26
Aisake wata Abimeleki
1 Loka bwaikina i souyeni 'awalawa Kenani, bani'odi basenadi Ebelamo yana tutuye. Bega Aisake i nago Gelai, Filisitia yadi kini Abimeleki 'waineye. 2 Nika 'Auvea i souyeni Aisake 'waineye i voneni i vo, Kebu 'u na obu Itifita, we'e 'awalawanina yau a na vonemuga, bei 'u na mia. 3 Nag 22:16-18Side bei Gelai 'u na miamia 'u na vewakawaka de'e 'awalawanina nageneye, we'e yau 'omu taiadi, wata a na vevesauluva 'atumaina 'waimuye. Yau fwayafwaya de'e matatabuna a na velemu tubumwavo taiadi, bani'odi basenadi yaku vona'awaufaufa toketokena tamamu Ebelamo a veleni. 4 Yau 'amu wauma a na 'ivefuei, lu'iawawa-wayoga wala'ai 'ana 'ilukulukuta bani'odi wata 'ubwana, we'e fwayafwaya de'e matatabuna tubumwavo a na veledi. 'Amu wauma 'wainega tomia fwayafwaya matatabuna 'adi 'aila'a tulina tulina yadi 'atumaina i na veluagai. 5 Yaku vona'awaufaufanina a na 'idewai 'waimuye fai Ebelamo i vematayakeyakeku. Yaku nuanua, yaku veimea wata yaku awave'eda'eda matatabudi i 'idewadi.”
6 'Auvea i vona'a'avana, Aisake i miamia Gelai.
7 Tutuyanina 'atamananina 'ana iaveta Aisake i velutolieni yana vavine Libeka faifaina, i vo, Taunidi yau novuku.” Siwe kebu nuanuana i na vo, Kumanidi mogitana yaku vavine,” fai i kololo yana nuanua i vo, 'Ai'edi a na vo, Yaku vavine,’ 'ako 'atamananina 'ana iaveta i na luvewafaku yaku vavine i na 'ewadi, fai Libeka vavine 'iwakawakana.” 8 Tutuya 'ifwaidi i 'a'ava, tamu 'aiata 'waineye me Filisitia yadi kini 'ana wagava Abimeleki, tutubweka 'wainega i 'isaobu Aisake i 'iseni Libeka i kiawayowayogidi. 9 Bega Abimeleki Aisake 'ana vala i vetunei i mai i velutolieni i vo, 'Asa'aiana 'omu yamu vavine, awale 'u vo, Taunidi yau novuku?’ ”
Aisake i vo, Fai a kololo a vo, I na nunago tamu tomogo i na luvewafaku yaku vavine i na 'ewadi 'waikuyega.’ ” 10 Wata Abimeleki i vo, Awale sauluvanina 'u 'idewai 'u ve'ewa 'waimeye? 'Ai'edi tamu yaku tomotoga yamu vavine i da 'ewai taiadi i da 'eno, 'ako vita matatabuma 'u da velema sakonanina 'wainega.”
11 Bega Abimeleki veimea toketokena i lu'ivoneyeni yana 'aila'avo 'waidie i vo, 'Ai'edi aitoi tomogo de'e 'alo yana vavine i na 'abitonovidi, a na veimea ta na luvewafai.”
Ufa faifaina i ve'ikwayekwayega
12 Tutuyanina 'waineye Aisake yana waifei i bakuli malamalanina 'waineye. 'Aile'wa 'ana tutuye bwaikaotogina i 'idewai tutuya 100 ma 'ana 'imoso'i i veluagai fai 'Auvea i vesauluva 'atumaina 'waineye. 13 Tomogonina i ve'ai'aiwabu bwaikina, yana 'ai'aiwabunidi i vebwaika-'afo'afo tamu tove'ai'aiwabu . 14 Yana sifi, goti, bulumakau wata yana tofolovavo fuedi, begaidi me Filisitia i ve'unumagigi 'waineye. 15 Begaidi Aisake tamana Ebelamo yana tofolovavo ufa matatabuna i aladi tamana yana tutuye, me Filisitia i maia fwayafwaya 'wainega i tavunidi i lala.
16 Mulieta Abimeleki Aisake i voneni 'awalawa de'e i na 'iaweni i na nago tamu 'awalawa 'waineye i vo, 'Omu 'u vetoketoke-'iawema 'awalawa de'e 'waineye.”
17 Bega Aisake i tovoi i nago Laube'u Gelai 'waineye bei i mia. 18 Tamana yana tutuye ufanidi i aladiga me Filisitia i tavunidi tutuyanina Ebelamo i wafa. Aisake ufanidi i ala-vaituganidi wata 'adi wagava tamana i golediga i veledi.
19 Mulieta Aisake yana tofolovavo tamu ufa-luluvuala i veluagai Laube'u Gelai 'waineye. 20 Siwe me Gelai sifi 'adi to'isave'avinavo i maia ufa-luluvuala faifaina i vona i vo, Ufanina 'asa'aiana 'ima 'ama ufa.” Begaidi Aisake yana to'isave'avinavo taiadi i ve'ikwayekwayega, bega Aisake ufanina i goleni Eseki, 'ana saivila Ve'ikwayekwayega. 21 Mulieta Aisake yana tofolovavo wata tamu ufa i alai, bei wata i ve'ikwayekwayega faifaina, bega Aisake ufanina i goleni Sitina, 'ana saivila Ve'idi'idi. 22 Bega Aisake i tovoi i nago wata tamu ufa i alai, bei kebu tamu aitoi i da ve'ikwayekwayega faifaina. Bega 'ana wagava i goleni Leobota, 'ana saivila, 'Awasasa Yavuyavuna, fai i vo, 'Akonadi 'Auvea 'awasasa bwaikina fwayafwayanina i veleda bei ta na folofolova wata ta na miamia.”
23 Mulieta Aisake 'atamananina i 'iaweni i nago 'atamana Biasiba. 24 Lovananina 'waineye 'Auvea i souyeni 'waineye i voneni i vo, Yau tamamu Ebelamo yana Yaubada. Kebu 'u na kolologa fai yau 'amu 'weabu, a na vesauluva 'atumaina 'waimuye wata 'amu wauma i na vefue. Naninidi faifaidi basenadi a vona'awaufaufa yaku tofolova Ebelamo 'waineye, wata a na 'idewai 'waimuye.” 25 Bei Aisake 'eba velomu i 'idewai 'Auvea 'waineye i 'odu i subiai. Wata yana vanuga naya i vetovoia mulieta yana tofolovavo tamu ufa 'ivauna i alai.
Aisake yana veakutagona i 'idewai Abimeleki taiadi
26 Tamu tutuya Kini Abimeleki ma yana toawave'eda'eda Ausadi wata yana tolugavia 'adi to'edakumeta Faikoli taiadi i maia Gelai 'waineye. 27 Aisake Kini Abimeleki i velutolieni i vo, Awale 'wa mai 'waikuye, fai bagase 'wa nuasakoyeku wata 'wa veugeugeku yami 'awalawayega?”
28 To'edakumetanidi yana vona i tutuli i vo, 'A 'asetai mogitana 'omu 'Auvea 'amu 'weabu, begaidi 'a mai nuanuama 'a na vona'awaufaufa 'waimuye, bega yada veiana wata yada veakutagona ta na 'idewai. 29 Bega 'asiau nuanuama 'u na vona'awaufaufa 'waimeye kebu tamu nani sakoina 'wa na 'idewai 'waimeye. Wata 'ima bani'odi bagase kebu tamu nani sakoina 'a da 'idewai 'waimuye ma yama nuakalikali 'a 'isave'avinimu mulieta 'a vonemu 'u tauya. Begaidi 'asiau a 'aseta-'atumaia 'omu mogitana 'Auvea i vevesauluva 'atumaina 'waimuye.”
30 Bega Aisake veakutagona 'ana sakali i 'idewai, ma fuedie i 'ani wata i yemu. 31 I 'atai 'awa'awaiogose yadi vona'awaufaufa toketokena i 'idewai bega kebu tamu aitoi i na vevesauluva-sako awasasadie. Mulieta Aisake i vetauyidi ma yadi nuaniwalova i nagoi vanuge.
32 'Aiatanina 'waineye, Aisake yana tofolovavo ufa 'ivauna i alai faifaina i voneni i vo, 'Ima ufa 'a veluagai.” 33 Bega Aisake ufanina i goleni Siaba, 'ana saivila 'Eba Veakutagona. Tutuyanina 'wainega i mai 'asiau 'ana wagava i golegoleni Biasiba, 'ana saivila Ufanina 'Waineye Yadi Veakutagona I 'idewai.
34 Tutuyanina Iso 'ana malamala 40 i veluagai, vevine 'adi 'ailuga i na nagidi me Aiti 'waidiega. Vevinenidi 'adi wagava Iudita, Beeli natuna wata Basemati, Elona natuna. 35 Siwe tutuyanina 'waineye Iso yana vevinevo yadi vesauluva-sako 'wainega Aisake wata Libeka i 'ivelogilogidi.