25
Ebelamo yawaina i 'a'ava
1 Wata Ebelamo tamu vavine i nagidi, 'adi wagava Ketula. 2 Mulieta Ketula i venatuna side 'adi wagava i veledi, Similani, Iokesani, Medani, Midiani, Isibaki, Sua. 3 Iokesani natunavo Siba wata Dedani. Dedani tubunavo 'aila'a 'aitonu 'wainega i souyedi, 'adi wagava me Asula, me Letusi wata me Leumimi. 4 Midiani natunavo side 'adi wagava, Efa, Efeli, Anoka, Abida, Elidada. Tomotoganidi matatabudi Ebelamo wata Ketula tubudiavo.
5 Ebelamo yana kukua matatabuna i 'anivelenedi Aisake 'waineye. 6 We'e bola Ebelamo kebu i da wafaga, Ebelamo yana vevinevo 'adi 'ailuga, natudiavo nuakalikali 'aitamogana 'aitamogana i veledi, mulieta i vetunedi i nagoi tamu 'awalawa inala yana 'eba laka weyaginega, Aisake i miamiaga 'wainega.
7 Ebelamo i miamia i nagoga 'ana malamala 175 i veluagai. 8 'Akonadi i ve'auvea-'afo'afo mulieta i wafa, ma yana sosoana i miamia i nagoga mulieta yawaina 'eba ve'a'ava i tauyavuleni nika tubunavo mulidie i nago. 9 Natunavo Aisake wata Isimeli i nago ovu Makifela 'waineye bei i ve'ufai, 'atamana Mamile lilivaneye. Efiloni natuna Soa kumanina tomogo Aiti, yana tanoga nageneye. 10 Tanoganina basenadi Ebelamo i kimwanei me Aiti 'waidiega. Bei yana vavine Sela i ve'ufadi. 11 Tutuyanina Ebelamo i wafa, Yaubada Aisake i vesauluva 'atumaina 'waineye. We'e yana 'atamana i 'idewai Bia-Lai-Loi lilivaneye 'awalawa Negevi 'waineye.
Isimeli tubunavo
12 De'e Isimeli natunavo wata yana 'aila'a 'adi veifufu, Ebelamo wata Ega taiadi natudi. We'e Sela yadi tofolova-maimaiga Itifita 'wainega. 13 Isimeli natunavo side 'adi wagava wata 'adi wauma. Tulaiotogina Nebeiota, mulineye Keda, Adabeli, Mibisema, 14 Misima, Duma, Mesa, 15 Adadi, Tema, Ietulo, Nafisi, wata Kedema. 16 Isimeli natunavo 'adi 12 taunidi wauma 12 'adi to'edakumetavo, 'adi wagava yadi 'atamana wata yadi 'eba veimea 'aitamogana 'aitamogana bei i miamia. 17 Isimeli i miamia i nagoga 'ana malamala 137 i veluagai, mulieta yawaina 'eba ve'a'ava tauyavuleni i 'awatagoni nika i wafa tubunavo mulidie i nago. 18 Isimeli tubunavo 'adi wauma 'awalawa 'aitamogana 'aitamogana i luvaidi. Yadi 'atamana Avila 'wainega i velamu i nagoga 'ana tugusa Sula, inala yana 'eba laka, Itifita wata Asula 'weyagidiega. Isimeli tubunavo kumanidi tonuasako wata todaba yadi 'aila'avo matatabuna i vevegaviedi.
Iso wata Iakobo yadi tubuga
19 Ebelamo natuna Aisake wata natunavo ifuifufudi side bani'odi. 20 Tutuyanina Aisake 'ana malamala 40 i veluagai, nika Libeka i nagia. Libeka tamadi Betueli we'e novuna Lebani. Tomotoganidi me Alami i miamia 'awalawa Mesafotemia 'waineye. 21 Libeka kakalina kebu tamu natunaga, bega Aisake i velu'ui 'Auvea 'waineye yana vavine faifaidi. 'Auvea yadi velu'ui i nogai, nika Libeka i miana kwakwama 'adi 'ailuga umwadie. 22 Kwakwamanidi i vetunufelafelagi, nika inadi i nago i velu'ui 'Auvea 'waineye i vo, Ava'ai i sousouyeni 'waimeye?”
Kwakwamanidi 'adi 'ailuga i na tubuga, 'waidiega 'aila'a 'ailuga i na souyedi.
'Aila'anidi 'adi 'ailuga kebu i na miave'itubamaga.
Tamu 'aila'a toketokena we'e tamu mweana,
Tulaina yana 'aila'a i na vetofolova taina yana 'aila'a 'waineye.”
24 Yadi tutuya i veluagaiga Libeka i venatuna kwakwama 'adi 'ailuga i tubuga. 25 Kumekumetana i tubuga tomogona yamoyamoina wata 'olo'olona 'wa da vo tamu talauma 'olo'olona, begaidi i goleni Iso.*Vona Ibeliu 'waineye, wagava Iso 'ana nogaya 'wa da vo 'Olo'olona. 26 Tutuyanina Iso i tubutubuga, taina 'age'edu'eduneye i 'abi, bega i goleni Iakobo.†Vona Ibeliu 'waineye, wagava Iakobo 'ana nogaya 'wa da vo 'Age'edu'eduneye. Aisake 'ana malamala 60 i veluagai, mulieta yana vavine kwakwamanidi 'adi 'ailuga i venatunedi.
Tubu'edakumeta 'ana veuveuta Iso 'awaie i da veluagaiga, i vekimwaneyeni
27 'Akonadi kwakwama 'adi 'ailuga i taulai Iso toyaubani 'ase'asetana, tutuya fuedi i 'e'etololo wala'aie, we'e Iakobo veve'wadana 'atamane i miamia. 28 Tutuya fuedi Iso 'wenena i vevetagovi bega tamana i 'ani'ani, begaidi Aisake Iso i nuakalikalieni, ma'itufa Libeka Iakobo i nuakalikalieni.
29 Tamu tutuya, Iakobo talafwea 'iwanina i vevetago nika Iso wala'aiega i le'wa i lase-'afo'afo. 30 Iso Iakobo i voneni i vo, A lase-'afo'afo, 'u 'abiwalowaloga siwe talafweanina yamoyamoina 'u na veleku a na 'ani.” Nika bei tamu 'ana wagava i goleni Idomu, 'ana saivila Yamoyamoina. 31 Iakobo i vo, 'Atumaina, nagami 'amu tubu'edakumeta veuveutanina 'u na veleku.” 32 Bega Iso iana i voneni i vo, Yau sai'afotoga a na wafa, 'aku tubu'edakumeta veuveutanina kebu faifaina a da nuanuaga, 'ako kebu tamu nani 'atumaina 'wainega a na veluagaiga.” 33 Ibu 12:16Iakobo i voneni i vo, Nagami 'u na vona'awaufaufa 'waikuye.” Iso i vo, A vona mogitana 'waimuye, 'aku veuveuta a 'aniveleneni 'waimuye.” 34 Mulieta Iakobo Iso 'ani'ani wata talafwea 'iwanina i veleni i 'ani wata i yemu, i 'a'avana i tauya. Iso kebu 'ana veuveuta faifaina i da nuanuaga iana i velenimo.