1 Mulieta Aisake Iakobo i goleni i mai bega i vona-nuakalikalieni wata i awave'ede'edeni i vo, Kebu me Kenani vevine 'waidie 'u na nagiga. 2 We'e 'u na nago 'awalawa Fadani-Lami 'waineye taunimu tubumu Betueli yana 'aila'a 'waidie, bei avumu Lebani natuna vevinena 'waidiega tamu 'u na nagia. 3 Yaubada Toketokeotogina i da vesauluva 'atumaina 'waimuye wata kwakwama fuedi i na velemu, we'e tubumwavo i na vefue bega 'waidiega 'aila'a fuedi wata bwaikidi i na souyedi. 4 Nag 17:4-8Yaubada i vesauluva 'atumaina tubumu Ebelamo 'waineye wata bani'odi i da vesauluva-'atumaina 'waimuye nika i da damana 'amu wauma 'waidie. De'e fwayafwayanina Yaubada Ebelamo i veleni, tutuya de'e bei 'omu 'u vewakawakaga, 'awaie 'awalawanina 'u na ve'itulamuyeni.”

5 Bega Aisake Iakobo i voneni i tauya, i nago 'atamana Fadani-Lami, bei i miamia avuna Lebani 'waineye, taunina Libeka novudi, Betueli natuna tomogo Alami 'ana wauma 'wainega.

6 Iso i 'asetai basenadi tamana Aisake Iakobo i vona-nuakalikalieni wata i vetunei i nago 'atamana Fadani-Lami 'waineye vavine tamu i na vagavaia faifaina. Wata i 'asetai tamana Iakobo i velu'ase'asei i vo, Kebu 'u na nagi me Kenani vevine taiadi.” 7 We'e Iakobo tamana wata 'inana yadi veifufu i vematayakeyakeni bega i nago 'atamana Fadani-Lami. 8 Fai Iso 'akonadi i 'asetai tamana kebu nuanua Kenani 'ana vevinevo taiadi i na nagi 9 bega i nago tamana iana Isimeli yana 'aila'a 'waineye i nagi yana vevinevo 'adi 'imoso'i. Yana vavine 'ivaudi i nagidi 'adi wagava Malati, taunidi Ebelamo tubuna Isimeli natuna we'e Nebeiota novuna.

10 Iakobo i tauya Biasiba 'wainega i nunago Elana. 11 Tutuyanina inala i simwanuya i le'wa tamu 'awalawa 'waineye bei i vebae'wa, fai 'akonadi i lovani. Iakobo kileu i 'ewai i 'unugaloyeni i 'enova. 12 Ion 1:51I 'eno'enova nika i 'enoneganegayega, i veni wanala bababana wata 'atumaina fwayafwayayega i laka abame. Yaubada yana anelosevo i lakalaka wata i obuobuma wanalanina 'waineamo. 13 Nag 13:14,15Tabwaneye 'Auvea i tovotovoi i voneni i vo, Yau 'Auvea, tubumu Ebelamo yana Yaubada wata tamamu Aisake yana Yaubada. Fwayafwayanina bei 'u 'eno'enoga a na 'aniveleneni 'omu wata tubumwavo 'waimie 'wa na ve'itulamuyeni. 14 Nag 12:3; 22:18'Awaie tubumwavo i na vefue lu'iawawa-wayoga, wala'ai 'ana 'ilukulukuta bani'odi. 'Wa na yavula 'wa na nagoi 'awalawa fuedi 'waidie, bani'odiga 'ifwaimi inala yana 'eba inivayega, 'ifwaimi inala yana 'eba lakayega, 'ifwaimi yavalatayega wata 'ifwaimi bolimanayega. Tomia fwayafwaya matatabudi 'adi 'aila'a tulina tulina yadi 'atumaina i na veluagai 'omu wata tubumwavo 'waimiega. 15 Yau 'omu taiadi a na ve'isabodebodemu, ava'aibe 'u na nagoga, yau a na vevilamu 'u na mai de'e fwayafwayanina 'waineye. Kebu a na 'iawemuga, we'e mogitana ava'ai a vona'awaufaufaga a na 'idewai 'waimuye.”

16 Tutuyanina Iakobo 'enovayega i tovoi i vo, Mogitana 'Auvea de'e 'awalawanina 'waineye i miamia siwe kebu a da 'aseta-'atumaiaga.” 17 Iakobo i kololo bega i vo, De'e 'awalawanina 'eba nuavogana, Yaubada yana vanuga, 'asa'aiana abama 'ana 'eba luku.”

18 I 'atai, 'awa'awaiogose Iakobo i tovoi, kileunina 'wainega i 'unugaloga i 'ewai, i vetovoia nika ma yana ve'ililibu bunama i 'ewai i iwagi yana 'eba nuave'avina faifaina. 19 Iakobo 'awalawanina 'ana wagava i goleni Bedeli,*Bedeli 'ana 'aseta, Yaubada yana Vanuga. we'e nagami 'ana wagava Losi.

20-21 I 'a'avana, Iakobo vona'awaufaufa toketokena i 'i'idewai 'Auvea 'waineye i vo, 'Ai'edi 'u na ve'isabodebodeku yaku nago 'waineye, 'ai'edi 'ani'ani wata kaleko 'u na veleveleku wata 'ai'edi a na vilaku ma yaku 'atumaina tamaku yana vanuge, 'omu mogitana yaku Yaubada. 22 De'e kileunina a vetovoia yama 'eba nuave'avina, bei tomotoga ma yama ve'ililibu 'a na 'odu'odu 'waimuye. Nani matatabuna 'u na velekuga, a na 'idia 'etokwau 10 a na yatodi we'e kwau 'aitamogana a na 'aniveleneni 'waimuye.”