19
Lota anelose 'adi 'ailuga i tayegidi yana vanuge
1 Tamu lavilavivau 'waineye anelosenidi 'adi 'ailuga i maia 'atamana Sodoma, we'e Lota i miabui i miamia 'atamananina 'ana 'eba luku 'waineye, nika i 'isanago i 'isedi bega i tovoi i nago 'waidie. Ma yana ve'ililibu i 'odu 'waidie maigina i obu fwayefwayeye. 2 I 'a'avana i vonedi i vo, Yaku 'auveavo, yau yami tofolova-maimaiga. 'Wa maia ta i nago yaku vanuge. 'Agemi 'wa na lekoadi i na 'a'avana de'e bei 'wa na 'eno. I na 'atai 'awa'awaiogose 'wa na tovoi nika 'wa na tauya.”
Siwe Lota yana vona i tutuli i vo, Kebu, 'asa'aiana side bei 'a na 'eno 'atamana fouye.”
3 Lota i lukakada-vaivaituganedi nika i nogayeni, Lota taiadi i nago yana vanuge. Lota beledi yalayalana i kabunidi wata 'ani'ani 'iwanina i 'idewadewadi 'ana ulatauvo faifaidi. Tutuyanina i 'idewadewa'a'avadi nika i ve'ala'ani.
4 'Ani i 'a'ava mulineye 'ana ulatauvo sai'afoga i na 'ufobala 'eba 'eno 'waidie, nika me Sodoma iaveta i maia Lota yana vanuga i sififineni. Iaveta matatabuotogidi 'atamananina 'wainega, tulaidi wata tubuvauvau i maia Lota yana vanuge. 5 Tov 19:22-24Matatabudi i vegolegole Lota 'waineye i vo, Ava'aibe tomotoganidi i maiaga 'waimuye taiadi 'wa miamiaga? 'U na vonedi taiadi 'wa na souyemi 'waimeye, 'ima me Sodoma nuanuama taiadi 'a na 'eno.”
6 Lota i souyeni i na vonedi we'e yana vanuga 'ana saiboda i sibodai mulineye. 7 I vonedi i vo, Ekwavo a vevelu'uiemiga, kebu de'e sauluvanina sakoina wata 'eba bunumayaga 'wa na 'idewai 'waidie. 8 'Wa na nogai. We'e yau natukwavo ne'e'elidi 'adi 'ailuga kebu iaveta taiadi i da veluaga. A na miedi 'waimie bega ava'ai nuanuami 'wa na 'idewai 'waidie. Siwe kebu tamu nani 'wa na 'idewai de'e tomotoganidi 'waidie, fai kumanidiavo yau 'aku ulatauvo yaku vanuge i maia, bega i lubwaineni a na 'isave'avinidi wata a na 'ita'ita'iedi.”
9 Siwe matatabudi i voneni i vo, 'Omu wakawaka, kebu yama 'awasasa 'u na tovibodai. Aitoi veimea i velemu bega 'u tatalabodema. 'Omu 'a na 'ivekokovimu we'e tomotoganidi ma'itufa sai'afo.”
Lota i bifeleni mulidie i nago nika i laka igodi vanuga 'ana saiboda i na tutubaia. 10 Siwe tomotoganidi 'adi 'ailuga Lota i yo'ei i lukuveni we'e vanuga 'ana saiboda i simawai. 11 2 Kin 6:18Nika Lota 'ana ulatauvo tosakonanidi matatabudi matadi i kiavedudubalidi bega vanuga 'ana saiboda i yayaisamula-wayogeni.
Lota Sodoma 'wainega i dega
12 Bola tosakonanidi i vevetafewa 'atamane, we'e tomotoga 'adi 'ailuga Lota i voneni i vo, 'Ai'edi yamu 'aila'avo de'e bei i na miamianiga, bani'odi natumwavo iavetadi wata vevinedi 'alo lawamwavo wata 'ifwaidi yamu tomotogavo taiadi 'wa miamiaga 'atamana de'e 'waineye, matatabumi 'wa na souyemi 'wa na dega. 13 'Wa na 'abiwalowaloga fai 'atamana de'e 'a na luvela'ovi. 'Auvea 'akonadi tomotoganidi yadi sakona 'eba bunumayaga 'ana vona-vaitugana bwaikaotogina i nogai, i vetunema Sodoma 'a na luvela'ovi.”
14 Lota natunavo vevinedi veveakutagonidi nagi faifaina bega Lota i nago iavetanidi i vonedi i vo, 'Wa lilide ta na souyeda 'atamana de'e 'wainega, 'Auvea i na 'ivesakoi wata i na luvela'ovi.” Siwe tomotoganidi yadi nuanua i vonaga 'ako Lota i da sasaidibi. 15 Tutuya 'akonadi i kilikililia anelose 'adi 'ailuga Lota i luneuneni i voneni i vo, 'U lilide, yamu vavine wata natumwavo ne'e'elidi 'adi 'ailuga taiadi 'wa miamianiga 'u na vonedi walogayega 'wa na souya-matayo'oyemi nika kebu yawaimi 'wa na tawedi tutuyanina 'Auvea 'atamana i na 'u'umi.”
16 2 Fit 2:7We'e Lota bola i 'ivogavogana nika anelose 'adi 'ailuga, Lota wata yana vavine, natunavo 'adi 'ailuga ne'e'elidi taiadi nimadie i 'abi i 'abiwalowaloga i souyedi 'atamananina 'wainega. Fai 'Auvea to'isanuakalikali begaidi 'ita'ita'i i veluagai. 17 Tutuyanina i souyediga, tamu anelose i vonedi i vo, Yawaimi 'wa na degedi. Kebu 'wa na sivilami wata kebu 'wa na 'ailove laube'u de'e 'waineye. 'Wa na dega 'oya 'waidie, i na nunago i na bewemi.” 18 Nika Lota i vonedi i vo, Yaku 'auveavo, kebu. 19 'Omi mogitana 'wa 'isanuakalikalieku bega 'wa 'ita'ita'ieku, yami 'aivaita bwaikina 'waikuye. Siwe kebu 'aku fata a na vaganago 'oya weyaginega i na nunago 'ako a na veilagi vitanina i na 'edafeleku nika 'edeye a na wafa. 20 'U da 'isanago 'atamana siaina sai'afo lilivadeye. Nuanuaku bwaikina 'u da tauyeku a da nago 'atamananina siaina 'waineye, 'ana fata 'ita'ita'i bei a na veluagai.”
21 Anelose i voneni i vo, 'Atumaina, a tauyemu bei 'u na nago, we'e 'atamananina siaina kebu a na luvela'ovi. 22 Siwe 'u na 'abiwalowaloga 'u na dega, we'e kebu 'aku fata tamu ava'ai a na 'idewaiga 'ana tugusa 'u na le'wa 'atamananina siaina 'waineye.” Begaidi 'atamananina 'ana wagava i goleni Soa, 'ana saivila 'Atamana Siaina.
Sodoma wata Gomola Yaubada i luvela'ovidi
23 Inala 'akonadi i vulaoga bega i lakalaka, tutuyanina 'waineye Lota i le'wa 'atamana Soa. 24 Mad 10:15; 11:23,24; Luk 10:12; 17:29; 2 Fit 2:6; Iud 1:7Kebu tutuya manamanawenaga 'Auvea munafagila 'ala'alaidi abamega i vemavugidi i obuma, Sodoma wata Gomola i leodi wata nani matatabuna i luvela'ovidi. 25 'Atamananidi wata 'atamana 'ifwaidi laube'unina 'waineye i leodi, tomotoga bei i miamiani, wata naninidi i tabotaboga fwayafwayanina 'waineye, matatabuna i 'u'umidi. 26 Luk 17:32We'e Lota yana vavine mulineye i nunago siwe i siviladi i 'isanago nika i vekileu eyaga i da fa'aliga 'ana 'isa'isa bani'odiga.
27 Bola awa'awaiogose Ebelamo i lilide i nago 'eba vematayagina 'atumaina, nagami bei 'Auvea taiadi i veifufuga 'waineye. 28 Nika i 'isaobu Sodoma wata Gomola weyaginega, laube'unina matatabuna 'wainega lufwa bwaikaotogina i lakalaka 'wa da vo libi ta da tunuya i da 'ala'alata. 29 Siwe Yaubada Ebelamo yana velu'ui Lota faifaina i nuave'avini, tutuyanina 'atamananidi i luvela'ovidiga Lota i 'ita'ita'ieni 'ai 'ala'alata 'wainega, nika laube'unanina bei i miamiaga i degalovei.
Lota wata natunavo vevinedi
30 Lota i kololo, begaidi 'atamana Soa i 'iaweni natunavo 'adi 'ailuga taiadi i dega i nagoi 'oya 'waidie ovuye i mia. 31 Tamu 'aiata vavine tulaina iana siaina i voneni i vo, Edavo 'aila'a i naginagi, tomia fwayafwaya yada sauluva bani'odi, we'e 'ida kebu 'ada fata ta na nagi, fai de'e bei iaveta kebu. Tamada tutuya 'ale'usana wautogane i na 'abi, we'e kebu tamu natunaga. 32 'U mai oine ta i veyemuya nuana i na lugaugauya, bega taiadi ta na veluaga. Nika 'eda'edanina 'wainega, 'ana fata tamada 'wainega 'ada 'aila'a i na vebwaika.
33 Bega lovananina 'waineye oine toketokena i veyemuya nuana i lugaugauya, mulieta tubu'edakumeta i luku tamana taiadi i veluaga. Tutuyanina vavine tulaina i luku tamana taiadi i 'enoga, tamana kebu i da 'asetai, wata natuna i tovoi i souyeniga, kebu i da 'iseni.
34 I 'atai tubu'edakumeta taina i voneni i vo, Bogi lovane tamada taiadi a 'eno. Wata 'asiau lovane oine ta na veyemu-vaitugani, bega 'u na luku taiadi 'u na 'eno. Nika tamada 'wainega, 'ada 'aila'a i na vebwaika. 35 Bega lovananina 'waineye, wata oine i veyemuya nuana i lugaugauya bega vavine siaina i luku taiadi i veluaga. Wata bani'odi, vavine siaina i luku tamana taiadi i 'enoga, tamana kebu i da 'asetai wata i tovoi i souyeniga, kebu i da 'iseni.
36 Fai maiana yadi nuanua bani'odi, begaidi tamadi taiadi i 'enoga, mogitana i veinainage. 37 Tutuyanina vavine tulaidi i venatuna, natudi iavetana i tubuga i goleni Moabe. Kumanina 'awalawanina 'ana tomotoga tubudi, 'asiau i golegoledi me Moabe. 38 Bwasiona i venatuna, natudi iavetana i tubuga, i goleni Beni-Emumi. Kumanina 'awalawanina 'ana tomotoga tubudi, 'asiau i golegoledi me Emumoni.