21
Aisake yana tubuga
1 'Auvea Sela i vesauluva 'atumaina 'waidie nika ava'ai 'Auvea i vona'awaufeufeniga 'ana mogitana i veluagai. 2 Ibu 11:11Ebelamo 'akonadi i ve'auvea we'e Sela i veinainage, i venatuna Ebelamo natuna iavetana i tubuga, Yaubada i vona'awaufeufeniga 'ana mogitana i souyeni. 3 Ebelamo natuna 'ana wagava i goleni Aisake.*Aisake 'ana 'aseta i namanamaga. 4 Nag 17:12; Fol 7:8'Aiata 'ana ve-8 i veluagai Ebelamo Aisake bununa i boboi, bani'odi Yaubada i voneni. 5 Tutuyanina Aisake i tubuga, Ebelamo 'ana malamala 100 i veluagai.
6 Bega Sela i vo, Yaubada 'akonadi i kiavesosoanima bega a sosoana. Tomotoga matatabudi valama i na nogaiga, wata taiadi a na sosoana. 7 Kebu tamu aitoi 'ana fata Ebelamo i na voneni i na vo, Sela kwamana i na vesusuya.’ Avinodi Ebelamo i ve'auvea siwe natuna a venatuneni.”
Ega ma natudi Isimeli Ebelamo i veugeugedi
8 'Akonadi Aisake i taulai, 'aiatanina 'waineye Sela i na dabai Ebelamo sakali bwaikina i 'idewai. 9 'Aiatanina 'waineye Sela i 'iseni Isimeli Aisake i veve'oyaneni. Isimeli tamana Ebelamo we'e inana Ega, tamu yana vavine Itifita 'wainega. 10 Gal 4:29,30Bega Sela Ebelamo i voneni i vo, Nuanuama vavine ma natudi 'u na veugeugedi, kebu nuanuama kwamananina tamu veuveuta i na 'ewai tutuyanina yawaimu i na 'a'ava. Nuanuama natuku Aisake 'aisena veuveuta matatabuna i na 'ewadi.”
11 Vonanina Ebelamo i noganogai, nuana i vita bwaikaotogina fai Isimeli yana tubu'edakumeta. 12 Lom 9:7; Ibu 11:18Siwe Yaubada Ebelamo i voneni i vo, Kebu nuamu i na vita kwamana ma inana faifaidi. Sela yadi nuanuanina 'u na 'idewai fai Aisake 'wainega 'amu 'aila'a i na souyedi. 13 We'e kwamananina Ega natudi wata 'omu natumu yamu tubu'edakumeta, begaidi kwamananina 'wainega tamu 'aila'a bwaikina i na souyeni.” 14 I 'atai bola 'awa'awaiogose Ebelamo 'ani'ani i 'idewadewai wata ufa i koia 'aisaya bununa 'waineye Ega i veolidi, i 'a'avana ma natudi i vetauyidi i nago sali'avu'avuyeamo 'awalawa Biasiba 'waineye.
15 Tutuyanina ufa 'ana ba'ala 'waineye i 'a'ava, kwamana i naweni tamu welavi 'ai'wa'uneye bei i ve'enovi. 16 Mulieta sai'afo i vaganago ta na tawe 'atagida 'ana vemanawe bani'odiga, i miabui i vevenua'ivina i vo, Kwamana yana wafa kebu nuanuama a na 'iseni,” nika i velamu i taibwaubwau i lumatageu.
17 Yaubada 'akonadi kwamana yana 'we'wela 'wainega bonana i nogai, begaidi Yaubada yana anelose abamayega i vegole Ega 'waidie i vo, Ega, ava'ai faifaina 'wa venuafouviga? Kebu 'wa na kololo. Kwamana 'eno'enovinega i 'we'wela bei Yaubada bonana i nogai. 18 'Wa tovoi 'wa nago kwamana 'wa silakai nuana 'wa 'iveolooloi, fai bola 'ana 'aila'a a na 'ivebwaika, bega 'ana wauma 'wainega tomotoga 'adi 'aila'a tulina tulina i na souyedi 'wainega.”
19 I 'a'avana, Yaubada Ega matadi i kiavemagetai ovu alaalana ufa nageneye i 'iseni, i nago yadi ba'ala i veliliwai i adaga mulieta kwamana ufa i veleni i yemu.
20 Sali'avu'avuye kwamana i taulai Yaubada yana 'aivaita wata yana 'isave'avina 'wainega. We'e yana 'eba mia sali'avu'avuye wata yana 'aseta bwaikina tufu faifaina. 21 Tutuyanina i miamia Felani vi'ainina 'waineye, nika inana tamu vavine Itifita 'wainega i vagavaia i mieni taiadi i nagi.
Ebelamo yana veakutagona i 'idewai Kini Abimeleki taiadi.
22 Tamu 'aiata 'waineye, Kini Abimeleki wata Faikoli, yana tolugaviavo yadi to'edakumeta, i maia Ebelamo 'waineye i veifufu i vo, A 'asetamu 'omu Yaubada 'amu 'weabu, nani matatabuna 'u 'i'idewadiga i 'i'ivaisemu. 23 'Akonadi a vesauluva 'atumaina 'waimuye, bega 'u na vona'awaufaufa Yaubada 'ana wagavayega kebu tamu tutuya 'u na vekalieku, natukwavo 'alo tubukwavo taiadi 'waimeye. Yau a vevesauluva 'atumaina 'waimuye, begaidi 'asiau 'omu 'u na vona'awaufaufa yau 'waikuye wata 'awalawa de'e 'ana tomotoga 'waidie, fai 'omu wakawaka taiadi ta miamia.”
24 Ebelamo i vo, A vona mogitana, begaidi a vona'awaufaufa 'waimuye.” 25 Mulieta Ebelamo i vona-vaitugana Kini Abimeleki 'waineye, yana tofolovavo ma yadi nuasako ufa i alai i 'ewai 'waidiega faifaina.
26 Siwe Kini Abimeleki i vo, Nani de'e i souyeniga yau kebu a da 'asetai aitoi i 'idewai. 'Asiauotoga 'u veveifufuyeni 'waikuye nika bei a 'aseta.”
27 Begaidi Ebelamo yana sifi, goti wata 'aisaya 'ifwaidi i 'anivelenedi Abimeleki 'waineye, 'adi 'ailuga yadi veakutagona i 'idewai wata i kiavetoketokei. 28 We'e Ebelamo sifi natudiavo vevinedi 'adi-7 i nawedi wata i yato'idiedi. 29 Abimeleki i velutoli Ebelamo 'waineye i vo, Awale sifi 'adi-7 'u yato'idiedi 'ifwaidi 'waidiega?”
30 Ebelamo i vo, Sifi natudiavo 'adi 7 a tauyedi 'omu yamu 'eba 'isa ufa faifaina, yau kumaniku ufa de'e a alai.” 31 Nika bei 'atamana Biasiba 'ana wagava i goleni, wagavanina 'ana 'aseta fai tomotoga 'adi 'ailuga yadi veakutagona i 'idewai ufa faifaina.
32 Tutuyanina yadi veakutagona 'ana folova i 'a'ava Biasiba 'waineye, Kini Abimeleki yana tolugavia 'adi to'edakumeta Faikoli taiadi i viladi i nagoi yadi 'atamane, 'awalawa Filisitia 'waineye. 33 Mulieta Ebelamo tamu welavi tamalisiki i bakuli 'atamana Biasiba 'waineye. Bei wata i 'odu yana 'AUVEA 'waineye i subiai, fai taunina Yaubada Miamia-vagaina. 34 Ebelamo kumanina wakawaka, tutuya manamanawena yana 'aila'avo taiadi i miamia 'awalawa Filisitia nageneye.