49
Iakobo yana veifufu 'eba ve'a'ava natunavo 'waidie
1 Mulieta Iakobo natunavo matatabudi i goleva'augidi i vonedi i vo, 'Wa na maia lilivakuye, bega naninidi 'awaie i na souyediga faifaidi a na veifufu 'waimie.
2 'Omi Iakobo natunavo, 'wa maia 'wa na vainenega,
bega tamami Isileli bonana 'wa na nogai.
3 Lubeni, 'omu natuku yaku tubu'edakumeta, wata yaku toketokena yana 'eba velamu,
tubuvauvaukuye 'omu 'u tubuga.
'Omu to'edakumeta wata ma yamu veimea emwavo 'ifwaidi 'waidiega.
4 We'e 'omu yamu sauluva bani'odi weyagata kuvakuvala,
kebu 'ana fata 'u na vetomogo-bwaika emwavo 'waidiega.
Fai yaku vavine taiadi yaku 'eba 'eno 'waineye 'wa veluaga,
yaku nagi 'ana 'ivi 'u 'iveyokei.
5 Simioni wata Livai yadi sauluva 'aitamogana,
yadi fulumai kefata, 'eba vetalaga faifaidi.
6 'Asiau wata tutuya i mimaiga 'waidie, yau kebu i da lubwaineku taiadi 'a na mimiava'auta,
fai ma yadi nuasako tomotoga fuedi i luvewafadi,
wata sauluva sakoiotogina i 'idewai 'aisaya bulumakau 'agedi i kinidabadabadi yadi 'eba sosoana.
7 Yadi sauluva sakoiotogina 'ana vematavuloga vitaotogina,
yadi ve'eduogaogala 'ana vematavuloga 'ivekokova.
Yaku veimea 'wainega tomotoganidi a na veyavulidi i na nagoi Iakobo tubunavo 'awasasadie,
A na veyavulidi i na nagoi 'awalawa Isileli matatabuna nageneye.
Iakobo natunavo i vona-nuakalikaliedi
8 Wata Iakobo i veifufu i vo,
Iuda, 'awaie tatamwavo wata taimwavo i na subiamu.
'Amu gaviavo 'u na leodi wata 'u na vetoketoke-'iawedi
we'e natukwavo 'ifwaidi ma yadi ve'ililibu i na 'odu 'waimuye.
9 Sal 24:9; Ve 5:5 Natuku Iuda, 'omu 'aisaya kasikasisidi laioni natudi bani'odi,
'ana 'aisaya i na ovai i na 'ania mulieta i na vilai 'ana 'ivie i na miamia.
Kebu tamu aitoi 'ana fata i na tokemaigeni bega i na tolivauvauli.
10 Iuda, vetoveimea 'ana tugusa tutuya matatabuna nimamuye i na 'eno'eno kebu tamu aitoi i na elomu.
Tubumwavo tutuya matatabuna i na veveimea, kebu tamu aitoi i na 'ewaiga.
'U na veveimea i na nagoga nika taunina 'ada toveimea mogitana i na le'wa,
kumanina tomotoga matatabudi 'awalawa tulina tulina 'wainega, ma yadi veve'ililibu yana veimea i na vematayakeyakeni.”
11 Yana doniki tubuvauvauna i na yogoneni welavi kalefa 'waineye
yana 'aisayanina kalefa didina 'atumaina 'waineye i yogoneni.
Oine 'wainega 'ana kaleko i na lekoadi,
we'e kalefa vuagina ufaninega 'ana talauma i na lekoadi.
12 Matana 'ana 'wau'wauga sai'afo i vagalaka, mulieta oine,
wata nigona 'avu'avudi niula wetona bani'odi.
13 Sebuloni kumanina balabala 'ana tomia,
bei waka bwaikidi yadi 'eba luku.
We'e yana 'eba veimea 'ana tugusa sai'afo i na vaganago 'atamana Saidoni weyaginega.
14 Isaka yana toketokena 'aisaya doniki bani'odi,
i doniki kwavuneye i miabui i veveawai kukua 'eba vedodoga 'ailuga 'awasasadie.
15 Tutuyanina yana 'eba veawai
wata fwayafwaya 'atumaina i na 'iseni,
'avalana i na vebodeni venuana vitana 'waineye,
taunina i na tauyeni folova vitadi 'waidie, 'wa da vo bani'odi tofolova-maimaiga.
16 Dani yana 'aila'a i na veveimeyedi,
'aila'anina tamu wauma me Isileli nageneye.
17 Dani bani'odi 'o'olo 'eda lilivaneye,
tamu 'o'olo kasikasisina 'eba nago lilivaneye,
bega osi 'agedi i ovaovadi,
nika 'ana tokiavetovetonova i 'e'etovila mulidiega.
18 Ie 'Auvea, yau nuanuaku 'u na 'ita'ita'ieku.
19 Gada 'ana gaviavo 'ana daba i na daba,
siwe i na lu'wavinedi i na dega.
20 Asa 'ana'ana 'awaie 'atumaidi wata ma mu'wadi,
'ani'aninidi kini 'adi laubwaina.
21 Nafitalai tamu 'aisaya walawala'ai vevinena bani'odi,
yavuyavuna 'ana fata i na dega,
natudiavo 'adi 'isa 'atumaidi.
22 Iosefa welavi 'atumaina ma vuagina
'ana 'isa 'atumaina ufa-luluvuala lilivaneye i tovotovoi,
didina i laka kali i 'iaweni.
23 'Ma yadi nuasako 'ana gaviavo 'ana daba i daba, wata veviga bwaikina i veleni.
24 Siwe yana tufu vatuna,
Iakobo yana Tovemata'ai'ai nimana i kiavetoketokedi,
kumanina To'ita'ita'i, me Isileli yadi 'eba Tunuvala.
25 Nuanuaku tamamu yana Yaubada i na 'ivaisemu,
kumanina Tovemata'ai'ai i na vesauluva 'atumaina 'waimuye
nika nuakalikalinidi 'u na veveluagadi abamayega,
malaveta dibuotoginega,
wata 'amu susu wata natuvalulu 'wainega.
26 Tamamu yana vona-nuakalikali 'wainega 'Auvea Yaubada i da vevesauluva 'atumaina Iosefa 'waineye,
vona-nuakalikalinina 'oya miamia-vagaidi i da 'iaweotogedi.
Nuanuaku vona-nuakalikalinidi i da obu Iosefa 'unu'ununeye,
kumanina i veto'edakumeta enavo 'waidiega.
27 Beniamina 'wa da vo 'ou'ou kasikasisina bani'odi,
'awa'awaie 'ana gaviavo i leoleoyedi,
we'e lavilavie 'ana gaviavo yadi kukua i veveusedi enavo tolugavia 'waidie.”
28 Tomotoganidi 'waidiega me Isileli wauma 12 i souyedi. Side bani'odi tamadi yana veifufu wata yana 'alanuai i 'idewai natunavo 'waidie. Wata 'aitamogana 'aitamogana i vona nuakalikaliedi 'adi laubwaina 'wainega.
Iakobo yana wafa wata 'ana ve'ufa
29 Mulieta Iakobo i velu'ase'asedi i vo, Sai'afoga a na wafa bega a na nago tubukwavo 'waidie. Nuanuaku 'wa na ve'ufaku tamaku wata tubuku lilivadie, taumatanina 'aitamogana 'waineye, tomogo Aiti 'ana wagava Efiloni yana fwayafwaya 'waineye. 30 Ovunina basenadi Ebelamo i kimwanei me Isileli yadi fwayafwaya. 'Awalawanina i 'eno'eno Makifela 'atamana Mamile lilivaneye 'awalawa Kenani nageneye. 31 Tanoganina 'waineye Ebelamo ma yana vavine i ve'ufadi. Wata bei Aisake ma yana vavine Libeka i ve'ufadi, wata taumatanina 'waineye Lea a ve'ufadi. 32 Basenadiotoga fwayafwaya wata ovu tubuku Ebelamo i kimwanei me Aiti 'waidiega.”
33 Fol 7:15Tutuyanina Iakobo yana velu'ase'ase natunavo matatabuna 'waidie i 'a'avana, 'agena i silakavedi 'ana 'ivie, nika yawaina i 'a'ava bega tubunavo mulidie i nago.