32
1 Mulieta Iakobo i tauya i nunago 'edeye, nika Yaubada yana anelosevo i veluagadi. 2 Tutuyanina Iakobo tomotoganidi i 'isedi i vo, De'e Yaubada yana tofolovavo yadi 'atamana.” Bega 'ana wagava i goleni Manaimi.
Iakobo nuakalikali i vetunei Iso 'waineye
3 Mulieta Iakobo tomotoga 'ifwaidi i vetunedi i kumeta tatana Iso 'waineye, 'atamananina 'ana wagava Seli 'waineye bei miamia, 'awalawa Idomu nageneye. 4 I veifufudi i vo, Side yaku vala yaku 'auvea Iso 'wa na voneni 'wa na vo, Yamu tofolova Iakobo, i vekaiwa 'waimuye. Basenadi a nago avuku Lebani 'waineye a miamia i maiga 'asiau. 5 Tutuya de'e 'waineye yaku 'aisayavo fueotogidi bani'odi bulumakau, doniki, sifi wata goti, tofolovavo iavetadi wata vevinedi. Bega side tomotoganidi a vetunedi i viwai yaku 'auvea i vonemu yaku wai faifaina, a nuani ma yamu sosoana 'edeye ta na veluaga.’ ”
6 Tutuyanina tomotoganidi i viladi Iakobo 'waineye i voneni i vo, Tatamu Iso 'a veluagai, 'akonadi i mimai 'edeye, yana tomotoga 400 taiadi i na yogo'ede'edemu.” 7 Iakobo valanina i nogai i kololo-'afo'afo, begaidi yana vevinevo, natunavo wata yana 'aisayavo i 'ididi, sifi bulumakau wata kameli 'aila'a 'ailuga i 'idewadi. 8 I veifufu'a'avana i vo, 'Ai'edi Iso tamu 'aila'a taiadi i na vevetalaga, nika tamu 'aila'a i na dega.”
9 Mulieta Iakobo i velu'ui i vo, 'Omu tubuku Ebelamo yana Yaubada wata tamaku Aisake yana Yaubada. Ie 'AUVEA, basenadi 'u voneku 'u vo, 'U na vilamu yamu 'awalaweye wata yamu tomotoga 'waidie.’ Wata 'u vona'awaufaufa 'waikuye 'u vo, Ma yaku nuakalikali a na vesauluva 'atumaina 'waimuye.’ 10 Yamu 'atumaina, yamu 'isanuakalikali 'eno'eno-vagaina wata yamu vona'awaufaufa 'atumaidi 'u 'idewadi yamu tofolova 'waikuye, yau kebu bani'odi a da vesauluvediga. Tutuyanina a tovoi a damana Ufa Iolidani vi'ainega, kebu tamu ava'ai 'waikuye i da 'eno'eno, yaku wautogana 'aitamogana. We'e tutuya de'e yaku 'aila'a i vebwaika-'afo'afo 'aila'a 'adi 'ailuga. 11 'Auvea, a vevelu'ui 'waimuye nuanuaku 'u na 'ita'ita'ieku tataku Iso 'wainega yau a kololo fai i mimai i na nikeku, yau, yaku vevinevo wata natukwavo taiadi. 12 Siwe 'u vona'awaufaufa 'waikuye 'u vo, Vona mogitana a na vesauluva 'atumaina 'waimuye wata bola 'amu wauma i na vefue wala'ai 'ana 'ilukulukuta bani'odi.’ ”
13 Iakobo lovani 'aitamogana bei i 'eno, mulieta yana kukua 'waidiega 'idewadewai i na 'anivelenedi tatana Iso 'waineye. 14 'Aisayanidi bani'odi goti vevinedi 200, goti iavetadi 20, 200 sifi bwaikidi, wata sifi natudiavo 20, 15 Kameli vevinedi 30 ma natudiavo, bulumakau vevinedi 40, bulumakau iavetadi 10, doniki vevinedi 20 wata doniki iavetadi 10. 16 'Aisayanidi i 'idia 'aila'a 'aitamogana 'aitamogana mulieta i 'anivelenedi yana tofolovavo 'aitamogana 'aitamogana 'waidie. Mulieta yana tofolovavo i vonedi i vo, 'Wa na kumeta 'aisaya 'wa na nunawedi, siwe kebu 'wa na luvetubama 'aila'a 'aitamogana 'aitamogana 'waidiega.”
17 We'e tomotoganidi 'aila'a kumekumetana Iakobo i velu'ase'asedi i vo, 'Ai'edi tataku Iso i na veluagami i na velutoliemi i na vo, 'Omi aitoi yana tofolovavo wata ava'aibe bei 'wa nunagoi?’ 18 Bega 'wa na vo, Yamu tofolova Iakobo yana kukua, siwe nuakalikalinidi 'ana toveimea Iso faifaina.’We'e taunina siva mulimeye i mimai.’ ”
19 Wata bani'odi Iakobo 'aila'a 'ana veluga, 'ana vetonu wata tomotoganidi mulidie i mimaiga i vonedi i vo, Tutuyanina Iso taiadi 'wa na veluaga, veifufunina 'aitamogana wainega 'wa na veifufu. 20 Nika bei 'wa na voneni 'wa na vo, Yamu tofolova Iakobo siva mulimeye i mimai.’ ”
Iakobo yana nuanua i vo, 'Ai'edi yaku 'anivelena a na vetunei i na kumeta. Tutuyanina taunina a na 'iseni a nuani i na sosoaneku.” 21 Tutuyanina i veifufu'a'avana, i tauya i nago yana nuakalikalinidi i vetunedi i kumeta, we'e Iakobo taunina lovananina i 'eno yana vadavada 'waineye.
Iakobo Yaubada yana anelose taiadi i ve'ivunuvunuga
22 Siwe lovananina 'waineye Iakobo i tovoi yana vevinevo 'adi 'ailuga, yana tofolovavo siwe yana vevinevo 'adi 'ailuga wata natunavo 'adi 11 taiadi Ufa Iaboki i damani. 23 Tutuyanina tomotoga matatabudi i vagavaidi i damana ufa vi'ainega, yana kukua matatabuna i 'anivelenedi yana tofolovavo 'waidie.
24 Iakobo 'aisena i miamia lovana 'ana utukamwana 'waineye tamu tomogo i mai ma yana toketokena taiadi i ve'ivunuvunaga i nagoga i tutuya i kililia. 25 Tutuyanina tomogonina i 'asetai 'akonadi yana toketokena i mweamwea, bega Iakobo agalina 'ana tubwa i 'wenoi. 26 Tomogo i vo, 'U baileku a na nago 'akonadi i 'ata'atai.”
Siwe Iakobo i vo, Kebu a na 'avalainanimuga, nagami 'u na vesauluva 'atumaina 'waikuye mulieta a na tauyemu 'u na nago.”
27 Nika tomogonina i velutolieni i vo, aitoi 'amu wagava?”
I vo, yau Iakobo.”
28 Bega tomogonina i vo, 'Amu wagava kebu wata Iakobo i na golegolemu, 'Asiau 'amu wagava ivauna Isileli i na 'inanai, fai Yaubada wata tomotoga taiadi 'u vetalaga nika 'u vetoketoke.”
29 Iakobo i vo, 'amu wagava 'u voneku.
Siwe tomogonina i voneni i vo, Awale nuanuamu 'aku wagava 'u na 'asetai.” Mulieta Yaubada i vesauluva 'atumaina Iakobo 'waineye.
30 Iakobo 'atamana 'ana wagava i goleni Fenieli { 'ana 'aseta Yaubada taiadi i ve'a'isa}, fai i vo, Yau Yaubada matakuyega a 'iseni siwe i 'isanuakalikalieku bega yawaiku kebu 'ida 'ewai.” 31 Inala 'akonadi i vulaoga we'e Iakobo i tauya Fenieli 'wainega, we'e agalina 'ana tubwa i 'anita'ia fai ma 'ana kini'ona bega i tatalafai'a. 32 Avinodi tutuya de'e 'waineye me Isileli kebu 'aisaya agalidi 'adi tubwa 'waidie 'ida 'ani'anidi fai lovananina 'waineye tomogo Iakobo agalina a na tubwa i tutuwenoi nika yana toketokena i mwea.