vevenua'ivina i vo, Voke 'Auvea yana folova faifaina i 'ive'atumaia 'alo kebu?” 22 Tutuyanina kameli i yemu 'a'ava, mulieta tofolovanina didikumakuma golida kabunina faifaina, wata nifuna golida 'ailuga nima'odona faifaidi i yatodi.

23 Mulieta i velutolieni i vo, 'Omu aitoi natuna? Nuanuaku 'u da voneku, tamamu yana vanuge 'aivia tutudaba i 'eno'eno bei 'a da 'eno lovana faifaina?”

24 Yana velutoli tutuli i vo, Yau Betueli natuna, Naoli wata Milika taiadi tubudi. 25 Nika i voneni i vo, E'e 'ima 'waimeye 'aisaya yadi 'eba 'eno wata 'adi mosomoso bwaikina yadi 'eba 'ani, we'e tamu tutudaba i 'eno'eno wakawaka faifaidi bei 'wa na 'eno.”

26 Bega tomogo ma yana ve'ililibu i 'odu 'Auvea 'waineye. 27 I vo, 'Auvea a na subisubiai, taunina 'aku toveimea Ebelamo yana Yaubada. Fai ma yana nuakalikali 'eno'eno-vagaina i vevesauluva 'atumaina 'aku toveimea 'waineye. We'e yau 'asiau, 'Auvea kumanina i 'edakumeseku bega tonoviku a le'wa, 'aku toveimea yana 'aila'avo 'waidie.”

28 Nika vavine i lilide i nago vanuge, ava'ai souyeniga matatabuna i veifufuyeni yana 'aila'avo 'waidie. 29 Libeka novuna 'ana wagava Lebani, i lilide i nago tomogo i veluagai ufa luluvuala lilivaneye i tovotovoi. 30 Tutuyanina i le'wa, i 'isanago novuna kabuni 'ana didikumakuma wata 'ana nifuna i 'iseni nimaneye i 'eno'eno wata Libeka yana veifufu i nogai tomogo i veifufuyeni 'waineye. Bega i lilide i nago ufa-luluvuala 'waineye, tomogo i 'iseni kameli taiadi i tovotovoi. 31 Bega Lebani i voneni i vo, 'Omu 'akonadi 'Auvea i vesauluva 'atumaina 'waimuye, 'u mai ta na nago vanuge. Kebu i da lubwaineni mwalilige 'u na tovotovoi fai yamu vanuga wata kameli yadi 'eba mia 'akonadi i 'eno'eno.”

32 Bega tomogonina i nago Lebani yana vanuge, kameli 'waidiega kukua i siobuyedi i 'a'avana, kameli yadi 'eba 'eno mosomoso bwavudi i veledi, wata kameli i ve'anidi, mulieta ufa i mieni yana tofolovavo taiadi i veledi 'agedi i lekoadi. 33 Mulieta 'ani'ani i 'idewai i mieni i yatoi i na ve'ala'ani faifaina siwe tofolovanina i vo, Kebu a na 'aniga, nagami yaku mai faifaina a na veifufuyeni 'waimuye.”

Lebani i vo, 'Atumaina 'u veifufu 'waimeye.”

34 Bega tomogo i vo, Yau Ebelamo yana tofolova. 35 'Auvea ma yana nuakalikali i vesauluva 'atumaina 'aku toveimea 'waineye bega i ve'ai'aiwabu mogitana. Sifi wata bulumakau fuedi, mani bwaikina, golida wata siliba, tofolovavo iavetadi wata vevinedi, kameli wata doniki i veleni. 36 Tutuyanina 'aku toveimea yana vavine Sela i vemo'ai i venatuna, 'aku toveimea natuna iavetana i tubuga. Wata 'aku toveimea yana kukua matatabuna i 'anivelenedi natuna 'waineye bega i na veimeyedi. 37 'Aku toveimea yana nuanua i veleku bega a vona'awaufaufa mataneye a na 'idewai. I velu'ase'aseku i vo, Kebu 'a da tauyemu bega Kenani 'ana vavine natuku i na nagia. 38 We'e mogitana 'u na nago tamaku yana 'aila'a mogitana 'waidie, natuku yana vavine 'u na vagavaia 'u na mieni.’

39 Wata yaku 'auvea a velutolieni a vo, 'Ai'edi vavine ne'e'elina 'a na veluagaiga, siwe kebu nuanuana taiadi a na maiga bani'odi a na munega?’ 40 I voneku i vo, 'Auvea, kumanina tutuya fuedi taiadi 'a miamia, yana anelose i na vetunei 'waimuye taiadi 'u na nago, yamu folova i na 'ive'atumaia bega 'u na nago yaku 'aila'a mogitana 'waidie tamu vavine 'u na veluagai natuku faifaina. Taunina tamaku yana 'aila'avo wata 'ana wauma mogitana 'wainega. 41 Naninina faifaina 'a vonemuga 'akonadi 'u na 'idewai yaku 'aila'avo 'waidie, siwe 'ai'edi kebu vavine i na tauyeni taiadi 'wa na maiga,'omu yavuyavumu yaku vona'awaufaufa 'wainega.’ ”

42 Wata 'waidie i vo, 'Asiau a le'wa ufa-luluvuala 'waineye a velu'ui a vo, 'Auvea, 'omu 'aku toveimea Ebelamo yana Yaubada, nuanuaku yaku folova 'u da 'ive'atumaia. 43 Side bei a na tovotovoi ufa-luluvuala lilivaneye. 'Ai'edi tamu vavine ne'e'elina i na mimai ufa koi faifaina, a na voneni a na vo, Nuanuaku yamu 'eba koi 'wainega ufa siaina 'u da veleku a da yemu.” 44 'Ai'edi vavine i na vo, Ufa side, 'u mai 'u yemu, wata yamu kameli 'adi ufa a na ko'idi,”'asa'aiana kumanina 'u venua'ivineni bega taiadi a na nago 'aku toveimea natuna taiadi i na nagi.’

45 Bola yaku nuanuayega a vevelu'ui'Auvea 'waineye , nika Libeka a 'iseni ufa a na ba'ala 'avalaneye i mimai, a obu ufa 'eba koi 'waineye a voneni a vo, Nuanuaku ufa 'u da veleku 'a da yemu.’ 46 I lilide yana 'eba koi i siobuyeni i voneku i vo, Ufa 'u yemu, wata yamu kameli a na veledi i na yemu.’ Bega a yemu, i 'a'avana wata kameli matatabudi ufa i veledi i yemu.

47 Bega a velutolieni a vo, 'Omu aitoi natuna?’ I vo, Yau Betueli natuna, Naoli wata Milika tubudi.’ Bega kabuni 'ana didikumakuma a yatoi kabunineye, wata nimaneye nifuna 'adi 'ailuga a veagedi.

48 Mulieta ma yaku ve'ililibu a 'odu 'Auvea 'waineye. 'Auvea, 'aku toveimea Ebelamo yana Yaubada a subiai wata a vekaiwa 'waineye, fai kumanina i 'edakumeseku 'aku toveimea Ebelamo taina tubuna vevinena, i na nagia. 49 'Ai'edi 'aku toveimea yana nuanua 'wa na sosoaneniga, ma yami nuakalikali 'wa na vesauluva 'atumaina 'waineye, nuanuaku 'wa voneku bega a na 'asetai, 'wa sosoana 'alo kebu? Mulieta a na venua'ivina ava'ai wata a na 'idewai.”

50 Bega Lebani wata Betueli yana vona i tutuli i vo, 'Akonadi 'a 'asetai 'Auvea i kumesemi 'wa mai de'e bei. Begaidi kebu 'ana fata tamu ava'ai 'a na veifufuyeni 'waimie. 51 Libeka side. 'U na vagavaia 'wa na nago nika 'amu toveimea natuna taiadi i na nagi, bani'odi 'Auvea i voneyedi 'waimuye.”

52 Tutuyanina Ebelamo yana tofolova yadi vona i nogai, i lumata'afufu 'Auvea mataneye i 'odu. 53 I 'a'avana, tofolovanina 'eba vaigavu kileu golida wata siliba, kaleko 'adi 'isa 'atumaiotogidi i miedi Libeka i veleni. Wata kukua 'adi tutula bwaikidi novuna iavetana wata inana taiadi i veledi. 54 Mulieta 'ani'ani i ve'ala'ani wata i yemu, nika bei i veawai, tofolova ma enavo i 'eno i nagoga nika i 'atai.

I 'atai 'awa'awaiogose tofolovanina i vona i vo, 'U da tauyeku a da vilaku 'aku toveimea 'waineye.”

55 Siwe Libeka novuna wata inana i vo, Nuanuama Libeka taiadi 'a na miamia 'aiata 10 ma 'ana 'imoso'i i na 'a'avana, mulieta taiadi 'wa na nago.”

56 Siwe tofolovanina i vo, Kebu 'wa na talabodeku mia faifaina, fai 'Auvea yaku folova i 'ive'atumaia. 'Asa'aiana 'wa da vetuneku, bega a da vilaku a na nago 'aku toveimea 'waineye.”

57 Nika novuna wata inana i vo, Libeka 'a na goleni i na mai, a na velutolieni yana nuanua mogitana ta na 'asetai.” 58 Bega Libeka i goleni i mai i velutolieni i vo,

Nuanuamu tomogo de'e taiadi 'wa na nago?” I vo, E'e, a na nago.”

59 Begaidi Libeka i 'alanuaidi i 'a'avana, nika Ebelamo yana tofolova ma yana 'aila'avo taiadi i vetunedi. We'e Libeka basenadi siaineye 'ana to'isave'avina taiadi i nagoi. 60 Tutuyanina Libeka i na tauya yana 'aila'avo i vona-nuakalikalieni i vo,

62 We'e Aisake i vilai i mai Bia-Lai-Loi 'wainega, yana 'atamana bei i miamiaga Negevi 'waineye. 63 Tamu lavilavi 'waineye Aisake tanoga 'waineamo i nunago wata i vevelu'ui, nika i 'isanago kameli i 'isedi i mimaia. 64 Tutuyanina Libeka i 'isalaka Aisake i 'iseni nika i obu kameli 'wainega. 65 Bega i velutoli tofolovanina 'waineye i vo, Aitoi tomogoga i mimai 'waideye?”

Tofolovanina i vo, Tomogo 'asa'aiana yaku 'auvea.” Begaidi Libeka 'unu'ununa 'ana baniuma i 'ewai i baniumai. 66 Bega tofolovanina Aisake 'waineye i veifufu nani matatabuna i 'idewadiga faifaidi.

67 Aisake Libeka i mieni inana Sela yadi vanuga naya 'waineye, bei i nagia yana vavine. Aisake yana vavine i nuakalikalieni bwaikina fai inana yawaidi i 'a'ava, begaidi vavinenina kumanina nuana 'ana to'iveoloolo.