1 Tamu 'aiata Ebelamo i miamia Mamile 'ana welavi lamudie, welavinidi bwaikidi wata tabutabudi. Utukamwana, inala yana luyauyauta 'ana tutuye, yana vadavada 'ana 'eba luku 'waineye i miabui nika 'Auvea i souyeni 'waineye. 2 Ibu 13:2I 'isalaka tomotoga 'adi 'aitonu i 'isedi i tovotovoi. Ebelamo yana vadavada 'wainega i tovoi i lilide i yogo'ede'ededi, ma yana ve'ililibu i 'odu maigina i obu fwayefwayeye. 3 I vona i vo, Yaku 'auvea, yau yamu tofolova. 'Ai'edi 'atumaina 'waimuye kebu 'u na yogo-vagata, we'e side bei 'u da veawai. 4 'Wa da maia welavi de'e 'ai'wa'uneye 'wa na veawai nika ufa siaina a na mieni 'age 'ilekoa faifaina. 5 Fai 'wa maia yaku vanuge, nuanuaku tamu ava'ai siaina a na 'idewai, 'agemie 'wa na yatodi 'wa na vetoketoke nika 'wa na tauya.”

Bega i tutula i vo, 'Atumaina, ava'ai nuanuamu 'u voneyeniga 'u na 'idewaimo.”

6 Ebelamo i 'abiwalowaloga i luku vadevadeye, Sela i vonedi i vo, 'Wa na 'abiwalowaloga, falawa 'atumaiotogina ta'ula 'aitonu bwaikidi 'wa na 'ewadi, 'wa na viladi bega beledi 'wa na kabunidi.”

7 I 'a'avana i lilide i nago yana luvadabaweye, bulumakau veve'anina tubuvauvauna wata 'ana tubuga 'atumaina i 'ewai yana tofolova i veleni bega i 'idewadewa-matayo'oi nika i vetagovi. 8 Tutuyanina 'ani'ani i 'idewadewa'a'ava, Ebelamo 'aisaya susudi, susu vebi'wabi'wana wata 'aisayanina i vetagoviga i 'ewadi i nawedi 'ana ulatauvo i ve'anidi. Welavi lamudie ulatauvo i 'ani'ani we'e Ebelamo i mimia-kamatadi.

9 I 'ani'a'avana, tomotoganidi i velutoli i vo, Yamu vavine Sela ava'aibe?” Ebelamo i tutula i vo, Sino vadavada nageneye.”

10 Lom 9:9Tamu iadi 'waidiega, 'asa'aiana 'Auvea, Ebelamo i voneni i vo, A vona mogitana 'waimuye, weta'i 12 i na 'a'avana sino malamalanina 'waineye, nika a na vilaku a na mai we'e Sela kwamana iavetana i na venatuneni.” Sela vadavada 'awana lilivaneye i miabui Ebelamo mulineye i vavainenega. 11 Tutuyanina 'waineye Ebelamo 'akonadi i ve'auvea-'afo'afo wata Sela i vemo'aiotoga bega yadi weta'i i 'ailove kebu wata i da 'ewa'ewadiga. 12 1 Fit 3:6Begaidi Sela i nogai i namaga-tumula yadi nuanua 'waineye i vo, Yau 'akonadi 'a vetubusako bunu 'ana sosoana i mwea 'waimeye wata 'ama toveimea i ve'auveaotoga bega kebu 'ana fata wata 'a na veluaga-vaitugani.”

13 Nika 'Auvea Ebelamo i velutolieni i vo, Awale Sela i namaga wata i vo, Yau 'akonadi 'a vemo'ai-'afo'afo kebu 'ama fata 'a na venatunaga.’ 14 Luk 1:37I lubwainemi 'wa na 'asetai, kebu tamu nani vitanaga yau 'Auvea 'waikuye. 'Akonadi a vonemu, weta'i 12 i na 'a'avana sino malamalanina 'waineye nika a na vilaku a na mai we'e Sela kwamana iavetana i na venatuneni.” 15 Sela i kololo begaidi i ve'ewa i vo, Yau kebu 'a da namagaga.” Siwe 'Auvea i tutula i vo, E'e mogitana 'wa namaga.”

16 'Ani i 'a'avana, tomotoganidi 'adi 'aitonu i tovoi i tauya, Ebelamo taiadi i nago 'edeye i na valovedi, we'e i nagoga i le'wa 'eba vematayagina 'atumaina 'waineye bega 'adi fata i na 'isaobu Sodoma weyaginega. 17 Nika 'Auvea nuaneye i vo, Ava'ai sai'afoga a na 'idewaiga, kebu a na giveni Ebelamo 'wainega. 18 Ebelamo 'ana wauma i na vebwaika wata i na vetoketoke, tomia fwayafwaya 'adi 'aila'a tulina tulina yadi mia 'ana 'atumaina i na veluagai 'wainega. 19 Fai kumanina a venua'ivineni bega natunavo wata yadi 'aila'avo i na awave'ede'ededi bega yau 'Auvea i na vevematayakeyakeku yadi sauluva 'atumaidi wata tonovidi 'waidiega, nika ava'ai a vona'awaufeufeniga Ebelamo 'waineye a na 'idewai.”

20 'Auvea Ebelamo i voneni i vo, Me Sodoma wata me Gomola yadi sakona 'eba bunumayaga 'ana vona-vaitugana bwaikaotogina a nogai. 21 A na obu tomotoganidi yadi sauluva a na 'isedi bega valadi a na 'asetadewai, mogitana i vevesauluvasako 'alo kebu.”

22 Tomotoganidi 'adi 'ailuga i tauya i nunago Sodoma weyaginega we'e 'Auvea 'aisena Ebelamo taiadi i miamia. 23 Nika Ebelamo i vaganago 'Auvea lilivaneye i velutolieni i vo, Nuanuaku a da 'asetai, mogitana tomotoga 'atumaidi 'u na leodi tosakona taiadi? 24 'Ai'edi tomotoga 'atumaidi 'adi 'aila'a 50 i na miamia 'atamananina 'waineye, tomotoganidi matatabudi taiadi 'u na leodi? 'Ana fata tomotoganidi 'atumaidi 50 'adi 'ita'ita'i faifaina, 'atamananina 'ana tomia matatabudi taiadi 'u na bailedi? 25 A nuani kebu tamu sai'afo bani'odi 'u na vesauluvayediga, kebu tomotoga 'atumaidi wata tomotoga sakoidi taiadi 'u na vematavulogidi wata kebu taiadi 'u na luvewafadiga. 'Omu kebu yamu sauluva bani'odiga. 'Omu tomia fwayafwaya matatabuma 'ama Tovevonayavuga, 'omu 'aisemu yamu veimea tonovidi wata magemagetadi.”

26 'Auvea i tutula i vo, 'Ai'edi tomotoga 'atumaidi 'adi 'aila'a 50 Sodoma 'waineye i na miamiaga 'atamananina a na baileni kebu a na luvela'oviga tomotoganidi faifaidi.”

27 Ebelamo i tutula i vo, Yau nani-'avo'avovo wata kibwaku. Yaku 'Auvea, 'ai'edi ma yaku venuafoufa'ala a na veveifufu-vaitugana 'waimuye 'u da nuatavuniku. 28 'Ai'edi tomotoga 'adi 'aila'a 45 'atumaidi we'e 50 kebu. 'Ai'edi tomotoga 'atumaidi 'adi 5-nidi kebu 'u na veluagadiga, 'atamananina bola 'u na luvela'ovi?”

'Auvea i tutula i vo, Kebu 'atamananina a na luvela'oviga 'ai'edi tomotoganidi 'adi 45 'atumaidi.”

29 Ebelamo wata i vo, 'Ai'edi 40 tomotoga 'atumaidi bani'odi?”

'Auvea i tutula i vo, 'Ai'edi tomotoga 'atumaidi 'adi 'aila'a 40, kebu 'atamananina 'a na luvela'ovi.”

30 Ebelamo i vo, Kebu 'u na nuasakoyekuga 'Auvea, nuanuaku wata 'a na veifufu-vaitugana 'waimuye. We'e 'ai'edi tomotoga 30 'atumaidi bani'odi?”

'Auvea i vo, 'Ai'edi tomotoga 'adi 'aila'a 30 'atumaidi kebu a na 'idewaiga.”

31 Wata Ebelamo i vo, Nuanuaku yaku venuafoufa'ala faifaina 'u da nuatavuniku, a na veveifufu-vaitugana 'waimuye. Yaku 'Auvea, 'ai'edi tomotoga 'adi 'aila'a 20 'atumaidi, bani'odi yamu nuanua?”

'Auvea i vona i vo, Kebu 'ana fata 'atamananina a na luvela'oviga 'ai'edi tomotoga 'atumaidi 20 bei i na miamiani.”

32 Ebelamo i vo, 'Auvea, kebu 'u na nuasakoyekuga, de'e yaku veifufu 'eba ve'a'ava 'waimuye, 'U da nuani, 'ai'edi tomotoganidi 'adi 'aila'a 10 'atumaidi, ava'ai 'u na 'idewai 'waidie?”

'Auvea i vo, Kebu 'atamananina a na 'ivesakoi 'ai'edi tomotoganidi 'atumaidi 'adi 'aila'a 10 i na miamianaga.”

33 Tutuyanina i veifufu'a'avana nika 'Auvea i tauya, we'e Ebelamo i vilai i nago yana vadavada 'waineye.