1 Ibu 11:17-19Tamu tutuya 'waineye Yaubada Ebelamo yana vetumagana i sitonovi, bega i vegole 'waineye i vo, Ebelamo!” Nika i tutula i vo, Yau side.” 2 2 Ifu 3:1Wata Yaubada i voneni i vo, Natumu yamu tamogana Aisake, kumanina 'u nuakalikalieni bwaikina, 'u na vagavaia 'wa na nago 'awalawa Molia. Tamu 'oya a na vemu, bei 'u na velomuyeni 'u na kabuni 'waikuye.”

3 Bola 'awa'awaiogose Ebelamo i tovoi yana doniki i 'idewai, yana tofolova 'adi 'ailuga i vagavaidi natuna Aisake taiadi. Welavi i keia velomu faifaina i vedodogidi doniki kwavuneye nika i tauya i nunagoi 'awalawanina Yaubada i voneyeniga 'waineye. 4 'Aiata 'ana vetonu 'waineye Ebelamo 'ani'ieyega 'oyanina i 'isanaweni. 5 Ebelamo yana tofolovavo i vonedi doniki taiadi i na miamia we'e i vo, Yau wata kwamana taiadi sai'afo 'a na vaganago bega 'a na 'odu Yaubada 'waineye wata 'a na vilama 'a na mai 'waimie.”

6 Ebelamo welavi keikeina ma 'itavina velomu faifaina natuna i vevai, we'e taunina 'ai 'ala'alaina wata 'ilama i 'ewadi nika 'adi 'ailuga i tauya i nago. 7 Aisake i sivilai tamana i velutolieni i vo, Tamaku?” Ebelamo i vo, Natuku, yau side 'u veifufu.” Aisake i vo, 'U 'iseni, 'ai 'ala'alaina wata 'ilama 'u 'ewadi, we'e ava'aibe sifi siaina ta na velomuyeni ta na kabuni Yaubada faifaina?”

8 Ebelamo i tutula i vo, Natuku, Yaubada taunina sifi i na veleda bega ta na velomuyeni wata ta na kabuni faifaina.” Nika ma natuna i tauya i nagoi.

9 Iem 2:21Tutuyanina i le'wa 'awalawanina Yaubada i voneyeniga 'waineye, Ebelamo 'eba velomu i didigi wata welavi i lubayai, nika natuna Aisake i yogoni tabwaneye i ve'enovi. 10 Nika Ebelamo 'ilama i 'ewai natuna i da luvewafai bega i da velomuyeni.

11 Tutuyanina 'waineye 'Auvea yana Anelose i vegole abamega, i vo, Ebelamo! Ebelamo!”

Ebelamo i tutula i vo, Yau side.”

12 Anelosenina i vo, Kebu natumu 'u na luvewafai wata kebu tamu ava'ai 'u na 'idewai 'waineye. 'Asiau a 'asetai 'omu mogitana ma yamu ve'ililibu Yaubada 'u kololoyeni, fai kebu natumu yamu tamogana 'u da ve'o'oleniga yau 'waikuyega.”

13 Ebelamo i 'isanago sifi iavetana i 'iseni alana i lu'eweni welavi siaidi 'waidie. I nago sifi i 'ewai i velomuyeni i kabuni Yaubada 'waineye, yana 'anivelena-maimaiga natuna tutulina.

14 Bega Ebelamo 'atamananina i goleni 'Auvea To'anivelena, begaidi tutuyanina 'wainega i maiga 'asiau tomotoga yadi 'eba vetalatutula i vo, 'Auvea yana 'Oya bei i 'a'anivelena.”

15-17 Ibu 6:13,14Ibu 11:12Nika 'Auvea yana anelose i vegole-vaitugana abamega Ebelamo 'waineye i voneni i vo, 'Auvea yana vona side i vo, Fai 'omu 'u ve'ililibuyeku bega natumu yamu tamogana kebu 'u da ve'o'oleniga, yau 'Auvea a vona'awaufaufa tauniku 'aku wagavayega mogitana a na vesauluva 'atumaina 'waimuye. 'Amu wauma a na 'ivefuei, lu'iawawa-wayoga wala'ai 'ana 'ilukulukuta bani'odi wata 'ubwana. We'e 'amu waumanina 'adi gaviavo i na vetoketoke-'iawedi wata yadi 'atamana i na tala'avuidi. 18 Fol 3:25Fai 'u vematayakeyakeku, 'amu wauma 'wainega tomia fwayafwaya matatabuna 'adi 'aila'a tulina tulina yadi 'atumaina i na veluagai.”

19 Ebelamo ma natuna i viladi i maia yana tofolovavo 'waidie, bega i viladi i nago Biasiba, bei Ebelamo i miamiaga.

20 Tutuya 'ifwaidi i 'a'avana, tamu tomogo Ebelamo i voneni i vo, Taimu Naoli yana vavine Milika, natudiavo matatabuna 'adi 8 iavetadi i tubuga 'waidiega.” 21 Tubu'edakumeta kumanina 'ana wagava Usa, mulineye Busa, Kemueli kumanina 'wainega me Alami i souyedi, 22 Kesedi, Asao, Filidasi, Idigafa wata Betueli. 23 Betueli natuna Libeka kumanina tamadi. Milika kwakwamanidi i venatunedi 'adi 8 Ebelamo taina Naoli 'wainega. 24 Naoli tamu yana vavine 'adi wagava Leoma natudiavo 'adi 4 i venatunedi, side 'adi wagava, Teba, Gaiamu, Tasi wata Maka.