1 Tutuyanina Litieli i 'asetai kebu Iakobo tamu natuna i da venatuneni, begaidi tatadi Lea i ve'unumagigiedi. Iakobo i voneni i vo, Nuanuama kwakwama 'u na velema, 'ai'edi kebu, a na wafa.”

2 Iakobo i nuasako-'afo'afo Litieli 'waidie i vo, 'Wa da 'asetai yau Yaubada bani'odi 'wa veifufuyedi 'waikuye? Yami venatuna i ve'ilovei wata yami kakala kumanina 'aisena 'ana toveimea, yau kebu.”

3 Bega Litieli i voneni i vo, Nuanuama yama tofolova vevinena Bilani 'u na vagavaidi taiadi 'wa na veluaga, bega kwakwama i na venatunedi yau faifaima 'wainega 'ama 'aila'a i na vefue.” 4 Bega Litieli yadi tofolova vevinena 'ana wagava Bilani i 'aniveleneni Iakobo yana vavine i nagidi, nika taiadi i 'eno. 5 Mulieta Bilani i miana i venatuna, kwamana iavetana. 6 Litieli kwamana i goleni Dani fai i vo, Yaubada yama nuanua i awave'atumaieni wata yama velu'ui i nogai, begaidi natuna iavetana i velema.” 7 Mulieta Litieli yadi tofolova Bilani i miana wata i venatuna, Iakobo natuna 'ana veluga i tubuga. 8 Litieli natudi i goleni Nafitalai fai i vo, Tataku taiadi a toke 'a vevetalaga, nika a vevetoketoke.”

9 Tutuyanina Lea i 'asetai 'akonadi venatuna 'wainega i 'ailove begaidi yadi tofolova vevinena 'ana wagava Silifa Iakobo yana vavine i veleni taiadi i nagi. 10 Mulieta Silifa i venatuna kwamana iavetana i tubuga. 11 Lea natudi i goleni Gada, fai i vo, Mogitana ma yama sosoana.” 12 Mulieta Silifa i venatuna Iakobo natuna iavetana 'ana veluga i tubuga. 13 Lea natudi 'ana wagava i goleni Asa, fai i vo, 'Eba sosoana mogitana 'waimeye, tutuya de'e vevine i na vonema taiadi 'a na sosoana.”

14 Tamu 'aiata witi 'ana 'aile'wa 'ana tutuye Lubeni tamu welavi maniduleke*Tomotoga yadi nuanua i vo 'ako vevine maniduleke vuagina i na 'aniaga i na 'ivaisedi nika i na miana wata i na venetuna. i veluagadi i miedi inana Lea i veledi. Bega Litieli i vonedi i vo, Nuanuama natumu yana maniduleke 'wainega 'wa da velema.”

15 Nika Lea ma yadi nuasako i vonedi i vo, 'Omi 'asa'aiana yama lamoga 'wa eloma, awale wata nuanuami natuku yana maniduleke 'wa na 'ewadi?”

Nika Litieli i vo, 'Atumaina, 'ako lovane Iakobo 'a tauyeni taiadi 'wa na 'eno, natumi yana maniduleke vuagina tutulina.”

16 I lavia nika Iakobo i vilai i mimai talagayega, nika Lea i nago Iakobo i yogo'ede'edeni i voneni i vo, 'Ako lovane taiadi ta na 'eno, fai natuku yana maniduleke vuagina 'wainega a kimwanei.” Bega lovane Iakobo taiadi i 'eno. 17 Yaubada Lea yadi velu'ui i nogai bega i miana wata i venatuna, mulieta Iakobo natuna 'ana ve-5 i venatuneni. 18 Lea natudi 'ana wagava i goleni Isaka, fai i vo, Yaubada 'akonadi yama tutula i velema fai yama tofolova 'a veleni yama lamoga taiadi i nagi.” 19 Mulieta Lea i miana wata i venatuna, natudi 'ana ve-6 i venatuneni Iakobo faifaina. 20 Kwamana i goleni Sebuloni fai i vo, Yaubada 'akonadi tutula 'atumaina i velema, begaidi tutuya de'e yama lamoga i na ve'ililibuyema, fai natunavo iavetadi 6 a venatunedi faifaina.” 21 Mulieta i venatuna natudi vevinena i tubuga 'ana wagava i goleni Deina.

22 Mulieta Yaubada Litieli i nuave'avinidi 'adi vita 'wainega begaidi yadi velu'ui i nogai, umwadi i 'ive'atumaia nika i venatuna. 23 Bega i miana i venatuna natudi iavetana i tubuga i vo, Yaubada 'akonadi 'ama awavesako i 'ewayavuleni, kebu wata 'a na bunumayaga yama mia 'waidie.” 24 Kwamana i goleni Iosefa fai i vo, A vevelu'ui faifaina, nuanuama 'Auvea natukwavo i da 'imoso'ieni wata yama 'aila'a i da vefue.”

27 Lebani Iakobo i voneni i vo, 'U vainenega. A 'asetai 'Auvea i vesauluva 'atumaina 'waikuye 'omu 'waimuyega, bega a ve'ai'aiwabu. 28 'U na voneku 'amu tutula matatabuna 'ana vebwaika bega a na tutulidi.”

29 Iakobo i vo, 'Akonadi 'u 'asetai ma yaku tokemaiga a folofolova 'waimuye wata yamu 'aisayavo sifi, goti wata bulumakau a 'i'isave'avinidi bega i vefueotoga yaku 'isave'avina 'wainega. 30 Basenadi 'aisemi 'wa miamia nani matatabuna kebu i da vebwaika, we'e 'asiau 'akonadi i vebwaika-'afo'afo. Fai yaku folova 'waidie 'Auvea i vevesauluva 'atumaina 'waimuye wata yamu folova i 'imoso'ieni. We'e yau 'asiau bani'odi? Ava'ai tutuyaga a na velamu yaku 'aila'a faifaidi folova 'ifwaidi a na 'idewadi?”

31 Wata Lebani i velutolieni i vo, Ava'ai nuanuamu a na velemu?”

Iakobo i vo, Kebu tamu ava'ai 'u na velekuga siwe nani 'aitamogana yaku nuanua 'u na 'idewai, 'u da tauyeku yamu 'aisayavo a da 'i'isave'avinidi. 32 Yaku nuanua side, 'asiau yamu 'aisayavo a na 'ididi, sifi bwaikidi wata sifi siaidi, goti bwaikidi wata goti siaidi lu'abwa'abwaudi wata 'wau'wauga'avadi 'aitamogana 'aitamogana 'u na veleku. 'Asa'aiana 'aku tutula nonogina. 33 Nika 'awaie 'ada fata 'aisayanidi 'adi 'isa 'wainega ta na 'isa'ididi, bega ta na 'asetai aitoi mogitana 'wainega i folofolova wata aitoi kebu. 'Aisaya 'adi saba i na ve 'waideye, 'ai'edi lu'abwa'abwaudi wata 'wau'wauga'avadi 'a na 'isedi 'omu yamu vi'ai 'waineye, 'ana 'asetai 'omu vinagodi, we'e tomogo'avadi wata kebu lu'abwa'abwaudi wata 'wau'waugidi yaku vi'ai 'waineye 'u na 'isedi yau a vinagodi .”

34 Lebani i vo, 'Atumaina, ava'ai 'u voneyeniga ta na 'idewai.” 35 Bega 'aiatanina 'waineye Lebani i nago goti iavetadi, goti vevinedi wata 'avu'avudi, wata sifi 'avu'avudi i va'augidi, matatabudi i 'anivelenedi natunavo i na 'i'isave'avinidi. 36 Bei Iakobo i miamiaga i tauya i nago 'ana vemanawe 'aiata 'aitonu. We'e Iakobo i miamia Lebani yana 'aisaya 'ifwaidi i 'isave'avinidi.

37 Mulieta Iakobo welavi 'ifwaidi yauyauvidi dididi i kinidabadi bunudi i 'welidi bega sai'afo 'avu'avuna we'e sai'afo yamoyamoina taiadi i wanadi. Welavinidi 'adi wagava fofila, alimonidi wata feleini. 38 I 'a'avana dididi 'weli'welidi i luyavuyavuledi 'aisaya yadi 'eba yemu nagedie bei sifi i veve'alayemu. 39 Tutuyanina i 'aibai welavi didi manawadie, i venatuna nika lu'abwa'abwaudi i venatunedi. 40 Mulieta Iakobo sifinidi natudiavo i 'ivisidi Lebani yana 'aisaya 'waidiega. Tutuyanina yadi 'aibai 'ana tutuye Iakobo sifi tubuvauvaudi i vetovoidi i 'isanago lu'abwa'abwaudi wata 'wau'waugidi 'waidie. De'e bani'odi Iakobo i munega taunina yana 'aisaya 'adi 'aila'a i vefue we'e Lebani yana 'aisaya kebu i da vefue.

41 Tutuyanina sifi vevinedi toketokedi i na velamu 'aibai faifaina, Iakobo welavi dididi 'weli'welidi i yatoyatodi 'eba yemu nagedie 'aisaya manawadie. Nika welavi dididi lilivadie i 'a'aibai. 42 We'e sifi mweadi kebu i da mimaiedi 'eba 'aibai 'ana 'awasasa 'waineye. Begaidi sifi mweadi Lebani yana 'aisaya, we'e sifi toketokedi Iakobo yana 'aisaya. 43 Bega Iakobo i ve'ai'aiwabu mogitana, fai yana 'aisayavo sifi wata goti, tofolovavo iavetadi wata vevinedi, kameli wata doniki fueotogidi.