3 Mulieta 'Auvea Iakobo i voneni i vo, 'U na vilamu 'u na nago yamu 'awalaweye, tamamu, tubumu wata yamu 'aila'avo 'waidie, we'e yau 'amu 'weabu.”

4 Bega Iakobo Litieli wata Lea i vonedi i nagoi tamu 'awasasa 'waineye bei 'aisaya sifi i 'i'isave'avinidi. 5 I vonedi i vo, A 'iseni tamami yana sauluva i vetuli 'waikuye, siwe tamaku yana Yaubada 'aku 'weabu i 'ivaiseku. 6 'Akonadi 'wa 'asetai ma yaku tokemaiga a folofolova tamami faifaina. 7 Siwe tutuya fuedi vekaliega 'aku tutula i sisivedamanedi, siwe Yaubada kebu i da tauyeni bega veviga i na veleku. 8 We'e 'ai'edi i na vo, 'Aisayanidi lu'abwa'abwaudi 'amu tutula,’ nika matatabudi i venatuna lu'abwa'abwaudi. Wata tutuyanina yana nuanua i vo, 'Aisayanidi lu'abwa'abwaudi 'alo luwanawanadi 'amu tutula,’ nika matatabudi i venatuna luwanawanadi. 9 Begaidi tamami yana 'aisaya matatabuna Yaubada i 'anivelenedi 'waikuye.

10 Tamu 'aiata 'waineye 'aisaya yadi 'aibai 'ana tutuye a 'enoneganega, a 'iseni 'aisaya goti iavetadi i 'a'aibai vevinedi lu'abwa'abwaudi 'alo luwanawana taiadi. 11 'Aku 'enoneganega 'waineye Yaubada yana anelose i souyeni i voneku i vo, Iakobo,’ yau a vo, Yau side.’

12 Wata anelose i vo, 'U na 'isanago, goti iavetadi lu'abwa'abwaudi 'adi loi 'u na 'isedi, sifi vevinedi taiadi i 'a'aibai. 'U na 'isedi nika 'u na 'asetai, Lebani yana sauluva sakoina 'waimuye. 13 Yau Yaubada basenadi a souyeku 'waimuye 'atamana Bedeli 'waineye, bei kileu 'u vetovoia bunamayega 'u iwagi wata bei 'u vona'awaufaufa 'waikuye. Bega 'u na i 'idewadewa 'u na tauya 'awalawa de'e 'wainega, 'u na vilamu 'amu tuvadeye.’ ”

14 Litieli wata Lea Iakobo yana vona i tutuli i vo, 'Asa'aiana 'atumaina, tamama yana 'ai'aiwabu matatabuna 'wainega 'ima kebu tamu 'ama veuveuta i da velemaga. 15 'Ama veuveuta tamama yana 'ai'aiwabu 'wainega i vevilai i obu fai nani matatabuna wakawaka vevine 'waidie i nago. Wata tutuyanina i vekimwaneyemaga, maninina 'ana tutula 'u veleni natunavo faifaima i ve'amubwadodoyeni. 16 Tamama yana 'ai'aiwabu matatabuna Yaubada i velemuga, 'asa'aiana 'ima wata natumavo faifaima. Begaidi ava'ai Yaubada i vonemuga, 'u na 'idewai.”

17 Bega Iakobo yana vevinevo wata natunavo i dodoga kameli 'waidie. 18 Iakobo ma yana 'aila'avo i kumeta i nunagoi yadi 'aisaya matatabuna taiadi, wata nani 'ifwaidi i veluagadi 'atamana Fadani-Lami 'waineye. Mulieta Iakobo i 'idewadewa i tauya mulidie i nago 'awalawa Kenani, bei tamana Aisake i miamia. 19 Tutuyanina 'waineye Lebani i nago yana sifi vutuvutudiega i bobodi, Litieli tamadi yana vanuga 'adi kumaea i luku vanugayega i vinagodi. 20 We'e Iakobo Lebani tomogo Alami i vekalieni, bega yadi tauya faifaina kebu i da veifufu 'waineye, givagivayega i degalovei. 21 Bega Iakobo yana kukua matatabuna i 'ewadi i tauya, Ufa Iufiletisi i damani i nagoi 'Oya Giliadi weyaginega.

25 'Oya Giliadi 'waineye Lebani Iakobo i veluagai, kebu 'ani'iega Iakobo yana vadavada 'wainega, bei Lebani yana vadavada i vetovoia. 26 Bega Lebani i voneni i vo, Awale 'u vekalieku? Natukwavo vevinedi 'adi 'ailuga givagivayega 'u degedi 'u nunawedi, 'wa da vo tolugaviavo i da 'ive'avinidi vetalaga 'wainega. 27 Awale givagivayega 'u dega? Awale 'u vekalieku wata kebu 'u da voneku yamu tauya faifaina? 'Ai'edi a da 'asetai yamu tauya faifaina 'ana sakali a da 'idewai, lei aliali*'Ana mogitana vona Ibeliu 'waineye, tamubalini, me Ibeliu vevine yadi 'eba lauinava. wata 'eba lauinava gita 'wainega ta da sosoana. 28 Awale natukwavo wata tubukwavo, kebu 'u da tauyeku 'a da 'avalamaigidi 'alo a da yaogidi? Yamu sauluva 'wa da vo 'wava'wavadi yadi sauluva bani'odi. 29 'Aku fata a da luvela'ovimi, siwe lovane tamamu yana Yaubada i souyeni 'waikuye i voneku i vo, kebu tamu nani 'u na 'idewai Iakobo 'waineye.’ 30 'Akonadi a 'asetai nuanuamu bwaikina 'u na vilamu tamamu yana vanuge, siwe awale yaku yaubadavo 'u vinagodi?”

31 Iakobo i vo, A kololo fai a vo 'ako, ma yamu nuasako natumwavo 'adi 'ailuga 'u na 'eloku.’ 32 We'e yamu yaubadavo aitoi 'wainega 'u na veluagadiga, i lubwaineni tomogonina i 'ewadi i na wafa. 'Ai'edi yamu kukua 'ifwaidi 'u na veluagadi, wata 'u na 'isa'inanadi 'u 'ewadi 'waimega.” We'e Iakobo kebu i da 'asetaiga, Litieli Lebani yana vanuga a na yaubadavo i vinagodi.

33 Bega Lebani i luku Iakobo yana vadavada 'waineye i lauala, mulieta i nago Lea yadi vadavada 'waineye wata tofolovavo 'adi 'ailuga yadi vadavada 'waidie i luku i lauala, siwe kebu tamu ava'ai i da veluagai. 'Eba ve'a'ava i nago Litieli yadi vadavada i lualai. 34 Litieli kumanidi Lebani yana vanuga a na kumaea i 'ewadi kameli kwavuneye i givedi i miafwasedi. Lebani i lauala-vuvua vadavada nageneye siwe kebu i da veluagadi. 35 Bega i vona tamadi 'waineye i vo, O 'auvea, 'ai'edi kebu a na tovoiga 'akonadi 'u 'asetai yau weta'i i 'ewama.” Begaidi Lebani i lauala siwe vanuga 'ana kumaea kebu i da veluagadi.

36 Nika Iakobo i nuasako Lebani i velutolieni i vo, Ava'ai yaku sakonaga ? Ava'ai sauluva sakoina a 'idewai 'waimuye, bega 'u tatalawavina 'u da vo yau tamu tosakona? 37 Bega yaku kukua matatabuna 'akonadi 'u lauala 'waidiamo 'u nago, 'ai'edi yamu kukua 'ifwaidi 'u veluagadiga 'u na sivemagesedi. 'U na yatodi ta na 'isedi yada 'aila'a matadie ta na kiavetonovi. 'Ai'edi yamu kukua 'u da veluagadiga, nuanuaku 'u na vonema nika 'ana fata veimea 'u na velema 'ana tutula 'waimuye.

38 Malamala 20 nagedie taiadi ta miamia yamu 'aisayavo a 'i'isave'avinidi. Malamalanidi ta miamiaga, yamu sifi wata goti a 'i'isave'avinidi siwe kebu tamu sai'afo i da venatubaibai. Wata malamalanidi 'waidie kebu tamu sai'afo yamu 'aisaya sifi a da nikei a da 'ania. 39 'Ai'edi 'ifwaidi yamu 'aisayavo 'aisaya kasikasisidi i da ovadi, 'aisayanidi wafadi kebu a da givedi we'e tutulidi yau a 'idewadi. 'Omu yamu 'aisayavo tovainago i vinagodiga 'aiaseye 'alo lovana 'waineye, 'asa'aiana yau 'aisayanidi 'aitamogana 'aitamogana tutulidi a 'idewadi.

40 Tutuya fuedi ma yaku tokemaiga a folofolova 'waimuye, 'aiaseye inala yana yauyauta bwaikina 'waineye kebu 'ada degadega, wata lovana 'aitamogana 'aitamogana kaukau 'wainega kebu a da 'e'enodewa. 41 Side bani'odi, malamala 20 nagedie a folofolova yamu vanuga 'ana 'ayaneye. We'e malamala 14 nagedie a folofolova natumwavo vevinedi 'adi 'ailuga faifaidi, wata malamala 6 nagedie yamu 'aisayavo a 'i'isave'avinidi. Siwe tutuya fuedi yaku folova 'ana tutula 'u sisivilavilai tutuya 10 bani'odi. 42 We'e 'ai'edi Tamaku yana Yaubada wata Ebelamo yana Yaubada, Aisake ma yana ve'ililibu i 'odu'odu 'waineye, 'ai'edi kebu i da 'ivaiseku 'ako yau nima'ava'avaku a da tauya. Siwe Yaubada yaku 'abiawa 'ana veviga wata yaku folova toketokena i 'iseni, begaidi lovane i souyeni 'waimuye nika i tolimatanimu.”

45 Bega Iakobo tamu kileu i 'ewai nika i vetovoia, yadi 'eba 'isa. 46 Bega Iakobo yana 'aila'a i vonedi i vo, Kileu 'wa na miedi.” Bega kileu i miedi i 'ivedidigi, i 'a'ava Iakobo wata Lebani taiadi i miabui kileu didiga lilivaneye veakutagona 'ana 'ani i 'idewai. 47 Begaidi didiganina 'ana wagava Lebani i goleni Iega-Saaduda, we'e Iakobo 'ana wagava i goleni Galedi.†Iega-Saaduda me Alami bonadiega wata Galedi me Diu bonadiega 'adi saivila i vesala, 'Eba awavemogitana 'ana Didiga.

48 Bega Lebani i vo, Didiga de'e 'omu wata yau yada veakutagona 'ana tugusa, 'wainega ta na 'asetai 'akonadi ta vona'awaufaufa.” Begaidi i goleni Galedi, 'ana 'aseta 'Eba awavemogitana 'ana Didiga 49 Wata tamu 'ana wagava Misifa, me Ibeliu bonadiega 'ana saivila, Lebani i vo, Nuanuaku 'Auvea bei i na 'ise'iseda bega yada veakutagona ta 'idewaiga ta na ve'ililibuyeni. 50 'Ai'edi natukwavo 'u na vesauluva-sakoyedi wata mali vevinevo 'u na nagidiga, 'asa'aiana Yaubada i na 'ise'isemu, kebu tamu aitoi 'ana fata i na 'isemu. Yaubada 'aisena 'ada to'aseta, 'omu wata yau yada veakutagona ta na 'isave'avina.

51 Wata Lebani i vo, Didiga de'e 'u na 'iseni wata tamu a vetovoia 'omu wata yau yada 'eba 'isa 'awasasadeye. 52 Didiga de'e wata kileu manamanawena i vetovoiaga yada ikata 'ana tugusa. Bega yau kebu didiga a na 'iaweni yamu vi'ai 'waineye bega veviga a na velemu 'alo didiga 'u na 'iaweni 'u na mai yaku vi'ai 'waineye veviga 'u na veleku. 53 'Auvea Ebelamo yana Yaubada wata Naoli yana Yaubada, yadi veimea tonovina wainega i da vetoveimea 'awasasadeye.”

Bega Iakobo i velu'ui Yaubada 'waineye, tamana Aisake 'ana wagavayega i vona'awaufaufa, yadi 'eda bala i na veve'ililibuyeni. 54 Bei 'oyeye Iakobo tamu 'aisaya i velomuyeni Yaubada 'waineye i kabuni. Yana 'aila'avo matatabudi i tayegidi veakutagona 'ana sakali i 'ani. Tutuyanina 'ani i 'a'avana matatabudi 'oyeye i 'eno.

55 I 'atai 'awa'awaiogose Lebani i tovoi natunavo vevinedi, wata tubunavo i 'avalamaigidi i yaogidi wata i vesauluva 'atumaina 'waidie nika i tauya i nago yana 'eba mia 'waineye.