1 Iosefa tamana 'waineye i lumata'afufu i 'we'wela. 2 Mulieta to'ive'atumai 'adi to'idewadewa i vonedi tamana tomogona nageneye matatabuna i 'ewadi nika lalana i na 'eno'eno tutuya manamanawena, nika mogitana kamokamona i 'ewadi. 3 Folovanina i 'idewaiga, 'ana 'etoava i na 'eno'eno 'aiata 40 nagedie, we'e me Itifita i vevemogai tomogonina faifaina 'aiata 70 nagedie.

4 Tutuyanina vemogai 'ana tutuya i 'a'ava, Iosefa i nago Felo yana vanuga 'ana to'isave'avinavo i vonedi i vo, 'Wa da 'isanuakalikalieku, nuanuaku tamu nani faifaina 'wa da veifufu Felo 'waineye faifaiku. 5 Wata 'u na voneni 'u na vo, Tamaku i vona'awaufaufa 'waikuye i vo, Sai'afoga a na wafa. Nuanuaku vovoku 'wa na vileni 'awalawa Kenani tauniku 'aku taumata a 'idewa-vagaseniga 'waineye, 'wa na ve'ufaku.’ Begaidi a vevelu'ui-nuakalikali 'waimuye, nuanuaku 'u da tauyeku a da nago tamaku a da ve'ufai, mulieta a da vilaku.”

6 Felo Iosefa yana velu'ui i awave'atumaieni i vo, 'U na nago tamamu 'u na ve'ufai, fai basenadi i vona'awaufaufa 'waimuye 'u na vematayakeyakeni.” 7 Begaidi Iosefa i laka tamana i ve'ufai. Yana nagonina 'waineye, tofolovavo fuedi taiadi i nagoi, Felo yana to'edakumetavo bwaikidi, yana vanuga 'ana to'edakumetavo wata me Itifita yadi to'edakumetavo bwaikidi. 8 Wata Iosefa bani'odi, yana vanuga 'ana tomia wata enavo taiadi, yadi vanuga 'adi tomia matatabudi taiadi i nagoi. We'e natudiavo siasiaidi, yadi sifi wata yadi bulumakau i miamiani 'atamana Goseni 'waineye. 9 Fwayafwaya 'ana waka yo'eyo'e fuedi wata osi 'adi tokiavetovetonova Iosefa i 'weabuya taiadi i nagoi.

10 Tutuyanina i le'wai 'atamana Atadi 'waineye, 'atamananina Ufa Iolidani lilivaneye, me Isileli ma yadi nuavita i toke i vevemogai 'aiata 7 nagedie, we'e Iosefa taiadi i miamia tamana i mogamogaia. 11 'Awalawanina 'waineye me Kenani i miamiani, 'isedi i vevemogai 'atamana Atadi 'waineye. Begaidi 'atamananina i goleni Ebeli-Misilemi, fai i vo, De'e 'atamananina vemogai 'ana 'atamana, fai bei me Itifita i vemogai.”

12 Bega Iakobo natunavo 'adi veimea i velediga, i vematayakeyakeni. 13 Natunavo vovona i evai i naweni 'awalawa Kenani, bei i ve'ufai 'ana taumata 'waineye fwayafwaya Makifela, 'atamana Mamile lilivaneye. De'e taumatanina tututula-vagaina Ebelamo i kimwanei Efiloni tomogo Aiti 'wainega, bei towafa i na veve'ufadi. 14 Iakobo 'ana ve'ufa i 'a'ava, Iosefa i vilai i nago Itifita, enavo wata 'ana to'weabu taiadi.

15 Tutuyanina Iosefa tatanavo i 'iseni tamadi 'akonadi yawaina i 'a'ava, 'aise'avadi i veifufu i vo, Voke 'awaie Iosefa vita ta veleniga i na nuanuani, nika ma yana nuasako i na tutula.” 16-17 Bega yadi nuanuananina i vetunei Iosefa 'waineye i vo, Tamada bola ma yawaineye i vonema yana nuanua 'a na lu'ivoneyeni 'waimuye i vo, Avinodi tatamwavo sakona bwaikaotogina i 'idewai 'waimuye, siwe a vevelu'uiemu yadi sauluvanina 'u da nuatavuni.’ 'Ima 'asa'aiana tamamu yana Yaubada yana tofolovavo, bega 'a velu'ui-nuakalikali 'u da nuatavunima.” Tutuyanina valanina i nogai nika Iosefa i 'we'wela. 18 Mulieta tatanavo matatabudi i maia i 'odu 'waineye i voneni i vo, 'Ima yamu tofolova-maimaiga.” 19 Iosefa tatanavo i vonedi i vo, Kebu 'wa na kolologa, yau kebu Yaubadaga. Kebu 'ana fata a na vematavulogimi. 20 'Omi nuanuami sauluva sakoina 'wa na 'idewai 'waikuye siwe Yaubada yami nuanuanina i sivilai nani 'atumaina i 'idewai bega 'asiau tomotoga fueda ma yawaida ta miamia.” 21 Iosefa bonana bikanega tatanavo i 'ivenua'agi'agidi i vo, Kebu 'wa na kolologa, 'omi wata natumiavo taiadi a na 'isave'avinimi.”

24 Mulieta Iosefa enavo i vonedi i vo, Yau sai'afoga a na wafa siwe Yaubada i na 'ivaisemi i na vagavaimi Itifita 'wainega i na nawemi tamu 'awalawa 'waineye, fai basenadiotoga i vona'awaufaufa Ebelamo, Aisake wata Iakobo 'waidie i na veledi.”

25 Bega Iosefa me Isileli 'waidie i vona'awaufaufa i vo, Yaubada i na 'ivaisemi bega i na vevilami, mulieta a na wafaga luluku taiadi 'wa na nawedi.” 26 Bega Iosefa 'ana malamala 110 i veluagai, nika yawaina i 'a'ava. Mulieta me Itifita vovona 'idewadewai Itifita 'awalawa 'waineye, i'a'ava i dodogi wafa 'ana didiwaka nageneye.